Kwamamaza

Ishusho ya Tour du Rwanda 2016 mu mboni ya Bayingana Aimable uyobora Ferwacy

Yanditswe kuya 21-11-2016 saa 11:21' na Manzi Rema Jules


Umuyobozi w’Ishyirahamwe ry’umukino w’Amagare mu Rwanda (Ferwacy) Bayingana Aimable mu byishimo byinshi nyuma y’uko Umunyarwanda Ndayisenga Valens ukinira ikipe ya Dimension Data yo muri Afurika y’Epfo yegukanye Tour du Rwanda 2016, yatangaje ko uyu mwaka iri siganwa ryagaragaje urwego rwiza n’icyerekezo uyu mukino ufite mu Rwanda.

Ku nshuro ya munani isiganwa rizenguruka u Rwanda ku magare ribaye mpuzamahanga, irya 2016 ryegukanywe n’Umunyarwanda Ndayisenga Valens w’imyaka 22 ukinira ikipe y’ababigize umwuga ya Dimension Data muri Afurika y’Epfo.

Ni amateka akozwe bwa mbere kuva 2009 aho umukinnyi umwe yegukana Tour du Rwanda inshuro ebyiri kuko uyu yari yabikoze no muri 2014 akinira Team Kalisimbi, imwe muri eshatu zari zihagarariye u Rwanda.

Kuri iki Cyumweru tariki 20 Ugushyingo nibwo hasozwaga Tour du Rwanda 2016 yari imaze iminsi umunani izenguruka igihugu cyose, ikaba yari yitabiriwe n’abakinnyi 74 isozwa na 56.

Perezida wa Ferwacy, Bayingana Aimable, yatangaje ko uretse kuba iri siganwa ryegukanywe n’Umunyarwanda ku nshuro ya gatatu ryikurikiranya, ngo uyu mwaka yashimishijwe bikomeye n’abana bakiri bato bakinnye isiganwa ryo kuri uru rwego bigaragaje mu makipe yari ahagarariye igihugu.

Ati “Ikintu cyanshimishije cyane uyu mwaka ni ukubona mu makipe yacu uko ari atatu harimo abakinnyi batandatu bakinnye Tour du Rwanda bwa mbere kandi bose urebye uko bakinnye ntabwo bigeze bakuraho (bananirwa ngo bikure mu isiganwa).”

“Barakinnye bamwe barigaragaza nka ba Mugisha Samuel, na ba Alex Nizeyimana, n’abavuyemo ni ukubera impanuka cyangwa uburwayi. Ndagira ngo mbabwire ko Tour du Rwanda y’uyu mwaka yatweretse ko ejo hazaza h’umukino w’amagare mu Rwanda ari heza.”

Abafana bari benshi mu nzira zose

Kuri Bayingana kandi ngo uyu niwo mwaka wa mbere Tour du Rwanda yitabiriwe n’abafana benshi cyane ku buryo bigaragaza ko umukino urimo gukura ndetse urimo kurushaho gukundwa cyane.

Ati “Kuba Tour du Rwanda yaritabiriwe ku rwego nk’uru biragaragaza ko Abanyarwanda bakeneye imyidagaduro, birashimishije kubona uko bari benshi kandi bafana, biradusaba gukomeza tukayitegura neza kandi ikajya iza buri mwaka ari nziza kurushaho.”

Ibibazo twahuye nabyo n’impanuka zabaye byose ni “Ubunararibonye”

Muri Tour du Rwanda y’uyu mwaka hagiye habamo impanuka zitandukanye zirimo iyabereye i Musanze ku gace ka gatanu ubwo umufana yashakaga gufotora abakinnyi na telefoni ye bigatuma abakinnyi barimo Mugisha Samuel na Biziyaremye Joseph bagwa ndetse Biziyaremye ntasubire mu irushanwa ubu akaba ari kwa muganga.

Ibi n’ibindi byose bitagenze neza, Bayingana Aimable avuga ko biri mu bizibandwaho mu gihe cyo gutegura Tour du Rwanda zitaha, kuko byaberetse ibikeneye gukosorwa haba mu kubungabunga umutekano w’abakinnyi no gutegura isiganwa riryohera buri wese.

Ati “Nta kintu gikomeye twahuye nacyo, ngira ngo n’ibibazo bimwe na bimwe by’impanuka byabaye byose ni ubunararibonye ko abantu bakunda amagare. Ni ukuvuga ngo ubutaha tuzashyiramo imbaraga nyinshi kugira ngo bayarebe kandi bayarebe neza.”

Umwihariko w’uyu mwaka wabaye abafana uruvunganzoka

Aimable Bayingana yanavuze ko kuri we 2016 isize isura yihariye ku ruhande rw’abafana kuko uko umwaka uje undi ugataha bagenda biyongera ariko ngo nawe yatunguwe n’abantu bari ku mihanda yose aho amagare yanyuze mu bice bitandukanye by’igihugu, hakaba n’abataratinyaga imvura yabanyagiraga, ibi byose bikaba bigaragaza akazi gakomeye kakozwe n’ubwo inzira ikiri ndende.

Bayingana yatangaje ko ubwinshi bw'abafana ari umwe mu myihariko y'iyi Tour du Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved