Isiaka Cissé yegukanye agace ka gatatu ka Tour du Cameroun, Uwizeyimana Bonaventure aba uwa karindwi

Yanditswe na Eric Tony Ukurikiyimfura
Kuya 4 Kamena 2019 saa 07:43
Yasuwe :
0 0

Umunya-Côte d’Ivoire, Isiaka Cissé, ni we wegukanye agace ka gatatu k’isiganwa rizenguruka Cameroun mu gihe umunyarwanda waje hafi ari Uwizeyimana Bonaventure wabaye uwa karindwi ndetse akomeje kuza mu myanya y’imbere ku rutonde rusange.

Kuri uyu wa Mbere nibwo abasiganwa bakinnye agace ka gatatu, bahaguruka mu murwa mukuru Yaoundé, berekeza muri Ebolowa, ku ntera y’ibilometero 157,9. Umunya-Côte d’Ivoire Isiaka Cissé yabaye uwa mbere nyuma yo gukoresha amasaha atatu iminota 59 n’amasegonda 51.

Umunya-Cameroun, Kamzong Clovis ukinira SNH Vélo Club, yabaye uwa kabiri nyuma yo gusigwa isegonda rimwe na Isiaka Cissé mu gihe uwa gatatu yabaye umuholandi Stephan Bakker wa Global Cycling Team wasizwe amasegonda atanu.

Uwizeyimana Bonaventure wabaye uwa karindwi, Byukusenge Patrick wabaye uwa cyenda na Nzafashwanayo Jean Claude wabaye uwa 11, bose basizwe amasegonda atanu na Isiaka Cissé wabaye uwa mbere.

Mugisha Moïse na Manizabayo Eric bombi bakurikiranye ku mwanya wa 22 n’uwa 23, basizwe amasegonda umunani n’uwa mbere mu gihe Ruberwa Jean yabaye uwa 42 nyuma yo kurushwa iminota ibiri n’amasegonda 58, aho isiganwa ryasojwe n’abakinnyi 47.

Umunya-Côte d’Ivoire, Isiaka Cissé, yahise anayobora urutonde rusange nyuma y’uduce dutatu tumaze gukinwa, aho yambaye umwenda w’umuhondo nyuma yo gukoresha amasaha 10, iminota 46 n’amasegonda abiri. Uwa kabiri ni umunya-Cameroun Kamzong Clovis Abossolo banganya ibihe mu gihe ku mwanya wa gatatu hari Radoslav Konstantinov wo muri Bulgarie, urushwa amasegonda icyenda n’uwa mbere.

Uwizeyimana Bonaventure ufite Tour du Cameroun y’umwaka ushize, ari ku mwanya wa gatandatu, arushwa amasegonda 18 n’uwa mbere, Byukusenge Patrick ni uwa 16 arushwa umunota umwe n’amasegonda ane mu gihe Nzafashwanayo Jean Claude na Manizabayo Eric ‘Karadiyo’ bari ku mwanya wa 23 n’uwa 24, basigwa hafi iminota umunani n’amasegonda 20.

Uwizeyimana Bonaventure na Ruberwa Jean Damascène bayoboye urutonde rw’abakinnyi barusha abandi kuzamuka n’amanota atandatu mu gihe Mugisha Moïse afite amanota atanu anganya na Medrazi Mohammed wo muri Maroc.

Tour du Cameroun irakomeza kuri uyu wa Kabiri, aho hakinwa agace kayo ka kane. Abasiganwa barahaguruka i Pouma, basoreze i Kribi, basiganwa intera y’ibilometero 155.8.

Umunya-Côte d’Ivoire, Isiaka Cissé yegukanye agace ka gatatu, ahita yambara n'umwenda w'umuhondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza