IGIHE.com > Imikino
Abanyamakuru  batangiye kwitegura CHAN 2016

Abanyamakuru batangiye kwitegura CHAN 2016


Yanditswe kuya 20-02-2013 - Saa 05:26' na Emmanuel Kwizera

Mu rwego rwo kongerera ubunararibonye abanyamakuru b’imikino hitegurwa CHAN 2016, harimo gutegurwa abanyamakuru bazifashishwa nk’abafite ubumenyi buhagije ku mikino, dore ko bazaba batangariza amahanga uko imikino irimo kugenda.

Inama Nkuru y’Itangazamakuru MHC, ku bufatanye n’Ikigo cy’Ibitangazamakuru mu Biyaga Bigari GLMC cyo mu ishuri ry’Itangazamakuru n’Itumanaho rya Kaminuza Nkuru y’u Rwanda, harimo guhugurwa abanyamakuru 75 ku gutara amakuru y’imikino n’imyidagaduro.

Aba bazifashishwa mu mikino y’irushanwa rya CHAN rihuza amakipe y’ibihugu ku Mugabane w’Afurika, akinwamo n’abakinnyi bakina ku mugabane w’Afurika gusa, dore ko u Rwanda rurimo gutegura kuzayakira mu W’2016 ryujuje ibyangombwa ku mpande zose.

Abanyamakuru barimo guhugurwa mu gihe cy’amezi atatu, batangaza ko inyigisho bahabwa zibafitiye akamaro, kuko ngo mu gihe biga bafata n’umwanya bakaganira ku bitagenda neza ku mupira w’amaguru hagendewe ku ngero z’ibibera mu Rwanda, kugira ngo byegeranyirizwe hamwe bikosorwe.

Umunyamakuru wa Kinyamateka, Habumugisha Jean Pierre, ati “Twigira cyane ku makosa akunze gukorerwa ku mikino yo mu Rwanda ariko icyo twifuza ni uko n’ubwo CHAN yarangira, tutazasubira inyuma ku rwego mpuzamahanga nk’abanyamakuru b’imikino, kandi turifuza ko ibyo twiga bizanagira ingaruka nziza ku mikino yo mu Rwanda.”

Mukeshimana Assoumpta uvuga ko yiteguye kuzatara amakuru muri CHAN, arasobanura ko bamze icyumweru n’igice batangiye kwiga, ariko ngo ikibazo gihari ni uko abanyamakuru basanzwe bamenyereye itangazamakuru ry’imikino batajya baza kwiga ngo bahanahane ibitekerezo.

Umuyobozi w’Inama Nkuru y’Itangazamakuru Mugisha Emmanuel ubwo yaganiraga na IGIHE, yatangaje ko mu guhitamo abitabira aya mahugurwa hagendewe ku guhugura abari mu mwuga batiize itangazamakuru, hagenderwa ku gitsina aho hazamuwe imibare y’igitsina gore cyitabiriye aya mahugurwa, dore ko barimo bagera kuri 30%, no ku basanzwe bakora amakuru y’imikino.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO