Minisitiri Uwacu yasabye abakinnyi ba “Tour du Rwanda 2016” kuzakorera hamwe

Yanditswe na Ishimwe Israel
Kuya 10 Ugushyingo 2016 saa 07:27
Yasuwe :
0 0

Minisitiri w’Umuco na Siporo, Uwacu Julienne yasuye abakinnyi bazahagararira igihugu muri Tour du Rwanda 2016 aho bari mu mwiherero i Musanze abizeza ko Abanyarwanda bose babashyigikiye ndetse ababwira ko imodoka yo gutwara amagare bemerewe na Perezida Paul Kagame bazayishyikirizwa bitarenze ukwezi.

Abakinnyi 15 bazahagararira u Rwanda muri Tour du Rwanda 2016 bari kumwe na batatu b’Abanyarwanda bakina hanze, bamaze iminsi mu mwiherero mu kigo cy’imyitozo “Africa Rising Cycling Center” kiri mu karere ka Musanze bitegura umunsi ku munsi banakurikiranwa n’abatoza barimo Jonathan "Jacques" Boyer na Sterling Magnell.

Kuri uyu wa Kane tariki 10 Ugushyingo 2016, Minisitiri w’Umuco na Siporo, Uwacu Julienne yabasuye aganira nabo ku bijyanye n’imyiteguro bakoze, abasaba ko bazakorera hamwe nk’uko byabaranze mu marushanwa yabanje bakanitwara neza.

Ati “Turabasaba gukoresha ubuhanga bwanyu mugatsinda kandi mu buryo busukuye. Uburyo mwitwaye mu marushanwa yose mwakinnye no mu myitozo mwakoze biratanga icyizere. Aho muzasiganwa ni iwacu kandi muhitoreza buri munsi. Imyitozo mwarayibonye, imibereho imeze neza kandi n’ibikoresho murabifite. Muzirikane ko mwese muri abakinnyi b’u Rwanda kandi Abanyarwanda bose babari inyuma. Ubuhanga murabufite icyo musabwa ni ugukorera hamwe kandi turabizeza ko igihugu kizakomeza kubaba hafi.”

Minisitiri Uwacu yakomeje avuga ko “Imodoka Perezida wa Repubulika yabemereye yo gutwara amagare iri mu nzira ndetse mu gihe kitarenze ukwezi izaba ibagezeho.”

Nathan Byukusenge umaze kwitabira Tour du Rwanda zose kuva 2009 yaba mpuzamahanga, kuri iyi nshuro akazaba ayoboye Team Rwanda yijeje Minisitiri Uwacu ko iri rushanwa rizongera rigasigara mu Rwanda anamuha ubutumwa bwo gushimira Umukuru w’Igihugu.

Ati “Tuzi neza ko igihugu kituri inyuma, dufite icyizere ko Tour du Rwanda tuzayitwara kuko ibisabwa byose turabifite yaba ibikoresho, imyitozo twarayibonye n’ikinyabupfura. Turasaba Abanyarwanda bose kuzatuba inyuma nkuko bisanzwe.”

“Turashimira Perezida wa Repubulika ku byo amaze kugeza ku Rwanda muri rusange no ku banyamagare by’umwihariko, natwe tumuri inyuma.”

Minisitiri Uwacu yasuye aba bakinnyi aherekejwe na Guverineri w’Intara y’Amajyaruguru, Musabyimana Jean Claude, Umuyobozi ukuriye Ingabo mu Turere twa Musanze, Gakenke na Rulindo, Col. Baguma S. na Perezida wa FERWACY, Aimable Bayingana.

Biteganyijwe ko aba bakinnyi bazava i Musanze muri iki kigo kuri uyu wa Gatanu baza i Kigali aho bazahagurukira ku Cyumweru tariki ya 13 batangira isiganwa rizarangira tariki 20 Ugushyingo 2016.

Minisitiri w'Umuco na Siporo, Uwacu Julienne yasabye abakinnyi gukorera hamwe bakongera gutwara Tour du Rwanda
Abakinnyi ba Team Rwanda n'Umutoza wabo, Sterling (uwa gatanu uturutse iburyo) bahabwa impanuro n'abayobozi
Perezida wa Ferwacy, Bayingana Aimable (uhagaze) asobanura uko imyiteguro yagenze n'icyizere bafite cyo kwisubiza iri rushanwa
Nathan Byukusenge yashimangiye ko biteguye neza Tour du Rwanda
Minisitiri Uwacu yeretswe imyenda abakinnyi bazaba bambaye
Abayobozi beretswe amagare abakinnyi bazakoresha muri Tour du Rwanda 2016
Nyuma yo kungurana ibitekerezo bafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244