Twitter igiye kongera umubare w’inyuguti zijya muri ‘tweet’

Yanditswe na Mfitumukiza Moïse
Kuya 27 Nzeri 2017 saa 10:35
Yasuwe :
0 0

Urubuga nkoranyambaga rwa Twitter rwatangiye igerageza ry’uburyo hakongerwa umubare w’inyuguti zijya mu butumwa bumwe(tweet), zikava kuri 140 zikaba 280.

Twitter yatangaje ko umubare ntarengwa w’inyuguti 140 wabangamiraga benshi mu bakoresha uru rubuga bigatuma abantu batisanzura nk’uko bikwiye.

Ushinzwe ubucuruzi muri Twitter, Aliza Rosen, yatangaje ko ubu buryo buri kugeragezwa mu ndimi zitandukanye ukuyemo Igishinwa, Ikiyapani n’Ikinyakoreya kubera ko izi ndimi zo byoroshye kuba wagaragaza ibyiyumviro byawe mu nyuguti imwe.

Mu bari kugeragerezwaho ubu buryo harimo umuyobozi wa Twitter Jack Dorsey. Mu butumwa yanditse ku rubuga rwe rwa Twitter yashimiye ikipe yatekereje iki gikorwa ndetse yongeraho ko nubwo ari impinduka nto ariko zizafasha benshi.

Abenshi mu bakoresha uru rubuga bifuza ko hashyiraho uburyo bwo gukosora tweet wanditse mu gihe wakoze ikosa mu myandikire gusa muri iri vugurura ntabwo byavuzweho.

Urubuga nkoranyambaga rwa Twitter rwatangijwe mu 2006, ubu rukaba rukoreshwa na miliyoni 100 buri munsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza