Shampiyona y’Amagare iratangira mu mpera z’icyumweru hakinwa uduce tubiri

Yanditswe na Eric Tony Ukurikiyimfura
Kuya 18 Kamena 2019 saa 10:13
Yasuwe :
0 0

Shampiyona y’u Rwanda mu mukino w’amagare izwi nka Rwanda Cycling Cup iratangira mu mpera z’iki cyumweru, aho ku nshuro yayo ya gatanu izatangira hakinwa uduce tubiri.

Ubusanzwe aya marushanwa azenguruka u Rwanda umwaka wose, amaze kuba inshuro enye, yatangiraga mu mpera za Werurwe cyangwa mu ntangiriro za Mata, ariko uyu mwaka yatinze gutangira kubera ko u Rwanda rwateguye Tour du Rwanda ya 2019 yabaye muri Werurwe.

Aya masiganwa azatangira ku wa Gatandatu, aho abakinnyi bazasiganwa ku giti cyabo (Individual Time Trial) mu gihe ku Cyumweru hazaba isiganwa ryo mu muhanda (Road Race).

Ku wa Gatandatu, isiganwa rizabera i Nyamata, aho abagore n’ingimbi bazasiganwa ku ntera y’ibilometero 25 mu mihanda ya Nyamata-Mbyo-Nyamata naho abagabo bakore ibilometero 41 mu mihanda ya Nyamata-Ramiro-Nyamata.

Ku Cyumweru ubwo bazaba basiganwa mu muhanda, icyiciro cy’abagore n’icy’ingimbi, bizasiganwa ku ntera y’ibilometero 105.4 mu muhanda wa Stade Amahoro-Prince House-Sonatube-Nyanza ya Kicukiro-Nyamata-Ramiro-Nyamata-Kicukiro-Sonatube-Chez Lando-Stade Amahoro.

Icyiciro cy’abagabo bakuru n’abatarengeje imyaka 23 bo bazasiganwa intera y’ibilometero 159.3. Aba bakinnyi bazakora urugendo rungana n’urwo barumuna na bashiki babo bazaba bakoze ariko bongereho kuzenguruka i Remera inshuro eshatu intera y’ibilometero 12.5 mu muhanda wa Stade Amahoro-Kimironko- Ku bitaro bya Kibagabaga- MTN- RDB- Airtel- Stade Amahoro.

Abaterankunga b’aya marushanwa baracyari COGEBANQUE na SKOL mu gihe amakipe icyenda azarikina ari Skol Fly Cycling Club, Cycling Club For All, Muhazi Cycling Generation, Kigali Cycling Club, Kayonza Young Stars Cyling Team, Les Amis Sportifs, Benediction Club, Karongi Vision Sports Center na Nyabihu Cycling Team.

Aya masiganwa yo mu mpera z’icyumweru akaba yitezwemo Mugisha Samuel ukinira Dimension Data for Qubeka yo muri Afurika y’Epfo na Areruya Joseph wa Delko Marseille mu Bufaransa, abo bombi bamaze kugaruka mu Rwanda mu biruhuko.

Cycling Cup ni amarushanwa ngarukamwaka ategurwa n’Ishyirahamwe ry’Umukino w’Amagare mu Rwanda, FERWACY, kuva mu 2015. Yashyizweho mu rwego rwo kongerera imyitozo n’ubunararibonye abakinnyi by’umwihariko abadakina mu Ikipe y’igihugu batitabira amasiganwa menshi mpuzamahanga.

Rwanda Cyling Cup ya 2018 yatangiye muri Werurwe, yegukanwe na Gasore Hategeka wa Nyabihu Cycling Club mu Ukuboza 2018, uyu akaba yaranatwaye iya 2016.

Rwanda Cycling Cup 2019 iratangira mu mpera z'iki cyumweru hakinwa uduce tubiri
Mugisha Samuel ukina muri Dimension Data muri Afurika y'Epfo na Areruya ukinira Delko Marseille mu Bufaransa bombi bari mu biruhuko mu Rwanda, aho bitezwe muri aya masiganwa yombi
Gasore Hategeka umaze kwegukana Rwanda Cycling Cup inshuro ebyiri, ni we ufite iy'umwaka ushize wa 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza