Cycling Academy yo muri Israel yashimiye Polisi y’u Rwanda yayikijije abajura

Yanditswe na Jah d’eau Dukuze
Kuya 23 Ugushyingo 2016 saa 11:00
Yasuwe :
0 0

Umukinnyi w’ikipe ya Cycling Academy yo muri Israel, arashimira Polisi y’u Rwanda kuba yamufashije kubona ibikoresho yari yibwe, ubwo yasezeraga Kigali nyuma yo kwitabira Tour du Rwanda 2016.

Umwe mu bakinnyi b’iyi kipe Guillaume Bovin, wegukanye agace ka mbere ka Tour du Rwanda kavaga i Kigali kerekeza i Ngoma, yaje gutangaza ubuhamya bw’ibyamubayeho ku munsi we wa nyuma mu Rwanda, ubwo yarimo yitegura gufata indege yerekeza muri Israel hamwe na bagenzi be.

Uyu yagize ati “Nari ntwaye igare mu muhanda umwe wo muri Kigali ndimo ndasezera uyu mujyi mwiza nyuma y’icyumweru cya Tour du Rwanda. Ibyaje kuba, naje kwibwa ku manywa y’ihangu”.

“Aba bajura batazwi, baramfashe batangira kunsaka mu mwenda wange wa Cycling Academy bashakamo ibintu by’agaciro. Naratatse nshaka kwihagararaho biranga ahubwo bahita biruka baragenda. Aho hari abantu bareba”.

“Byarambabaje kuko telefoni batwaye yarimo amafoto meza. Natangiye kwibaza niba nyuma yo kwakirwa neza n’uyu mujyi bigiye kurangira mpakuye isura mbi. Gusa si ko byagenze kuko ikoranabuhanga n’aba polisi babiri bakuru baje kumfasha. Nabashimira”.

"Icyakurikiyeho ni uko abayibye bagiye ku mutekinisiye wa iPhone bakamusaba kuyibafungurira (unlock). Bimunaniye ababwira ko bashatse bafata amafaranga nyirayo ari kubaha bakayimugurisha. Barabyemeye maze baba ariwe (umutekinisiye) bohereza gukora iyo ‘deal’. Ntiyari azi ko ari umutego wa Polisi. Yahise atabwa muri yombi nanjye mbona telefone yanjye ikimeze uko bayijyanye. Ndashimira cyane abapolisi b’u Rwanda kubera aka kazi gakomeye (abajura babashaga kubakurikira bifashishije ikoranabuhanga rya ‘satellite iPhone tracking location’). Abapolisi barambwiye bati ‘twagombaga kugufasha nibura ugataha ubona ko u Rwanda ari rwiza uretse ibikorwa bya bacye babi.’"

Iyi kipe ya Cycling Academy itangaza ko mu minsi mike iri bube isinyishije umukinnyi w’umunyafurika bibaye byiza ukomoka mu Rwanda. Yageze i Kigali umunsi umwe mbere y’uko Tour du Rwanda itangira, hari tariki ya 12 Ugushyingo.

Abakinnyi bagize iyi kipe yo muri Israel bari kumwe n’abayobozi babo, basuye Urwibutso rwa Jenoside yakorewe Abatutsi rwa Kigali ku Gisozi, aho bavuye bahamije ko bagomba gufatanya n’u Rwanda kugira ngo amateka yabaye ku bihugu byabo byombi ntazongere ukundi.

Cycling Academy Team, ni ikipe ikina amarushanwa mpuzamahanga yashinzwe mu mwaka ushize wa 2015 ikaba ifite icyicaro muri Israel. Igitekerezo cyo gushinga iyi kipe cyaje mu Ugushyingo 2014, kizanywe n’ikipe yarimo abakinnyi kabuhariwe nka Peter Sagan, mu rwego rwo kuzamura abakiri bato cyane cyane bo muri Israel.

Polisi y’u Rwanda yashimiwe uruhare yagize muri iki gikorwa
Guillaume Boivin yari yegukanye agace ka mbere muri Tour du Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza