Areruya Joseph ayoboye ibihangange mu kunyonga igare muri Afurika

Yanditswe na IGIHE
Kuya 14 Gashyantare 2018 saa 06:40
Yasuwe :
0 0

Ishyirahamwe ry’Umukino w’Amagare ku Isi (UCI) ryagaragaje ko Umunyarwanda Areruya Joseph ukinira ikipe ya Dimension Data for Qhubeka yo muri Afurika y’Epfo ari we uri ku mwanya wa mbere muri Afurika.

Areruya ari imbere n’amanota 404, akurikiwe na Abraham Meron wo muri Érythrée ukinira Bike Aid yo mu Budage ufite amanota 336, ku mwanya wa gatatu hari Umunyafurika y’Epfo SMIT Willem Jokobus ufite amanota 293, akaba akinira Team Katusha Alpecin (TKA) yo mu Busuwisi.

Areruya Joseph yaherukaga kuza ku mwanya wa kabiri ku rutonde rw’abakinnyi beza mu mukino w’amagare muri Afurika mu mwaka wa 2017 mu bihembo bitangwa na “La Tropicale Amissa Bongo.”

Uyu mwanya Areruya yashyizweho awukesha ibigwi yagize mu minsi mike ishize. Umwaka wa 2017 yawusoje atwara isiganwa rya Tour du Rwanda, yongera gukora amateka muri Mutarama 2018 ubwo yegukanaga isiganwa rya La Tropicale Amissa Bongo rikomeye ku mugabane wa Afurika, aba n’umunyafurika wa mbere uryegukanye ari kumwe n’Ikipe y’Igihugu.

Yongeye kwigaragaza nyuma y’iminsi mike mu ntangiriro za Gashyantare ubwo yegukanaga isiganwa rya Tour de l’Espoir ryaberaga muri Cameroun, binamuhesha itike yo gukina Tour de l’Avenir, isiganwa ry’abatarengeje imyaka 23 rya Tour de France rizaba muri Kanama 2018.

Ku rutonde UCI yashyize ahagaragara, mu bihugu bya Afurika u Rwanda ruri ku mwanya wa gatatu nyuma ya Érythrée na Afurika y’Epfo. Rukurikirwa na Maroc ndetse na Algérie.

Areruya Joseph ari ku mwanya wa mbere mu kunyonga igare muri Afurika

Ibigwi bya Areruya Joseph

Uyu musore yavutse tariki 23 Ugushyingo 1996 mu Murenge wa Mukarange mu Karere ka Kayonza. Ni imfura mu muryango w’abana batandatu ba Gahemba Jean Marie Vianney nawe wigeze kuba igihangange mu mukino wo gusiganwa ku magare ndetse agahagararira u Rwanda mu mahanga inshuro zitari nke.

Ntiyabashije kwiga amashuri asanzwe ariko kuva ari umwana muto yakunze igare kurusha ibindi byose. Yegukanye isiganwa rya mbere afite imyaka 15. Icyo gihe yarushanwaga akoresheje igare risanzwe rizwi nka “matabaro” cyangwa ‘pneu ballon’ mu masiganwa y’imirenge.

Yatangiye kwitabira amasiganwa ategurwa na Ferwacy mu 2012 afite imyaka 16 ariko aba umukinnyi w’Ikipe y’Igihugu mu 2014 atoranyijwe na Jonathan Boyer mu bana bagombaga gukina Shampiyona ya Afurika ya ‘Mountain Bike’.

Yahagarariye u Rwanda bwa mbere muri Kanama 2015 mu isiganwa rya “Brazil Tour do Rio’ gusa ntiyabashije kurangiza. Kuva ubwo yabaye umukinnyi ukomeye ndetse atoranywa gukina Tour du Rwanda ye ya mbere uwo mwaka asoza ari uwa kabiri ku rutonde rusange anafasha cyane Nsengimana Jean Bosco kuyegukana.

Yitabiriye La Tropicale Amissa Bongo bwa mbere mu 2016 ataha ari uwa 63 ku rutonde rusange aba n’uwa kabiri mu gace k’umunsi wa kane kavaga Oyem kajya Ambam. Yitabiriye andi masiganwa atandukanye yitwara neza asoreza umwaka kuri Tour du Rwanda yegukanyemo igihembo cy’umunsi wa kane anarangiza ari uwa kane muri rusange.

Yahise abona ikipe yabigize umwuga ya Dimension Data for Qhubeka yo muri Afurika y’Epfo iramugura ariko imushyira mu bakiri bato bayo. Byamufashije kumara hafi umwaka yitoreza mu Butaliyani anakina amasiganwa atandukanye i Burayi.

Yongeye kwibutsa Isi yose ko afite impano idasanzwe mu kunyonga igare ubwo yegukanaga igihembo cy’umunsi wa gatanu muri Giro d’Italia y’abatarengeje imyaka 23. Yitwaye neza mu yandi masiganwa mu Bufaransa no mu Butaliyani asoza umwaka wa 2017 yandikisha amateka yegukana Tour du Rwanda 2017, atangira uwa 2018 yegukana andi masiganwa akomeye muri Afurika.

Areruya Joseph yanditse amateka yo kwegukana La Tropicale Amissa Bongo 2018
Areruya Joseph yakiriwe i Kigali nk'intwari nyuma yo kwegukana isiganwa rikomeye muri Afurika, La Tropicale Amissa Bongo
Areruya Joseph (iburyo) yegukanye Tour de l'Espoir yabereye muri Cameroun. Aha ari kumwe na Mugisha Samuel ubwo begukanaga agace ka Gatatu
Areruya Joseph ahabwa amabwiriza n'Umutoza w'Ikipe y'Igihugu, Sterling Magnell mu gutangiza Shampiyona ya Afurika 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza