Ibyitezwe kuri ‘etape’ Nyanza- Rubavu igiye gusiga amateka mashya muri Tour du Rwanda

Yanditswe na Manzi Rema Jules
Kuya 14 Ugushyingo 2017 saa 06:57
Yasuwe :
1 0

Nyuma y’agace ka mbere ka Tour du Rwanda 2017 kavaga i Kigali gasoreza i Huye, kuri uyu wa Kabiri abasiganwa barahaguruka i Nyanza berekeza i Rubavu mu gace ka kabiri kagiye gusiga amateka mashya yo kuba aribwo kabayeho kuva Tour du Rwanda yaba Mpuzamahanga mu 2009.

Kugeza ku munsi wa kabiri wa Tour du Rwanda, ni ibyishimo kuko abakinnyi b’Abanyarwanda bakomeje gutanga icyizere ko ibyo bakoze mu myaka itatu iheruka begukana iri siganwa bikurikiranya n’uyu mwaka bishoboka.

Ku Cyumweru muri Prologue mu myanya ine ya mbere, itatu yegukanywe n’Abayandarwanda, Nsengimana Jean Bosco, Ndayisenga Valens na Areruya Joseph. Ibirori byakomeje kuri uyu wa Mbere mu gace ka mbere ka Kigali-Huye kareshyaga na kilometero 120.3 nako kegukanwa n’Umunyarwanda, Areruya Joseph uzwi ku izina rya ‘Kimasa’.

Hatahiwe agace ka Nyanza – Rubavu, kareshya na kilometero 180 kagiye kuba aka mbere karekare mu mateka ya Tour du Rwanda kuva ibaye mpuzamahanga.

Ni agace karimo udusozi dutandatu dutandukanye, hakabamo ibice bitambika ndetse barenze ahitwa Sashwara mbere yo gusoza bazabanza kumanuka ahagera ku bilometero 20 basoreze ku kandi kazamuko kadakanganye bagera mu Mujyi wa Rubavu.

Mu kiganiro yagiranye na IGIHE, Hadi Janvier wahoze ari kapiteni w’ikipe y’igihugu ndetse akaba ari umwe mu bagira inama abakinnyi bakiri bato, yatangaje aho Tour du Rwanda 2017 igeze, Abanyarwanda bagaragaza imbaraga, yaba abakinira igihugu nka Nsengimana Jean Bosco na Byukusenge Patrick ndetse n’abakinira amakipe yo hanze.

Ku gace ko kuri uyu wa Kabiri kazanyura mu Turere twa Nyabihu na Rubavu, benshi mu bakinnyi bakomeye b’amagare niho bavuka harimo na Hadi ubwe, aho yagize ati “Ni umunsi mwiza kuko imihanda izakoreshwa ni iyo abakinnyi bacu bakunze kwitorezamo. Nk’uko babikoze uyu munsi bayobora kuva ku kilometero cya mbere kugera ku cya nyuma, ni nayo ntego ku munsi wa kabiri.”

Ku ruhande rw’u Rwanda, Hadi asanga abakinnyi bafite amahirwe yo kwitwara neza muri aka gace ari Areruya uzaba urwana ku mwambaro we w’umuhondo, Nsengimana Jean Bosco kugeza ubu wa kabiri ku rutonde rusange ndetse na Byukusenge Patrick ari nawe wabaye kapiteni wa Team Rwanda uyu mwaka.

Ibi ntibibuza ko Areruya Joseph we asanga afite igitutu gikomeye cyo kugumana umwanya wa mbere ahanini kubera bagenzi be bakinana muri Dimension Data asanga bashobora kutamukinira ahubwo bakarwana no kumuvana kuri uyu mwanya nk’uko yabitangaje nyuma yo gutsinda.

Yagize ati “Ejo biradusaba kugenzura isiganwa njye n’abakinnyi banjye ntihagire uducika kugira ngo tuzagere ku Gisenyi turi kumwe. Ikipe yanjye irakomeye biragoye kugira ngo dukuremo uyu mwenda w’umuhondo. Icyizere kiracyahari ku Banyarwanda. Kugeza ubu abakinnyi mbona bateye ubwoba bashobora no gutwara uyu mwenda ni Okubamariam Tesfom wa Eritrea, Eyob Metkel na De Bod Stefan ba Dimension Data.

Kugeza ubu ku rutonde rusange, Areruya yasize Nsengimana wa kabiri, umunota n’amasegonda 28 naho Ndayisenga Valens akaba ari uwa gatatu De Bod Stefan akaba uwa kane ari nawe munyamahanga uza hafi.

Areruya arahaguruka yerekeza i Rubavu yambaye umwenda w'umuhondo
Areruya Joseph yatsinze bagenzi be i Huye
Okbamariam Tesfom, umwe mu bakinnyi Areruya yemeza ko afitiye ubwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza