Kwamamaza

UGB igiye kubimburira andi makipe ya Basketball kwiyubakira ikibuga

Yanditswe kuya 9-10-2016 saa 15:22' na Manzi Rema Jules


Komite Nshya y’Ikipe ya UGB (United Generation Basketball Club) iyobowe na Cyusa Jean Luc mu mihigo y’ingenzi ifite mu myaka itatu yahawe, harimo kubaka ikipe ikomeye ku buryo muri iyi myaka igomba kuba yegukanye igikombe cya shampiyona, gufasha abana bakiri bato kuzamuka bakunda Basketball ariko banafashwa kwiga amashuri by’umwihariko ikaba yariyemeje gukora amateka yo kuzasiga yubatse ikibuga kiri ku rwego mpuzamahanga.

UGB imaze imyaka 16 ikina Shampiyona y’u Rwanda umwaka ushize ntiwayihiriye kuko yarangije ari iya gatandatu mu makipe 10.

Muri Kanama uyu mwaka, abanyamuryango b’iyi kipe bahisemo gukora impinduka mu buyobozi, Perezida Shumbusho Alphonse asimburwa na Cyusa Jean Luc ugiye kuyiyobora mu gihe cy’imyaka itatu iri imbere ishobora no kwiyongera bitewe n’umusaruro.

Mu kiganiro Cyusa yagiranye na IGIHE, yavuze ko mu mezi abiri ashize batowe babanje gushaka uburyo bakongera imbaraga mu ikipe bari bafite umwaka ushize kugira ngo bitegure shampiyona y’umwaka utaha izabashe kurangiza mu makipe abiri ya mbere nibinashoboka n’igikombe bacyambure Patriots BBC igifite.

Ati “Icya mbere kwari ukugumana abakinnyi bacu beza tukanashaka abandi haba mu Rwanda no hanze. Hari abanyamahanga babiri twifuza ariko bakaba ari ba bandi bakora ikinyuranyo n’abana bacu bashobora kwigiraho. Intego uyu mwaka ni ukurangira mu makipe abiri ya mbere ariko n‘igikombe bishobotse twagihatanira n’ubwo cyane twumva umwaka utaha aribwo byashoboka abakinnyi bamaze kumenyerana neza.”

Si iyi ntego yonyine Cyusa n’abo bafatanyije kuyobora ndetse n’abanyamuryango bose ba UGB bafite kuko biyemeje ko mu myaka itatu bagomba kuzaba bamaze kubaka ikibuga cy’iyi kipe bwite ubu inyigo ikaba yaramaze gukorwa.

Ngo nicyuzura uretse petit stade isanzwe yakira amarushanwa mpuzamahanga n’imikino ikomeye mu gihugu, ngo nta kindi kibuga kizaba kirenze iki cya UGB.

Yagize ati “Ubusanzwe dufite ibikorwa dukora birimo gufasha abana gukunda uyu mukino ariko no kwiga. Kuri ubu dufite abana benshi twazamuye kandi babayeho neza no mu buzima busanzwe. Ubu igikorwa kirenze ibindi dushaka gukora ni ukubaka ikibuga cyacu bwite, kenshi usanga petit stade ariyo amakipe yose akoresha kuko nta hari ibibazo by’ibibuga byiza.’

Cyusa avuga ko iki kibuga gishobora kuzaba cyabonetse muri iyi myaka itatu yatorewe ubu bakaba barimo kuganira n’abafatanyabikorwa batandukanye bashobora kuzagira uruhare mu bikorwa by’ikipe kandi ibiganiro ngo biratanga icyizere.

Uretse kuba ari umuyobozi w'iyi kipe, Cyusa (ufite umupira) ananyuzamo agakina uyu mukino ariko mu bakuze
Cyusa Jean Luc (uwa gatanu iburyo) hamwe n'abo bafatanya kuyobora UGB

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved