00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Amakipe y’abakobwa bakora siporo yahawe inkunga y’ingoboka kubera ingaruka za COVID-19

Yanditswe na Mukwaya Olivier
Kuya 19 Ukwakira 2021 saa 11:23
Yasuwe :
0 0

Amakipe y’abakobwa bakina umupira w’amaguru bagakora na siporo rusange mu mirenge itanu, bahawe inkunga y’ingoboka mu guhangana n’ingaruka za Covid-19. Ubuyobozi bwatangaje ko ubwo siporo yafunguwe bagiye gukomeza gukorana na bo mu bukangurambaga buyifashishije.

Aya matsinda agiye kongera gukora nyuma y’igihe atabasha gukora siporo bitewe n’icyorezo cya Covid-19.

Mu bikoresho bahawe harimo amajerekani, amasafuriya, amabase, uburingiti n’ibitenge.

Uwamahirwe Shamsa wo mu Ikipe y’Umurenge wa Gisenyi, mu izina rya bagenzi be yashimiye inkunga bahawe avuga ko bigiye kubatera imbaraga mu gihe bagiye gutangira gusubukura ibikorwa bya siporo byari byarahagaze.

Ati “Turashimira inkunga twahawe kuko bitweretse ko badutekereza. Ibikoresho by’isuku n’ibitenge baduhaye bizafasha benshi kandi biradufasha kongera gutangira siporo neza tugakomeza ibiganiro twajyaga tugira nyuma y’imyitozo.”

Umuyobozi w’Umuryango AKWOS ufasha abagore binyuze muri Siporo, Rwemarika Félicité, yavuze ko siporo yafashaga gucyemura ibibazo, abizeza gusubukura imikino y’ubukangurambaga mu kurwanya inda zitateguwe no gukemura amakimbirane yo mu ngo.

Ati “Aba bose kugira ngo bashobore kuganira barabanza bakajya muri siporo bakanezerwa barangiza bakicara bakaganira bikaborohera gukemura ibibazo byabo binyuze muri siporo ariko kubera COVID-19 bari barahagaze.”

Yakomeje agira ati “Twari twateguye amarushanwa ariko ntibyakunze ariko ubu tugiye gushyiraho amakipe azajya akora ubukangurambaga bwo kurwanya inda zidateganyijwe n’amakimbirane yo mu ngo.”

Umuhuzabikorwa w’Inama y’Igihugu y’Abagore mu Karere ka Rubavu, Uwimpuhwe Gloriose, yavuze ko mbere y’icyorezo cya COVID-19 aba bakobwa bafashaga mu bukangurambaga binyuze mu mikino, ashimangira ko bagiye kureba uko basubukura ibi bikorwa.

Ati “Mbere Covid-19 itaraza aba bakobwa bafashaga abaturage bo mu mirenge gukora siporo bikadufasha no kwesa imihigo kuko siporo iri mu mihigo. Bagiraga uruhare mu gukundisha abantu siporo, ubu tugiye kurebera hamwe uko hasubukurwa siporo yo mu mpera z’icyumweru.”

Mu Karere ka Rubavu nk’agafite Ikiyaga cya Kivu, hakunze kugaragara amakipe atandukanye akina umupira w’amaguru w’abagore akomeye nka Scandinavia Women ndetse n’amatsinda akora siporo ku nkengero z’iki kiyaga ariko bikaba byari byarashegeshwe n’icyorezo cya COVID-19.

Abakobwa bari bategereje inkunga
Amakipe atanu yo mu mirenge itanu yahawe ibikoresho
Ibikoresho byatanzwe byiganjemo iby'isuku

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .