Areruya Joseph ku mwanya wa kabiri mu bakinnyi b’inkorokoro mu kunyonga igare muri Afurika

Yanditswe na IGIHE
Kuya 20 Ukuboza 2017 saa 05:17
Yasuwe :
1 0

Areruya Joseph yaje ku mwanya wa kabiri ku rutonde rw’abakinnyi beza mu mukino w’amagare muri Afurika mu mwaka wa 2017 mu bihembo bitangwa na “La Tropicale Amissa Bongo.”

Uyu mwaka wabereye Areruya uw’ihirwe kuko yegukanye Tour du Rwanda ya 2017, ndetse ku nshuro ye ya mbere yegukana agace mu isiganwa rya Giro Ciclistico d’Italia ry’abatarengeje imyaka 23 ryo muri Kamena 2017.

Ibi biri mu byatumye ashyirwa ku mwanya wa kabiri mu bakinnyi beza ku mugabane wa Afurika, akurikiye Louis Meintjes uyoboye urutonde rw’icumi ba mbere.

Umukinnyi mwiza mu gusiganwa ku magare muri Afurika yatowe n’akanama kayobowe n’Umufaransa wegukanye Tour de France inshuro eshanu, Bernard Hinault, abayobozi bakomeye mu mukino w’amagare, abatoza, abakinnyi b’Abanyafurika n’abanyamakuru bo muri Afurika n’i Burayi.

Abakinnyi 10 batangajwe kuri uyu wa 20 Ukuboza 2017 batowe muri 15 bari bashyizwe ahagaragara. Mu kubatoranya hibanzwe ku manota bagize mu marushanwa bitabiriye ku mugabane wa Afurika no hanze yawo n’uruhare rwabo mu kuzamura uyu mukino ku ruhando mpuzamahanga.

Areruya w’imyaka 21 ukomoka mu Karere ka Kayonza akaba akinira ikipe ya Dimension Data for Qubeka yo muri Afurika y’Epfo, iri mu zikomeye ku mugabane yaje ku mwanya wa kabiri.

Louis Meintjes ukinira UAE Team Emirates waje ku isonga yasoje ku mwanya wa munani muri Tour de France ya 2017, yegukanywe n’Umwongereza Chris Froome ukinira Team Sky.

Meintjes yahise aca agahigo ko kwegukana igihembo cy’umukinnyi mwiza w’umwaka muri Afurika inshuro ebyiri kuva mu 2012 gitangiye gutangwa.

Mu byishimo byinshi yagize ati ‘‘ Ni iby’agaciro gakomeye kuri njye. Nishimiye inkunga Abanyafurika banteye. Nizeye ko umwaka utaha nzakomeza kuzamura ibendera rya Afurika mu 2018.’’

Mu 2016, iki gihembo cyatwawe n’Umunya-Erythrée, Tesfom Okubamariam wari no muri Tour du Rwanda ya 2017. Mu 2015, watwawe na Natnael Berhane, waje ukurikira Louis Meintjes mu 2014; Mekseb Debesay mu 2013 na Daniel Teklehaimanot wawutwaye mu 2012.

Areruya Joseph ukinira Dimension Data for Qhubeka yegukanye Tour du Rwanda 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza