Eyob Metkel wubatse amateka muri Tour du Rwanda yatandukanye na Dimension Data

Yanditswe na IGIHE
Kuya 26 Ugushyingo 2017 saa 11:42
Yasuwe :
1 0

Umunya-Eritrea Eyob Metkel wubatse amateka muri Tour du Rwanda kuva yatangira kuyitabira mu 2012, iheruka akaba yaregukanyemo uduce tubiri n’umwanya wa kabiri inyuma ya Areruya Joseph bakinanaga mu ikipe ya kabiri ya Dimension Data, yamaze gutandukana nayo.

Eyob ni rimwe mu mazina akomeye cyane ndetse abakunzi b’umukino w’amagare mu Rwanda bibuka kubera uko yagiye yitwara muri Tour du Rwanda yitabiriye bwa mbere mu 2012 akegukana umwanya wa 19 ku rutonde rusange, agarutse ku nshuro ya kabiri mu 2013 yiyerekana neza yegukana umwanya wa gatatu , yegukanamo Etape ya Kigali-Huye ndetse aba uwa kabiri mu ya Kigali-Kirehe n’iya Rubavu-Kinigi.

Uyu musore mu 2016 yakinanye Tour du Rwanda n’Abanyarwanda babiri, Ndayisenga Valens na Bonavunture Uwizeyimana bakiniraga Dimension Data yegukanamo umwanya wa kabiri inyuma ya Ndayisenga.

Aba Banyarwanda bahise bava muri iyi kipe kubera ko bari bagejeje imyaka 23 kandi batabashije kwigaragaza ngo bazamurwe mu ikipe ya mbere ikina amasiganwa akomeye ku Isi (World Tours). Eyob we yasigaye mu ikipe ya kabiri ariko atangira kwitozanya n’ikipe ya mbere ikinamo ibihangange nka Mark Cavendish, Steve Cummings n’abandi.

Eyob yari afite icyizere ko ashobora kuba Umunya-Eritrea wa gatanu mu bakinnyi iyi kipe izakoresha umwaka utaha barimo Mekseb Debesay, Amanuel Ghebreigzabhier, Natnael Berhane na Merhawi Kudus ariko amahirwe ntiyamusekeye kuko atagaragaye mu bakinnyi bazamuwe mu ikipe ya mbere.

Nk’uko amahame y’iyi kipe abigena, umukinnyi utabashije kuzamurwa mu ikipe ya mbere kandi arengeje imyaka 23 ahita arekurwa akajya kwishakira indi kipe.

Nk’uko yabitangarije urubuga cyclingnews.com, uyu musore n’ubundi wigaragaje muri Tour du Rwanda 2017 akegukana umwanya wa kabiri agafasha Areruya kuyegukana, kuri ubu arimo gushaka indi kipe yazakinira.

Yagize ati “Nta masezerano mfite kugeza ubu ahari amakipe arimo kureba uko nitwara. Nibwo buzima bwo gutwara igare, ni ubuzima bugoye. Inzozi zanjye ni ugukina ku rwego rw’ababigize umwuga no kwitabira amasiganwa akomeye ku Isi, ndizera ko nzabona ikipe kandi umwaka utaha nkazaba nkomeye kurushaho.”

Ubwo Eyob Metkel yegukanye agace ka Kayonza-Kigali muri Tour du Rwanda 2017

Abanyarwanda bakina muri Dimension Data bo bite?

Kugeza ubu Abanyarwanda batanu nibo bamaze guca muri iyi kipe, barimo Areruya Joseph na Mugisha Samuel bayikiniraga kuva uyu mwaka watangira; Ndayisenga Valens na Uwizeyimana Bonavunture bayikiniye mu mwaka wa 2016 bagahita bayivamo ndetse na Adrien Niyonshuti ari nawe wenyine wabashije gukinira ikipe nkuru akaba yarayigiyemo mu 2009.

Ndayisenga na Uwizeyimana bakinnyemo umwaka umwe barasezererwa nyuma yo kutazamurwa mu ikipe ya mbere naho Niyoshuti w’imyaka 30 we yatandukanye nayo uyu mwaka ku mpamvu zitamenyekanye.

Mu kiganiro Areruya aherutse kugirana na IGIHE, yavuze ko we na Mugisha (basigayemo nk’Abanyarwanda) nabo amasezerano yabo yarangiye ariko bafite icyizere cyo kuzahabwa andi kuko bakiri bato kandi bitwaye neza.

Yagize ati “Tujyayo twasinye amasezerano y’umwaka umwe. Ubu nta yandi baraduha ariko bitewe n’uko twitwaye kandi tukaba tutarageza ku myaka 23 turizera ko bazaduha andi, ubwo tuzabimenya nyuma y’ibiruhuko turimo bizarangirana n’umwaka.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza