Hagiye gukorwa ama- robots amara irungu abageze muzabukuru

Yanditswe na Mfitumukiza Moïse
Kuya 14 Nyakanga 2017 saa 08:03
Yasuwe :
1 0

Ikoranabuhanga rigerageza gufata mu mpande zose z’ubuzima kugira ngo buri wese aryisangemo, gusa abantu bageze muzabukuru basaga n’abirengagizwa naryo gusa nabo bashyizwe igorora.

Amasosiyete y’ikoranabuhanga n’inganda ari kugerageza uburyo ama-robots yafasha abageze muzabukuru n’abandi bantu bamara igihe kinini bonyine ku buryo bataza bicwa n’irungu.

Intuition Robotics, sosiyete yo muri Isiraheli ikora amarobots yakusanyije amadolari y’Amerika miliyoni 14 mu baterankunga batandukanye azabafasha gukora robot yiswe Elliq izajya ifasha abantu mu buzima bwa buri munsi.

Elliq yakozwe hagamijwe gufasha abantu gutumanaho no kubibutsa gukora ibikorwa runaka nko kujya guhura na muganga n’ibindi. Iyi robot ishobora kohereza ubutumwa bugufi n’amafoto.

Umuyobozi wa Intuition Robotics, Dor Skuler, avuga ko iyi robot ibafasha kuganira n’umubyeyi we aho mbere bavuganaga gake cyane ariko kuri ubu bikaba byarahindutse.

Iyi robot kandi ifasha abantu kugabanyiriza akazi abatanga serivise zo kwita ku bantu. Elliq ifasha abakuze kuguma bahuze ndetse birateganywa ko izajya inabaha ibyifuzo harimo nko kujya gutembera cyangwa kumva umuziki.

Elliq ntabwo izaba igenda, izajya ishyirwa ahantu hamwe abe ariho ikorera akazi.

Skuler avuga ko mbere yari yatekereje ko yakora robot ijya ikurikira umuntu aho agiye, gusa nyuma yaje gusanga ari ibyiza atari gufata robot ngo ayisanishe n’umuntu ahubwo ari ukuyiha ubushobozi bwo gufasha umuntu ibyo akeneye.

Andi masosiyete akora ama-robots nka Blue Frog Robotics yakoze ama-robots abasha kugenda, nk’aho iyi sosiyete yakoze robot ibasha kugenda yifashishije amapine biteganyijwe ko izajya ku soko mu mpera z’uyu mwaka.

Ama robots ni kimwe mu bice by’ikoranabuhanga biri gutera imbere muri iki gihe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza