Kwamamaza

Tour du Rwanda 2016: Umutekano wakajijwe, zimwe mu nzira zishobora guhindurwa

Yanditswe kuya 10-11-2016 saa 09:30' na Manzi Rema Jules


Ishyirahamwe ry’Umukino w’Amagare mu Rwanda, Ferwacy, ryatangaje ko rifatanyije na Polisi y’igihugu bafashe ingamba zikomeye zo gukaza umutekano mu irushanwa mpuzamahanga ry’amagare rizenguruka igihugu risigaje iminsi itatu rigatangira.

Tour du Rwanda igiye gukinwa ku nshuro ya munani kuva yaba mpuzamahanga muri 2009, izatangira tariki 13 isozwe kuri 20 Ugushyingo 2016.

Nubwo nta bibazo bikomeye by’umutekano byagaragaye mu marushanwa yabanje, kuri iyi nshuro Ferwacy yatangaje ko uzacungwa birushijeho haba ku bafana bashobora kujya mu mihanda bakabangamira abakinnyi ndetse n’imihanda ishobora guteza ikibazo ikaba ishobora guhinduka.

Nk’uko byari biteganyijwe, tariki 19 Ugushyingo 2016 ku gace (etape) ka gatandatu, abakinnyi bazahagurukira i Musanze basoreza i Nyamirambo, bagombaga kuzazamuka Nyabugogo bakagera Kimisagara bakazamuka mu muhanda w’amabuye ahazwi nko kwa ’Mutwe’, bagera kuri 40 bakamanuka kuri Cercle Sportif mu Rugunga, bagasubira Nyabugogo na Kimisagara bakongera bakazamuka kwa Mutwe berekeza kuri Stade ya Kigali ahazasorezwa ako gace.

Mu kiganiro n’abanyamakuru, Bayingana Aimable, Umuyobozi wa Ferwacy yatangaje ko uyu umuhanda ushobora guhinduka igihe haba haguye imvura bitewe n’ahantu abakinnyi baba bagomba kumanuka bava kuri 40 bajya mu Rugunga hashobora guteza impanuka.

Ati “Umuhanda umanuka kuri 40 ujya mu Rugunga biragoye ko abasiganwa bawucamo imvura yaguye, kuko uramanuka cyane, wongeyeho kunyerera bishobora guteza impanuka. Tuzafata umwanzuro ku mihanda tuzakoresha kuri iyo ‘etape’ tugendeye ku iteganyagihe.”

Akomeza agira ati "Aho kugira ngo twongere guhura n’ibibazo nk’iby’ubushize, twasanze byaba byiza bahanyuze rimwe ariko tuzabimenya uwo munsi bitewe n’ikirere kizaba gihari n’abakinnyi tukabibabwira kare kuko bamaze guhaguruka nabyo byagorana.”

Izindi ngamba nshya ni ku muhanda Karongi – Rusizi uzanyurwamo ku gace ka gatatu, tariki tariki 16 Ugushyingo, aho bitewe n’umuhanda umanuka cyane w’ahazwi nko kuri ’Dawe uri mu Ijuru’, imodoka zose zizahagarikwa kubera umuvuduko mwinshi amagare aba afite, abakinnyi babanze batambuke.

Bayingana abisobanura yagize ati “Hari imihanda nk’iy’i Karongi imanuka cyane ku buryo amagare asiga imodoka, twarabibonye muri Rwanda Cycling Cup. Aha hari ingamba zafashwe kuko nibiba ngombwa imodoka tuzazihagarika abakinnyi batambuke kugira ngo twirinde impanuka.”

Umuco mwiza ku bafana, isura nziza y’igihugu

Bayingana yasabye abafana aho bazaba bari ku mihanda kuzirinda umuco mubi wagiye ugaragara mu bihe byashize, aho wasangaga bavugiriza induru abakinnnyi b’abanyamahanga.

Ati “Mu ndangagaciro zacu ntibikwiye ko usanga abafana bavugiriza abakinnyi induru yaba Abanyamahanga cyangwa se Abanyarwanda baje inyuma. N’iyo yaba ari uwo muhanganye umuha amashyi, ukamwongerera imbaraga, bitanga isura nziza ku gihugu.”

Bayingana kandi yasabye by’umwihariko abafana bajya banyura hagati mu mihanda abakinnyi bagiye gutambuka kubyirinda kuko bishobora guteza impanuka zikomeye haba ku bakinnyi ariko n’umufana akaba ashobora kuhaburira ubuzima kandi ariwe ubyiteye.

Tour du Rwanda y’uyu mwaka izitabirwa n’amakipe 15 kuko hari abiri arimo ikipe y’igihugu ya Kenya n’iya Misiri zamaze kwikura mu irushanwa kubera ibibazo by’amikoro.

Bivuze ko ku bakinnyi 85 bari bitezwe kuzaba bahanganira iri rushanwa, 75 ari bo bazaryitabira. Gusa ngo ibi nta cyo bizahindura ku migendekere myiza y’irushanwa kuko amakipe akomeye nka Dimension Data, Bike Aid n’andi azaba ahari kandi yazanye abakinnyi bakomeye.

Abafana barakangurirwa kugaragaza ikinyabupfura birinda kuvugiriza induru abanyamahanga n'abakinnyi baba basigaye inyuma
Zimwe mu nzira zizanyurwamo zishobora guhindurwa mu gihe imvura izaba yaguye
Abafana basabwe kwirinda kujya mu mihanda kuko byateza impanuka ku bakinnyi nabo ubwabo
Umutekano ngo wakajijwe kurushaho kugira ngo iri rushanwa rizabe ari nta makemwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved