Kwamamaza

Inzozi za Mugisha Samuel wanditse amateka muri Tour du Rwanda 2016

Yanditswe kuya 21-11-2016 saa 15:28' na Manzi Rema Jules


Nyuma yo kwitwara neza ku nshuro ya mbere yari ahawe amahirwe yo kwitabira Tour du Rwanda akegukana igihembo cy’umukinnyi uzamuka imisozi kurusha abandi, Mugisha Samuel amaso ayahanze Tour du Rwanda itaha aho uretse gushaka ibihembo bitandukanye ngo intego ari ukwambara umwenda w’umuhondo uhabwa uwayegukanye.

Mugisha Samuel uzuzuza imyaka 19 tariki 5 Ukuboza 2016, muri Tour du Rwanda yakoze amateka atari yagakozwe n’undi mukinnyi mu myaka umunani ishize iri siganwa ribaye mpuzamahanga, aba uwa mbere ubashije kwegukana igihembo cy’umukinnyi uzamuka imisozi kurusha abandi akiri muto.

Uyu mukinnyi wa Benediction y’i Rubavu wigaragaje cyane mu gace ka kabiri ka Tour du Rwanda bava i Kigali bajya i Karongi cyane cyane mu kuzamuka imisozi, akabisubiramo bava i Karongi bajya Rusizi aho yamaze hafi amasaha abiri n’igice ayoboye abandi yatangaje ko ibi byamuhaye icyizere binamwereka ko ashyizemo imbaraga byose bishoboka.

Ati “Njyewe numvaga ko bidashoboka,ndishimye cyane. Birampa icyizere cy’ejo hazaza ko nanjye nshobora kuzaba umukinnyi ukomeye.”

Ku byemezo uyu mukinnyi yagendaga afata byo gucika abandi akagenda imbere rimwe na rimwe bakamufata hasigaye ibirometero bike ngo yegukane agace (etape), Mugisha avuga ko yabaga ashaka kureba ko hari umukirikira, yagenda akabona ntawe umugaruye agakoresha imbaraga nyinshi ngo yegukane agace ariko bikanga.

Ati “Numvaga ko byose bishoboka, nkagerageza nkagenda. Rimwe na rimwe hakaba ubwo numva ko nshobora no gutsinda etape ariko ntabwo byaje kunkundira. Gusa uko nitwaye biranyereka ko ubutaha nzitwara neza kurushaho ndetse nkaba nakwegukana na Tour du Rwanda ngendeye ku nama za bakuru banjye.”

Mugisha wari ugaragaye muri Tour du Rwanda ku nshuro ya mbere, uyu mwaka yakinnye amasiganwa atandukanye arimo Grand Prix Chantal Biya aho yatahanye umwanya wa gatatu mu bazamuka imisozi kurusha abandi, Tour International de Constantine, Tour International de Setif yabaye uwa gatandatu mu bakinnyi beza bakiri bato n’andi atandukanye yagiye anitwaramo neza.

Kwitwara neza uyu mwaka byatumye arota kuzegukana Tour du Rwanda akagera ikirenge mu cya Ndayisenga Valens
Mugisha Samuel (imbere) yahembwe nk'umukinnyi uzamuka imisozi kurusha abandi muri Tour du Rwanda 2016
Mugisha Samuel (imbere) yigaragaje cyane muri Tour du Rwanda 2016

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved