Kwamamaza

“Intego zanjye muri Tour du Rwanda nazigezeho nubwo hari ibyo gukosora ubutaha”

Yanditswe kuya 25-11-2016 saa 09:25' na Manzi Rema Jules


Areruya Joseph wabaye uwa Kane ku rutonde rusange muri Tour du Rwanda 2016 akanegukana agace kamwe mu munani twakimwe, yatangaje ko nubwo hari abakekaga ko ahanganye na Ndayisenga Valens atari ko byari bimeze, ahubwo ngo intego ye yari ukubona umunyarwanda ayegukana indirimbo y’igihugu ikaririmbwa kandi ngo byagezweho.

Mbere ya Tour du Rwanda, IGIHE yari yasuye abakinnyi aho bari mu mwiherero i Musanze, Areruya Joseph ari mu bakinnyi bari batangaje ko bifuza kwegukana iri rushanwa kuko umwaka ushize yari yasoje ari uwa kabiri inyuma ya Nsengimana Jean Bosco wayegukanye.

Gusa si ko byamugendekeye kuko iri siganwa ryabaye kuva tariki 13 rigasoza kuri 20 Ugushyingo 2016, ryaje kwegukanwa n’Umunyarwanda Ndayisenga Valens ukinira Dimension Data yo muri Afurika y’Epfo.

Mu kiganiro na IGIHE, uyu musore uvuka i Rwamagana agakinira Les Amis Sportif yo muri ako karere, yatangaje ko nubwo yifuzaga kwegukana Tour du Rwanda kandi anabifitiye ubushobozi, ngo yagize ikibazo cy’ikipe ye itari iri ku rwego rw’andi bari bahanganye ariko ikiruta byose yifuzaga ngo ni uko yari gutwarwa n’Umunyarwanda kandi yabigezeho.

Ati “Urabona ba Valens na Bosco mu myaka yashize bagize amahirwe kuko twese twakinaga nka Team Rwanda tutitaye ku makipe twarimo.”

Yakomeje agira ati “Bitandukanye n’ubu , hari aho twageraga tugakorana ariko ikindi gihe tugahigana. Gusa ku bwanjye nkimara kubona ko bagenzi banjye bigoye ko twahangana tugafata umwenda w’umuhondo kandi tukawugumana, sinagize ikibazo cyane kuko wari ufitwe na Valens kandi ku bwanjye sinifuzaga kubona wambarwa n’umunyamahanga; niyo mpamvu ntari kujya kwataka Valens.”

“Intego zanjye muri Tour du Rwanda nazigezeho, hari ibyo gukosora ubutaha nitwongera gukina nka Les Amis Sportif, ariko ndizera ko icyo gihe abakinnyi bacu bazaba bakomeye kurusha uko bari bameze ubu. Nishimiye cyane kubona indirimbo y’igihugu iririmbwa, ibendera rikazamurwa.”

Areruya w’imyaka 20 wegukanye agace ka kane kavaga i Rusizi kajya i Huye, kareshyaga na kirometero 140.7, avuga ko akurikije uko yitwaye muri Tour du Rwanda uyu mwaka n’iy’umwaka ushize, abona nawe igihe kigeze ngo abe yashaka ikipe yo hanze akajya gukina nk’uwabigize umwuga.

Ati “Inzozi zanjye ni ugufasha abana bakiri bato by’umwihariko b’i Rwamagana ariko n’ahandi kugira ngo u Rwanda rube nka za Eritrea usanga zifite abakinnyi barenga magana tanu. Ikindi ndifuza kujya gukina hanze kandi Imana nibishaka, umwaka utaha birashoboka kuko hari amakipe yagaragaje ko anshaka ariko sinabivugaho bitararangira.”

Areruya witabiriye shampiyona y’Isi mu batarengeje imyaka 23 muri Qatar mu kwezi gushize, mu gusiganwa umuntu ku giti cye (individual time trial) agasoza ari uwa 57, mu gusiganwa mu muhanda (road race) akaza ari uwa 98 mu basaga 200 bakinaga, yanavuze ko mu gihe amaze akinana na Ndayisenga Valens ikintu yabonye amurusha kandi agomba kumwigiraho ari ugutekereza vuba, kandi ibyo atekereje agahita abikora kandi neza.

Muri Tour du Rwanda 2016, Areruya yasoje ku mwanya wa kane, inyuma ya Ndayisenga Valens wayegukanye amurusha iminota 2:52.

Avuga ko nubwo atatwaye Tour du Rwanda, inzozi ze yazigezeho
Areruya (uzamuye ukuboko) muri Tour du Rwanda 2016 yegukanye agace ka Rusizi-Huye
Areruya (wambaye umuhondo) avuga ko hari byinshi agomba kwigira kuri Valens kugira ngo ubutaha nawe azitware neza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved