Skol Fly Cyling Club yongeye gutegura irushanwa ryo gushaka abana bafite impano mu kunyonga igare

Yanditswe na Eric Tony Ukurikiyimfura
Kuya 17 Gicurasi 2019 saa 02:28
Yasuwe :
0 0

Ikipe y’umukino wo gusiganwa ku magare, Skol Fly Cyling Club, yateguye irushanwa ry’umunsi umwe rizaba ku Cyumweru tariki ya 19 Gicurasi 2019, rikabera mu cyanya cyahariwe inganda giherereye i i Masoro mu Karere ka Gasabo.

Iri rushanwa riteye nk’irindi ryabaye muri Werurwe uyu mwaka, rigamije gushaka abana bari munsi y’imyaka 17 bafite impano n’ubushake mu gutwara amagare kugira ngo bafashwe kuvamo abakinnyi babigize umwuga.

Mu irushanwa ryabaye tariki 31 Werurwe, Skol Fly Cycling Club yatoranyije abakinnyi batatu ba mbere bigaragaje uwo munsi.

Abazasiganwa bazakoresha amagare asanzwe (Pneu ballon) kugira ngo horoherezwe abatabasha kubona amagare yabugenewe.

Perezida wa Skol Fly Cycling Club, Ntembe Jean Bosco yabwiye IGIHE ko iri siganwa rimeze nk’iryabaye muri Werurwe ndetse rizajya riba buri kwezi, rikitabirwa n’andi makipe asanzwe akina umukino w’amagare mu Rwanda.

Ati “ Rimeze nk’iryo twakoze mu kwa Gatatu. Skol Fly Cycling Club yateguye iki gikorwa kugira ngo irebe abafite impano mu bakiri bato batarengeje imyaka 17. Turashaka ko rizajya riba buri kwezi n’ubwo mu kwa Kane ritabaye bitewe na gahunda zo kwibuka zari zihari.”

IGIHE yamubajije niba abana bose bazajya bagaragaza impano bazajya bafatwa na Skol Fly Cycling Club, asubiza ko n’andi makipe yo mu Rwanda azajya ahakura abakinnyi kuko iri rushanwa ari iryo gushakira impano igihugu cyose.

Ku bijyanye n’abakinnyi iyi kipe yafashe muri Werurwe, Ntembe Jean Bosco yavuze ko bakomeje kubamenyereza igare rya siporo kuko bari bamenyereye amagare asanzwe.

Ati” Ubushize twafashe batatu. Umwe (Bizimana Théogène) ameze neza cyane, yaranakinnye muri Tour de Huye. Abandi bo turacyabigisha gutwara igare rya siporo ntabwo baragera ku rwego rwo gukora amarushanwa. Dukeneye abakinnyi ariko hari na bagenzi bacu bo mu yandi makipe nabo bazajya bafata abakinnyi kuko ni uburyo bwo kuzamura impano muri rusange ku rwego rw’igihugu.”

Ntembe yasabye ababyeyi bafite abana bashoboye gutwara igare kubafasha kwiyandikisha mu bazasiganwa.

Kwiyandikisha muri iri rushanwa biri gukorerwa ku cyicaro cya Ferwacy i Remera kuri Stade Amahoro, kuva kuri uyu wa Gatanu tariki ya 17 Gicurasi.

Uretse aba bana bari munsi y’imyaka 17, n’abasanzwe bakina umukino wo gusiganwa ku magare bashyiriweho ibyiciro byabo (Seniors & Juniors) hagendewe ku myaka, aho 20 bazaza imbere y’abandi bazahabwa ibihembo birimo n’amafaranga ari hagati ya 5000 Frw na 50 000 Frw.

Abakinnyi bashobora kwiyandikisha ku giti cyabo bitwaje indangamuntu, ikarita y’ishuri cyangwa ikarita ya mutuelle de Santé, cyangwa ikipe ikandikisha abakinnyi bayo.

Uwiyandikisha yishyura amafaranga 1,000, akazayasubizwa asubije nimero yo gusiganwa yahawe.

Abari munsi y’imyaka 18 bagomba kuza bitwaje uruhushya rutangwa na Ferwacy ndetse n’urwandiko rusinyweho n’umubyeyi we, cyangwa umubyeyi agaherekeza umwana we.

Muri iri rushanwa, amagare akoreshwa na moteri, aya azwi nka velo moteri ntiyemewe mu gihe buri wese agomba kuza yitwaje akarindamutwe (casque), yemewe na Ferwacy ku munsi w’irushanwa kandi akazakinisha igare rye.

Ubwo Skol Fly Cycling Club yateguraga isiganwa nk’iri muri Werurwe, mu cyiciro cy’abakuru, ryegukanywe na Manizabayo Eric ‘Karadiyo’ wa Benediction Excel Energy’ kuri ubu iri kubarizwa muri Tour de Limpopo muri Afurika y’Epfo.

Irushanwa rigamije gushaka abana bari munsi y’imyaka 17 bafite impano n’ubushake mu gutwara amagare kugira ngo bafashwe kuvamo abakinnyi babigize umwuga.
Bizimana Théogène wabaye uwa mbere mu gukoresha amagare asanzwe mu irushanwa riheruka kuri ubu ari gukora amarushanwa akoresha igare rya siporo
Bizimana Théogène muri Tour de Huye
Karadiyo yegukanye isiganwa riheruka gutegurwa na Skol Fly Cycling Club
Abaje mu myanya itatu ya mbere muri buri cyiciro mu irushanwa riheruka barahembwe

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza