Kwamamaza

APR FC yikuye imbere y’Amagaju FC, AS Kigali itsindwa ku ikubitiro

Yanditswe kuya 16-10-2016 saa 19:59' na Manzi Rema Jules


Ku mukino wa mbere akinira APR FC muri shampiyona, rutahizamu Muhadjili Hakizimana yayifashije gutsinda Amagaju FC igitego kimwe ku busa, atangira neza urugamba rwo kuzisubiza igihembo cy’umukinnnyi watsinze ibitego byinshi yegukanye umwaka ushize.

Coup Franc ya Muhadjili Hakizimana yo muri metero nka 18 uvuye ku izamu, idatandukanye n’iyo yateye muri Ghana yishyurira Amavubi mu kwezi gushize, niyo yahesheje abasore ba Yves Rwasamanzi gutangira shampiyona n’amanota atatu imbere y’Amagaju FC.

APR FC mu mwambaro imenyereweho w’umweru n’umukara, imbere y’abafana batari benshi nk’uko byari byitezwe ku ikipe ije guhanganira kwisubiza igikombe yatwaye umwaka ushize, yatangiye irusha Amagaju FC y’i Nyamagabe ndetse ihusha ibitego bibiri byabazwe mu minota 25 ya mbere.

Rutahizamu w’umwaka wavuye muri Mukura VS, Muhadjili Hakizimana yaboneye iyi kipe y’ingabo z’igihugu igitego kuri Coup Franc yateye ahagaze muri metero 18 umuzamu Shyaka Regis ntiyabasha kuwugarura.

Uyu mukinnyi watsinze ibitego 16 umwaka ushize, yahushije ubundi buryo bugera kuri bubiri mu gice cya kabiri bwari kubyara ibitego ariko umuzamu Shyaka Regis abyitwaramo neza.

Rwasamanzi urimo kuyobora APR FC nk’umutoza mukuru mu gihe undi ataraza, yakoze impinduka mu gice cya kabiri asimbuza Sekamana Maxime yinjiza rutahizamu wavuye muri AS Kigali, Twizerimana Onesme mu rwego rwo gushaka ibitego ariko nta cyo yahinduye kuko n’uburyo yabonye yabuteye mu maboko y’umuzamu.

Myugariro Imanishimwe Emmanuel wateye ibibazo hagati ya APR FC na Rayon Sports ariko Ferwafa ikemeza ko agomba gukinira APR FC, yabanje mu kibuga ndetse ni umwe mu bakinnnyi bitwaye neza.

Gutsinda uyu mukino bifashije APR FC gufata umwanya wa gatatu inyuma ya Bugesera FC na Rayon Sports zifite amanota atatu zinazigamye igitego bitatu ku kunsi wa mbere.

Ku Kicukiro mu wundi mukino wari ukomeye cyane, AS Kigali yasuye Sunrise FC iyitsinda igitego kimwe ku busa cya Sinamenye Cyprien.

Umunsi wa mbere wa shampiyona usize Police FC iri ku mwanya wa nyuma ibanjirijwe na Kiyovu Sports, mu gihe mu makipe yazamutse uyu mwaka, Kirehe FC ariyo yatangiye neza itsinda Musanze FC igitego kimwe ku busa cya Nyamugenda Fiston.

Abafana ntibari benshi kuri uyu mukino
Abakinnyi ba APR FC bishimira igitego cya Muhadjili Hakizimana
Hakizimana Muhadjili agerageza gucenga kapiteni w'Amagaju FC
Imanishimwe Emmanuel wavuye muri Rayon Sports ni umwe mu bakinnyi bitwaye neza
Kapiteni wa APR FC Ngabonziza Albert yari yagarutse mu kibuga
Muhadjili Hakizimana mu gahinda nyuma yo guhusha igitego cyari cyabazwe
Sibomana Patrick yabonye uburyo ari kumwe n'umuzamu umupira ujya hanze

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved