Gasore Hategeka yegukanye shampiyona ya 2017, Ndayisenga Valens asoza arira

Yanditswe na Manzi Rema Jules
Kuya 25 Kamena 2017 saa 09:42
Yasuwe :
0 0

Gasore Hategeka ukinira ikipe ya Nyabihu yegukanye shampiyona y’u Rwanda yo gusiganwa mu muhanda, kuri iki Cyumweru, akoresheje amasaha 4:59”54 ku ntera ya kilometero 187 anganya ibihe na Ndayisenga Valens wa Tirol yo muri Autriche wananiwe kwakira kudatwara iyi shampiyona akarira.

Abasiganwa bo mu cyiciro cy’abakuru n’abatarengeje imyaka 23 bahagurutse mu Mujyi wa Ngoma saa yine kuri iki Cyumweru bagera i Kigali ku marembo ya Stade Amahoro bazenguruka mu mihanda ya Nyarutarama-Kibagabaga-Kimirongo inshuro umunani bingana na kilometero 187 muri rusange.

Mu gutangira isiganwa, abakinnyi bavuye i Ngoma bacungana, ugerageje kugenda bagenzi be bo mu yandi makipe bakamugarura gusa bagiye kugera i Kayonza Uwizeye Jean Claude yabacitse abasiga nk’iminota ibiri ndetse na Hakizimana Camera na Gasore Hategeka bari imbere.

Aba bakomeje kugenda imbere barinda bagera i Kigali abandi batarabafata kuko uko Ndayisenga yageragezaga kubacika bahitaga bamugarura bituma bakomeza kugendera hamwe.

Mu kuzenguruka, Uwizeye wa Les Amis Sportif yaje gutobokesha bituma Gasore na Camera bakomeza kugenda imbere. Aba nabo baje gufatwa n’itsinda ryarimo Nsengimana Jean Bosco na Ndayisenga Valens bakomeza guhatana mu kuzenguruka mu gihe Niyonshuti Adrien we yari yamaze gusigara inyuma cyane kubera nawe yatobokesheje.

Ku nshuro ya munani ari nayo ya nyuma bagombaga kuzenguruka, bageze ku murongo bari kumwe ariko Gasore Hategeka wahoze akinira Benediction y’i Rubavu ubu akaba ari muri Nyabihu Cycling Club aza imbere ya Ndayisenga na Nsengimana, yegukana isiganwa.

Byatumye Ndayisenga wavuye ku mugabane w’u Burayi yifuza kwegukana iyi shampiyona kugira ngo bimwongerere amanota ndetse azajye anambara ibendera ry’igihugu mu masiganwa yose azakina uyu mwaka, ababara cyane kuko atabigezeho ndetse n’amarira aramanuka.

Aganira n’itangazamakuru yavuze ko yababajwe no kuba atageze ku ntego zari zamuzanye mu Rwanda kuko ikipe ye yari yamutumye uyu mwambaro gusa anashimira mugenzi we watsinze yemeje ko yakinnye neza kandi yabikoze abikwiriye.

Uyu musore ufite amateka yo kwegukana Tour du Rwanda ebyiri (2014 na 2016) yavuze ko gutsindwa byatewe n’ibibazo bagenzi be bo muri Les Amis Sportif bagize byo gutobokesha cyane.

Mu ngimbi, isiganwa ryegukanywe na Manizabayo Eric wanaryegukanye umwaka ushize naho mu bakobwa Ingabire Beatha wegukanye agace ko gusiganwa umuntu ku giti cye kuri uyu wa Gatandatu, yongera guhigika Girubuntu Jeanne d’Arc n’ako gusiganwa mu muhanda arakegukana.

Iri siganwa ryanabayemo impanuka ikomeye aho i Rwamagana imwe mu modoka zari mu irushanwa yagonganye n’umukinnyi wa Karongi witwa Mukundente arakomereka ariko ahita atabarwa n’imbangukiragukabara yo mu isiganwa nyuma yo guhabwa ubutabazi bw’ibanze ajyanwa ku bitaro bya Rwamagana aho yakomeje kwitabwaho.

Iyi shampiyona yateguwe itewe inkunga n’abaterankunga barimo Cogebanque imaze kumenyerwa muri uyu mukino ndetse n’uruganda rukora ibinyobwa bisembuye n’ibidasembuye rwa Skol.

Uko abasiganwa bakurikiranye:

Abakobwa:

-  Ingabire Beatha: 3:08”20
-  Nirere Xaverine: 3:09”15
-  Mushimiyimana Samantha: 3:09”15
-  Muhabwampundu Ester:3:11”01
-  Girubuntu Jeanne D’Arc: 3:11”02

Ingimbi:

-  Manizabayo Eric: 2:31”26
-  Mwumvaneza Eric: 2:32”04
-  Nkurunziza Yves: 2:32”04
-  Mugisha Albert: 2:32”43
-  Habimana Jean Eric: 2:32”52

Abakuru:

-  Gasore Hategeka: 4:59”54
-  Ndayisenga Valens: 4:59”54
-  Nsengimana Jean Bosco: 4:59”54
-  Ruberwa Jean Damascene: 4:59”54
-  Mfitumukiza Jean Claude: 4:59”54

Abakinnyi bageze i Remera ya Kayonza bakiri hamwe
Gasore yahawe ibihumbi 100 Frw n'ibindi bihembo
Ingabire Beatha wasize abandi mu bakobwa
Manizabayo Eric watsinze mu ngimbi
Ndayisenga mu marira menshi nyuma yo kutegukana iri rushanwa
Gasore Hategeka ageze ku murungo wo gusorezaho yishimira gutsinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza