Team Rwanda igiye kwitabira ‘Tour du Cameroun’ yari yasubitswe

Yanditswe na Manzi Rema Jules
Kuya 23 Gicurasi 2018 saa 05:39
Yasuwe :
0 0

Ikipe y’igihugu y’umukino wo gusiganwa ku magare igiye kongera kwitabira Isiganwa Mpuzamahanga rizenguruka Cameroun yari yagiyemo muri Werurwe 2018 rigasubikwa mbere y’amasaha make ngo ritangire.

Iri siganwa ryagombaga kuba ku wa 10-18 Werurwe 2018 ryasubitswe habura amasaha make ngo ritangire kubera ikibazo cy’amikoro, amakipe arimo n’iy’u Rwanda yahageze, biteganyijwe ko rizasubukurwa ku wa 26 Gicurasi kugera kuri 3 Kamena 2018.

Ikipe y’u Rwanda igizwe n’abakinnyi batandatu bayobowe na Hadi Janvier igomba guhaguruka i Kigali kuri uyu wa Kane saa 8h20 yerekeze i Douala, iri kumwe n’umutoza Sempoma Felix; Umukanish Karasira Theoneste n’umuganga Kayinamura Patrick.

Umunyamabanga Uhoraho mu Ishyirahamwe ry’umukino w’amagare mu Rwanda, Murenzi Emmanuel, yatangarije IGIHE ko bitewe n’uko ubushize ryasubitswe ku munota wa nyuma ikipe yamaze no kugera muri Cameroun, byatumye iki gihugu cyiyemeza kuzishyura ibikenewe byose harimo n’amatike y’indege kugira ngo isubireyo.

Yagize ati “Ubundi mu marushanwa nk’aya ikipe yiyishyurira amatike y’indege gusa noneho yahagera abateguye irushanwa bagatanga ibindi bikenewe byose. Gusa kuko ubushize twari twagiye twiyishyuriye ubu Cameroun yatwishyuye ya matike yacu, bazadutegera n’indege.”

Iri siganwa riri ku rwego rwa 2.2 ku bipimo by’Ishyirahamwe ry’Umukino wo gusiganwa ku magare ku Isi (UCI) kimwe na Tour du Rwanda, rigiye kuba ku nshuro ya 14; ryatumiwemo amakipe atandatu yo muri Afurika harimo iy’igihugu ya Cameroun, SNH vélo club, Côte d’Ivoire, u Rwanda, Gabon na Congo Brazzaville.

Izi ziziyongeraho enye z’i Burayi zirimo Martigues Sport Cycling na Club de la Défense (zo mu Bufaransa), Global Cycling ( U Buholandi) na Dukla Banska Bystrica(Slovaquie), zikazamara iminsi umunani zihangana mu guterera imisozi no kuyimanuka mu bice bitandukanye bya Cameroun.

Abakinnyi batandatu bazaserukira u Rwanda ni Hadi Janvier, Munyaneza Didier, Nsengimana Jean Bosco, Byukusenge Patrick, Ukiniwabo Rene Jean Paul na Uwizeyimana Bonaventure.

Uduce bazakina muri iri siganwa n’uko tuzakurikiranwa

Ku wa Gatandatu tariki 26 Gicurasi: Pouma- Kribi (154,4 km)

Ku Cyumweru tariki 27 Gicurasi: Kribi-Douala (175.7 km)

Ku wa Mbere tariki 28 Gicurasi: Douala- Douala (108 km)

Ku wa Kabiri tariki 29 Gicurasi: Douala-Limbe: (85,5 km)

Ku wa Gatatu tariki 30 Gicurasi: Abakinnyi bazaruhuka

Ku wa Kane tariki 31 Gicurasi: Mbanga-Bafang (121,5 km)

Ku wa Gatanu tariki 1 Kamena: Bafoussam- Dschang- Bafoussam (98 km)

Ku wa Gatandatu tariki 2 Kamena: Tonga- Bangangte- Tonga (83,7 km)

Ku Cyumweru tariki 3 Kamena: Bafia-Yaounde (122,8 km)

Abakinnyi bazaserukira u Rwanda muri Cameroun

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza