Byukusenge Patrick yegukanye umwanya wa gatatu muri Tour du Cameroun

Yanditswe na Eric Tony Ukurikiyimfura
Kuya 9 Kamena 2019 saa 05:34
Yasuwe :
0 0

Umunyarwanda Byukusenge Patrick yasoje isiganwa rizenguruka Cameroun ari ku mwanya wa gatatu, ni nyuma y’uko abaye uwa 13 asizwe umunota umwe n’amasegonda 17 mu gace ka munani ari nako gasoza isiganwa kakinwe kuri uyu wa 9 Kamena 2019.

Kuri iki Cyumweru abasiganwa bahagurutse ahitwa Bafia berekeza mu Murwa Mukuru wa Yaoundé ku ntera y’ibilometero 122.8.

Byukusenge Patrick yarushwaga amasegonda 20 gusa n’Umunya-Côte d’Ivoire, Isiaka Cissé ndetse byashobokaga ko yayakuramo iri rushanwa rikagaruka mu Rwanda nyuma y’uko Uwizeyimana Bonaventure aryegukanye mu mwaka ushize.

Muri aka gace ka nyuma, uwa mbere yabaye Umunya-Cameroun, Kamzong Clovis Bassolo wa SNH Vélo Club, wegukanye agace ka kabiri mu isiganwa ry’uyu mwaka nyuma yo gukoresha amasaha abiri, iminota 52 n’amasegonda 30.

Umunya-Bulgarie, Kinstantinov Radoslav wa Martigues SC-Payden &Rygel, wabaye uwa kane uyu munsi asizwe amasegonda ane, ni we watwaye iri rushanwa ry’uyu mwaka ryabaga ku nshuro ya 16 nyuma yo gukoresha amasaha 27, iminota icyenda n’amasegonda ane.

Uwa kabiri yabaye Isiaka Cissé wo muri Côte d’Ivoire warushijwe amasegonda 20 ku rutonde rusange mu gihe Byukusenge Patrick wabaye uwa gatatu, yarushijwe amasegonda 40 n’uwa mbere.

Uwizeyimana Bonaventure yasoje iri rushanwa ari ku mwanya wa 11 nyuma yo kurushwa iminota itanu n’amasegonda 46; Manizabayo Eric ‘Karadiyo’ wabaye uwa 17, asigwa iminota 10 n’amasegonda 10.

Mugisha Moïse yabaye uwa 19 arushwa iminota 13 n’amasegonda 29; Nzafashwanayo Jean Claude aba uwa 32 asizwe iminota 25 n’amasegonda 23, aho yakurikiwe na Ruberwa Jean Damascène amurusha isegonda rimwe.

Mugisha Moïse yatahanye umwambaro w’umukinnyi wazamutse imisozi kurusha abandi n’amanota 22 mu gihe Ikipe y’u Rwanda yabaye iya kabiri yitwaye neza mu icyenda yitabiriye iri siganwa riri ku rwego rwa 2.2, ni nyuma yo kurushwa na Maroc iminota ibiri n’amasegonda 14.

Umunya-Bulgarie, Kinstantinov Radoslav yegukanye Tour du Cameroun 219
Byukusenge Patrick (hagati) yabaye uwa gatatu muri iri siganwa, Mugisha Moïse (ubanza ibumoso) ahiga abandi mu kuzamuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza