Perezida wa Sena ya Kenya yakiriye AFC Leopards ibamo Casa, Bakame na Soter

Yanditswe na Eric Tony Ukurikiyimfura
Kuya 30 Mata 2019 saa 07:08
Yasuwe :
0 0

Perezida w’Inteko Ishinga Amategeko umutwe wa Sena muri Kenya, Kenneth M. Lusaka, akaba n’umukunzi ukomeye wa AFC Leopards, kuri uyu wa Mbere yakiriye ku meza iyi kipe itozwa n’umunyarwanda Casa Mbungo André ikanakinamo abakinnyi babiri b’abanyarwanda.

AFC Leopards itozwa na Casa Mbungo André ikomeje kwitwara neza mu gihugu cya Kenya, aho ku wa Gatandatu yatsinze Bandari FC ibitego 2-1 mu mukino w’umunsi wa 26 wa shampiyona.

Ingwe nk’uko bakunze kuyita, inakinamo myugariro Kayumba Soter n’umunyezamu Ndayishimiye Eric ‘Bakame’, bombi babanje mu kibuga ku wa Gatandatu. Iyi intsinzi yo mu mpera z’icyumweru yashyize iyi kipe ku mwanya wa 10 n’amanota 34 mu mikino 25.

Nyuma yo kudahirwa n’intangiriro z’uyu mwaka w’imikino, ariko ikaba imaze imikino umunani yikurikiranya idatsindwa, kuri uyu wa Mbere, AFC Leopards yakiriwe n’uyu muyobozi w’Inteko Ishinga Amategeko ya Kenya ayishimira uko iri kwitwara.

Uretse kuyakira ku meza, Senateri Kenneth yanahaye AFC Leopards ibihumbi 750 by’amashilingi ya Kenya (miliyoni 6.7 Frw), ayizeza kuyishakira undi muterankunga uyifasha.

Casa Mbungo avuga ko ikipe ye kuri ubu yamaze gukosora icyatumaga itsindwa cyane mu minota ya nyuma, asaba abafana gukomeza kuyishyigikira.

Ati "Twakoze neza, icyatumaga tutitwara neza n’ukutabasha kuguma mu mukino cyane mu minota ya nyuma, ariko ubu turi kuyitwaramo neza kandi ndashaka gushimira abakinnyi. Nishimiye uko ikipe iri kugenda yitwara umunsi ku munsi, biragaragaza ko hari icyizere kandi turi kubona amanota. Turakomeza gukora cyane”

AFC Leopards izagaruka mu kibuga ku wa Gatatu tariki ya 1 Gicurasi 2019, aho izakirwa na Nzoia Sugar FC kuri Bukhungu Stadium mu Mujyi wa Kakamega.

Senateri Kenneth Lusaka yakiriye AFC Leopards ku meza
Casa Mbungo yavuze ko ikipe yiteguye gukomeza kwitwara neza
Bakame na Kayumba Soter bafashe ifoto n'uyu muyobozi ukunda ikipe bakinira
Senateri Kenneth yahaye AFC Leopards ibihumbi 750 by’amashilingi ya Kenya nyuma yo kuyakira ku meza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza