Kwamamaza

Amagare: Abanyarwanda ntibatangiye neza muri Shampiyona y’Isi

Yanditswe kuya 11-10-2016 saa 20:19' na Manzi Rema Jules


Mu mikino ya Shampiyona y’Isi iri kubera muri Qatar, Abanyarwanda ntibatangiye neza kuko mu gusiganwa umuntu ku giti cye (Individual Time Trial) mu bari munsi y’imyaka 23, Areruya Joseph yabaye uwa 57, Ukiniwabo René Jean Paul aba uwa 67 mu batarengeje imyaka 18 naho Ingabire Beata mu bakobwa asoza ku mwanya wa 39.

Iyi mikino yatangiye kuri uyu wa Mbere tariki ya 10 Ukwakira, u Rwanda ruhagarariwe n’abakinnyi batandatu muri bo batatu bamaze gukina nta wabashije kwegukana umudari cyangwa ngo aze mu myanya y’imbere.

Areruya Joseph ni we Munyarwanda wasiganwe bwa mbere aho kuri uyu wa Mbere mu batarengeje imyaka 23, yegukanye umwanya wa 57, asizwe iminota 4:59 na Mathis Marco ukomoka mu Budage wakoresheje 34:08 mu isiganwa rizenguruka mu Mujyi wa Doha ku ntera ya kirometero 28.9.

Kuri uyu wa Kabiri abandi bakinnyi babiri basiganwe mu byiciro bitandukanye nta wabashije kwitwara neza kuko mu bagore Ingabire Beata wahagarariye u Rwanda bwa mbere asimbuye Girubuntu Jeanne d’Arc urwaye, yasoje ku mwanya wa 39 mu bakinnyi 40 babashije kurangiza irushanwa asizwe iminota 13:25 na Neben Amber wo muri Leta Zunze Ubumwe za Amerika wakoresheje 36:37.

Si uyu munyarwandakazi wagowe cyane muri iri siganwa kuko n’abanya- Erythrée basanzwe bakomeye cyane ndetse bigaragaje ubwo bari mu Rwanda muri Kanama mu myitozo bakoreraga mu Kigo cy’i Musanze barimo Debesay Mossana wegukanye ‘Circuit du Nord’ muri Rwanda Cycling Cup, yasoje ari uwa 33 mu gihe mugenzi we Kidane Wehazit yasoje ari uwa 35.

Mu bari munsi y’imyaka 18, Ukiniwabo René Jean Paul na we wiyerekanye cyane uyu mwaka muri Rwanda Cycling Cup akanegukana ‘Circuit du Nord’, muri shampiyona y’Isi yitabiriye bwa mbere, yasoje ari uwa 67 mu basiganwa 83 asizwe iminota 5:48 na Mcnulty Brandon wo muri Leta Zunze Ubumwe za Amerika wabaye uwa mbere akoresheje iminota 34:42 ku ntera ya kirometero 28,9.

Uwizeyimana Bonaventure usanzwe akinira ikipe yo muri Afurika y’Epfo, Dimension Data uzarushanwa mu gusiganwa n’ibihe mu bakuru kuri uyu wa Gatatu n’ubundi bazenguruka mu Mujyi wa Doha ku ntera y’ibirometero 40 , umwaka ushize mu batarengeje imyaka 23 yari yabaye uwa 97 asizwe 6’11” n’uwa mbere.

Abakinnyi b’u Rwanda barimo gukoresha aya marushanwa mu rwego rwo gukarishya imyitozo bipima n’abakinnyi beza ku Isi kugira ngo bitegure ‘Tour du Rwanda 2016’ izakinwa kuva tariki ya 13 kugera tariki ya 20 Ugushyingo uyu mwaka.

Shampiyona y’Isi yatangiye kuri uyu wa Mbere tariki 10 izasozwa ku wa 16 Ukwakira uyu mwaka.

Uwizeyimana Bonaventure(imbere) wegukanye Shampiyona y'u Rwanda y'uyu mwaka agiye kugerageza amahirwe muri shampiyona y'Isi
Ingabire Beata (ibumoso) yabaye uwa 39, Ukiniwabo(umukurikiye) aba uwa 67 mu batarengeje imyaka 18

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved