Kwamamaza

“Tour du Rwanda 2016” izasigira iki Karongi na Rusizi bataherukaga kuyica iryera?

Yanditswe kuya 25-10-2016 saa 14:59' na Manzi Rema Jules


Uturere twa Rusizi igiye kwakira Tour du Rwanda ku nshuro ya mbere na Karongi iheruka kuyakira muri 2012, turavuga ko turi mu myiteguro ikomeye yo kwakira no kubyaza umusaruro iri rushanwa rigiye guhuza ibihangange mpuzamahanga mu mukino w’amagare bikomoka hirya no hino ku Isi.

Tour du Rwanda 2016 izatangira tariki 13 isozwe kuri 20 Ugushyingo, izitabirwa n’amakipe 17 avuye ku migabane yose n’atatu ahagarariye u Rwanda arimo Team Rwanda, Benediction Club na Les Amis Sportif.

Ku munsi wa gatatu w’iri rushanwa, tariki 15 Ugushyingo abasiganwa bazahaguruka i Kigali basoreze i Karongi ku ntera ya 124.7 km, naho bukeye bwaho tariki 16 bahaguruke i Karongi berekeza i Rusizi hareshya na 115.9km.

Si amahirwe yagiye aboneka kenshi ku batuye utu turere two mu Ntara y’u Burengerazuba yo kwakira ibi birori ngarukamwaka muri siporo y’u Rwanda kuko uretse ab’i Karongi baherukaga kubibona muri 2012, abanya- Rusizi bo ni ku nshuro ya mbere bagiye kuyica iryera kuva muri 2009 ryaba mpuzamahanga.

Umuyobozi w’Akarere ka Rusizi, Harelimana Frederick, yabwiye IGIHE ko aya ari amahirwe akomeye ku baturage b’aka karere bari basanzwe bakurikiranira aya marushanwa kuri Radio kuba bagiye kuyabona imbona nkubone bwa mbere.

Yagize ati “Kwakira Tour du Rwanda ni amahirwe adasanzwe ku bafite ibikorwa nk’amahoteli n’amaresitora kuko haba abakinnyi n’ababaherekeje bazarara hano kandi hari ibyo bazadusigira. Ikindi kuba abaturage bacu bahoraga bumva ngo Tour du Rwanda kuri Radio ariko batarayibonera hari abumvaga barahejwe.”

“Mu by’ukuri bizakura abanya-Rusizi mu bwigunge kuko uyu ni umwe mu mikino banakunda cyane. Hashize iminsi abaturage baganirizwa cyane ku mutekano, kwirinda kujya mu mihanda irimo gukoreshwa n’abakinnyi kugira ngo badateza impanuka.”

Akomeza agira ati “Si abaturage ba hano bazaryoherwa gusa kuko n’abazaba badusuye, amarushanwa narangira bazaba bashobora kujya gutemberera ku mazi ya Kivu, kujya gusura ikirwa cya Nkombo n’ibindi bikorwa nyaburanga biri aha bitaboneka henshi.”

Ku ruhande rwa Karongi iheruka kwakira iri rushanwa mu myaka ine ishize, umuyobozi wayo Ndayisaba François, yabwiye IGIHE ko ibijyanye no kwakira neza abazaba bitabiriye iri rushanwa byamaze gutegurwa, agakangurira abifuza kuzaryoherwa bareba abasiganwa mu misozi idasanzwe no ku nkombe z’i Kivu kuzategerereza amagare muri aka Karere.

Ati “I Karongi dufite amahoteli amenyereye kwakira abantu benshi kandi neza, nta mpungenge na nke dufite. Ubu icyo twatangiye gukora ni ugushishikariza abaturage kuzitwara neza bahagarara ahabugenewe badateza ibibazo mu mihanda nk’impanuka n’ibindi.”

“Ubundi i Karongi si kenshi twakira ibikorwa mpuzamahanga nk’ibi, ariko birumvikana nyuma y’umuhanda mwiza cyane twabonye ni itangiriro ry’ibyiza byinshi twiteguye kuzajya twakira nk’Akarere nyaburanga kandi gafite umwihariko muri byinshi. Ku bashoramari ni umwanya mwiza wo kubibyaza amafaranga.”

Avuga ko mu mpera z’icyumweru gishize ubwo abakinnyi bazaserukira u Rwanda muri Tour du Rwanda bahagurukiraga mu Mujyi wa Karongi bajya Rusizi, byari nk’ubukwe, abaturage bishimye kandi baje ari benshi ku buryo byabahaye ishusho y’uko bizaba bimeze Tour du Rwanda yahageze.

Uretse kuba Tour du Rwanda ari isoko y’ubucuruzi ku bafite ibikorwa bitandukanye nk’amahoteli n’amaresitora mu mijyi iba yagiyemo, ni kimwe mu bikorwa bigaragaza isura y’igihugu kuko n’amateleviziyo mpuzamahanga aba yacyitabiriye Isi yose igikurikirana umunota ku munota.

Ikindi ku bakora ibikoresho gakondo bya Kinyarwanda nk’imitako n’ibindi nabo bashobora kungukira akayabo muri iri rushanwa bacuruza ibyo bakora ku banyamahanga batari bake bazaba bitabiriye Tour du Rwanda.

Abanya-Karongi ngo batangiye gusobanurirwa uko bazitwara muri Tour du Rwanda
Utu turere twombi mu cyumweru gishize twagezwemo n'abazakina iri rushanwa bari mu myiteguro
Abaturage b'i Rusizi ngo ni amahirwe kuri bo kuba bagiye kureba Tour du Rwanda bajyaga bumva kuri Radiyo
Umuhanda Karongi-Nyamasheke-Rusizi uzanyurwamo n'abazaba basiganwa muri Tour du Rwanda
Ikiyaga cya Kivu ngo nacyo kitezweho kuzakurura abazaba bitabiriye iri siganwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved