Hongeye kuvugwa ibuye rya rutura rishobora kugwira isi mu gihe cya vuba rikayishegesha

Yanditswe na Mfitumukiza Moïse
Kuya 22 Kamena 2017 saa 09:34
Yasuwe :
0 1

Ni kenshi abahanga mu by’ubumenyi bw’ikirere batangaza ko havumbuwe amabuye azagwa ku Isi nyamara bikarangira atahaguye. Ubu nabwo byatangajwe ko hari irindi buye riri mu isanzure ku buryo rishobora kugwa ku Isi isaha n’isaha.

Urugero rw’iryahanuwe ntirigere ku Isi, ni iryavuzwe n’Ikigo cy’Abanyamerika gishinzwe ubumenyi mu by’ikirere (NASA) mu 2015, aho cyavugaga ko tariki ya 31 Ukwakira uwo mwaka ahagana saa cyenda n’iminota 14 ku isaha ngengamasaha GMT, ibuye rifite uburebure bwa kilometero 2,5 rizasatira isi riri ku muvuduko wa kilometero zirenga ibihumbi 125 ku isaha, gusa iyo tariki yarangiye nta kibaye.

Umwe mu bahanga mu by’ubumenyi bw’ikirere , Alan Fitzsimmons, wo muri Kaminuza ya Queen’s University Belfast muri Ireland y’Amajyaruguru yigisha ibijyanye no gukora ubushakashatsi, yatangaje ko hamaze kuvumburwa amabuye ashobora kugwira Isi arenga 1,800 ndetse ko n’ubu akivumburwa. Ariko yashimangiye ko hari irishobora kugwa isaha n’isaha.

Mu kwezi kwa mbere uyu mwaka ibuye nk’iryo ngo ryatambutse Isi rigera ku ntera ingana na ½ risatira ukwezi. Uyu mushakashatsi akomeza avuga ko amabuye manini biborohera kuyabona ariko ko nta cyiza bizazanira abantu mu gihe nta buryo bwo kubyirinda.

Ati “Ibiturika muri iyi minsi mu Isi ni byinshi kandi biba byoroshye gushegesha imijyi ikomeye ndetse bitaretse n’ibinyabuzima. Ni ingenzi kumenya ko abahanga mu by’ubumenyi n’ikoranabuhanga bateye intambwe igaragara mu kuvumbura amabuye yegereye Isi ndetse n’ubwoba ateye. Havumbuwe arenga 1800 ndetse hari menshi yitezwe kuzagaragara.”

Yakomeje avuga ko ubu batakiri gushakisha kumenya niba hari rimwe muri ayo mabuye rizagwira Isi, ahubwo ko ikibaraje ishinga ari ukumenya umunsi cyangwa igihe kizagwira, ariko akemeza ko nta kabuza ayo mabuye azagwa ku isi.

Tariki 30 Kamena ubwo hazaba hizihizwa umunsi wahariwe kwirinda amabuye yagwira Isi, Dr Alan Fitzsimmons azifatanya n’abahanga mu bya siyansi ndetse no mu bumenyi bw’ikirere basobanure aya mahano ashobora kugwira Isi. Kuri iyo tariki mu 1908 ibuye ryaguye muri Siberia rifata agace karenga kilometero kare 2000. Bivugwa ko ubwo ryagwaga ku butaka ryari rifite imbaraga zingana n’iz’ibisasu 185 bisa n’ibyarashwe Hiroshima mu Buyapani.

Bivugwa ko amabuye nk’iryo ari menshi mu kirere ndetse ko aniyongera umunsi ku wundi. Igihe azagwira ku isi ngo ashobora kwangiza byinshi harimo no kuba ubuzima bwayo bushobora kurangira nk’uko bikomeza bitangazwa n’abashakashatsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza