Umurenge Kagame Cup: Amakipe y’Intara y’Uburengerazuba yihariye ibihembo ku rwego rw’igihugu (Amafoto)

Yanditswe na Eric Tony Ukurikiyimfura
Kuya 10 Kamena 2019 saa 11:02
Yasuwe :
0 0

Imikino ya nyuma y’amarushanwa Umurenge Kagame Cup yasojwe kuri iki Cyumweru mu karere ka Huye, yasize amakipe y’imirenge ya Gihango na Gihombo yo mu ntara y’Uburengerazuba ariyo yegukanye ibikombe mu mupira w’amaguru mu bagabo n’abagore, hamenyekana abegukanye ibihembo mu mikino yose.

Aya marushanwa ahuza imirenge yose yo mu Rwanda, imirenge itsinze ku rwego rw’akarere, ikagahagararira ku rwego rw’intara n’Umujyi wa Kigali kugeza ku rwego rw’igihugu. Muri uyu mwaka yakinwe mu mupira w’amaguru, Volleyball, Basketball, gusiganwa ku maguru, gusiganwa ku magare na Sitball, iyi mikino yose igakinwa mu bagabo no mu bagore.

Ku rwego rw’igihugu, aya marushanwa yasorejwe mu karere ka Huye, aho habaye imikino ya nyuma, hanatangwa ibihembo ku makipe n’abakinnyi bahize abandi.

Mu mupira w’amaguru, mu bagabo, igikombe cyegukanwe n’Umurenge wa Gihango wo mu karere ka Rutsiro mu Burengerazuba nyuma yo gutsinda uwa Nyarugenge wari ufite igikombe giheruka, kuri penaliti 4-2 dore ko iminota 90 y’umukino yarangiye amakipe yombi anganya igitego 1-1.

Nyarugenge ni yo yafunguye amazamu ku gitego cyabonetse ku munota wa 30 w’umukino gitsinzwe na Nahimana Saidi ku mupira yari ahawe na Gasana Bosco mu gihe Gihango yishyuye mu minota y’inyongera y’igice cya mbere ku gitego cyitsinzwe na Niyibabarira Jean Paul.

Mu bagore, Umurenge wa Gihombo wo muri Nyamasheke, wegukanye igikombe utsinze uwa Nyakabanda muri Nyarugenge kuri penaliti 5-4, ni nyuma y’uko amakipe yombi yari amaze kunganya ubusa ku busa.

Muri Sitball mu bagore, Gicumbi yegukanye umwanya wa mbere itsinze Bugesera 32-26 naho mu bagabo Gasabo itsinda Nyagatare 35-26.

Muri Basketball, mu bagabo, Nyarugenge yatsinzwe na Musanze amanota 43-42 nyuma yo kwitabaza iminota y’inyongera ubwo bari bamaze kunganya 37-37 mu gihe mu bagore Gasabo yatsinze Musanze amanota 45-29.

Muri Volleyball, mu bagabo, Kirehe yatsinze Rubavu amaseti 3-0 (25-17, 25-18 na 25-13) naho mu bagore igikombe gitwarwa na Karongi yatsinze Gatsibo amaseti 3-0 (25-9, 25-16 na 25-12).

Mu magare, mu bagabo, basiganwe intera y’ibilometero 39 mu muhada Huye-Save-Gisagara- Huye. Iri siganwa ryitabiriwe n’abakinnyi 17, babiri ntibabasha kurisoza. Tuyizere Étienne yabaye uwa mbere nyuma yo gukoresha isaha imwe, iminota 13 n’amasegonda ane mu gihe mu bakobwa basiganwe intera y’ibilometero 29, uwa mbere yabaye Mukarukundo Bertine w’i Gicumbi, wakoresheje iminota 55.

Mu bahungu, Intara y’Uburengerazuba ni yo yabaye iya mbere, ikurikirwa n’Uburasirazuba mu gihe mu bakobwa Intara y’Uburengerazuba yabaye iya mbere igakurikirwa n’iy’Amajyaruguru hateranyijwe ibihe abakinnyi bose bakoresheje.

Ubwo yasozaga iyi mikino, Minisitiri w’Ubutegetsi bw’igihugu, Prof. Shyaka Anastase yavuze ko aya marushanwa agamije guteza imbere umuturage yagenze neza ndetse abaturage bayishimiye.

Ati” Nibwo bwa mbere Umurenge Kagame Cup ugize imikino myinshi nk’iyi kandi byaradushimishije uburyo yagenze. Byagaragaye ko mu rubyiruko rwacu harimo abakinnyi bashoboye kandi abanyarwanda barabyishimiye kandi birabahuza. Intego y’irushanwa ni Umuturage ku Isonga, aho agombwa serivisi nziza mu miyoborere no mu bindi bikorwa byose agiramo uruhare.”

Umuyobozi w’Ikigo cy’Igihugu gishinzwe Imiyoborere, RGB, Usta Kayitesi yavuze ko intego y’iri rushanwa ry’uyu mwaka ishimangira ko umuturage ari inkingi y’iterambere ry’amajyambere mu Rwanda, aho aba agomba guhabwa amahirwe yo gukora ibyo ashoboye byose.

Ati” Murabizi ko imiyoborere myiza iba isoko y’uko buri umwe aba ashobora kwiteza imbere. Aya marushanwa ahura n’imiyoberere myiza kuko ni umwanya wo gusubira ku bushobozi bw’abanyarwanda batandukanye ariko biba n’amahirwe yo kugenzura niba amahame y’imiyoborere myiza ajya ahura n’ay’imikino imwe n’imwe.”

Umurenge Kagame Cup ni amarushanwa ngarukamwaka yatangiye muri 2006, icyo gihe yitwa “Amarushanwa y’Imiyoborere Myiza”, aho yashyizweho mu rwego rwo kwimakaza amahame y’imiyoborere myiza.

Muri 2010, nibwo ayo marushanwa yatangiye kwitirirwa Perezida Paul Kagame, yitwa “Umurenge Kagame Cup” mu rwego rwo kuzirikana uruhare rwe mu guteza imbere amahame y’Imiyoborere myiza.

Uko ibihembo byagiye bitangwa mu mikino yose

Football/Abagabo

  1. Gihango/Rutsiro (1,200,000 Frws)
  2. Nyakabanda/Nyarugenge (1,000,000 Frws)
  3. Mamba/Gisagara (900,000 Frws)

Football/Abagore

  1. Gihombo/Nyamasheke (1,200,000 Frws)
  2. Nyakabanda/Nyarugenge (1,000,000 Frws)
  3. Nyamabuye/Muhanga (900,000 Frws)

Basketball/Abagabo

  1. Musanze (1,000,000 Frws)
  2. Nyarugenge (800,000 Frws)
  3. Karongi (700,000 Frws)

Basketball/Abagore

  1. Gasabo (1,000,000 Frws)
  2. Musanze (800,000 Frws)
  3. Kamonyi (700,000 Frws)

Volleyball/Abagabo

  1. Kirehe (1,000,000 Frws)
  2. Rubavu (800,000 Frws)
  3. Muhanga (700,000 Frws)

Volleyball/Abagore

  1. Karongi (1,000,000 Frws)
  2. Gatsibo (800,000 Frws)
  3. Musanze (700,000 Frws)

Sit Ball/Abagabo

  1. Gasabo (1,000,000 Frw)
  2. Nyagatare (800, 000 Frw)
  3. Gisagara (700,000 Frw)

Sit Ball/ Abagore

  1. Gicumbi (1,000,000 Frw)
  2. Bugesera (800,000 Frw)
  3. Rubavu (700,000 Frw)

Amagare/ Abagabo

Intara yitwaye neza: Intara y’Uburengerazuba: Igikombe

  1. Tuyizere Etienne (Nyabihu, 300,000 Frw n’igare)
  2. Kagibwami Swayibu (Kayonza, 250,000 Frw)
  3. Bizimungu (Nyabihu, 200,000 Frw)
  4. Niyonkuru Emmanuel (150,000 Frw)
  5. Uwihanganye Elie (100,000 Frw)

Amagare/ Abagore

Intare yitwaye neza: Intara y’Uburengerazuba: Yahawe igikombe

  1. Mukarukundo Bertine (Gicumbi, 300,000 Frw n’igare)
  2. Niyobyose Gorethe (Kayonza, 250,000 Frw)
  3. Irakoze Aline (Rwamagana, 200,000 Frw)
  4. Tuyishimire Rachel (Karongi, 150,000 Frw)
  5. Manishimwe Jeannette (Karongi 100,000 Frw)

Gusiganwa metero 100/ Abagore

  1. Mukashyaka Placidie (Gakenke, 300,000 Frw)
  2. Tugeriwacu Leoniie (Gicumbi 250,000 Frw)
  3. Twizeyimana Seraphine (Ngororero, 200,000 Frw)
  4. Byukusenge Patricie (Gakenke, 150,000 Frw)
  5. Uwimpaye Leonie (Gicumbi 100,000 Frw)

Gusiganwa metero 1500/ abagore

  1. Nyirabizeyimana Clementine (Gakenke, 300,000 Frw)
  2. Mukandayisenga Venancie (Nyaruguru (250,000 Frw)
  3. Nyiranzimenya (Rutsiro, 200,000 Frw)
  4. Mukandayisaba (Burera, 150,000 Frw)
  5. Mukarugwiza Jeannette (Nyamasheke, 100,000 Frw)

Gusiganwa metero 3000/Abagore

  1. Musabyimana Agnes (Musanze, 300,000 Frw)
  2. Uwizeyimana Jeanne Gentille (Nyamasheke, 250,000 Frw)
  3. Nyirantezimana Juliette (Rwamagana 200,000 Frw)
  4. Musabyimana (Nyamagabe, 150,000 Frw)
  5. Yamuragiye Vestine (Nyamagabe, 100,000 Frw)

Gusiganwa metero 100/ Abagabo

  1. Nsabimana Placide (Nyamasheke, 300,000 Frw)
  2. Mpawumugisha Emmanuel (Kayonza, 250,000 Frw)
  3. Ndizeye Jean Claude (Nyamasheke, 200,000 Frw)
  4. Mugisha Emmanuel (Kayonza, 150,000 Frw)
  5. Maniraguha Eloie (Karongi, 100,000 Frw)

Gusiganwa metero 1500 mu bagabo

  1. Niyibizi Emmanuel (Musanze, 300,000 Frw)
  2. Dusabinema Emmanuel (Gicumbi, 250,000 Frw)
  3. Uzabakiriho Didas (Gatsibo, 200,000 Frw)
  4. Mutiganda Protogene (Gicumbi, 150,000 Frw)
  5. Niyonizera Leonard (Gicumbi, 100,000 Frw)

Gusiganwa metero 5000 mu bagabo

  1. Bigoreyiki Eliezer (Karongi, 300,000 Frw)
  2. Niyonizeye Leonard (Gicumbi 250,000 Frw)
  3. Nsabimana Vincent (Nyaruguru, 200,000 Frw)
  4. Mvuyekure (Ngororero 150,000 Frw)
  5. Nshimiyimana Aime (Nyabihu, 100,000 Frw)
Minisitiri w'Ubutegetsi bw'Igihugu, Prof. Shyaka Anastase ashimira Gihango yatwaye Umurenge Kagame Cup mu bagabo
Minisitiri Shyaka n'umuyobozi wa RGB, Kayitesi, batanga igikombe kuri Gihombo yabaye iya mbere mu bagore mu mupira w'amaguru
Gasabo yegukanye igikombe cya Basketball mu bagore
Nyirimana Fidele ni umwe mu bakinnyi ba Kirehe yatozagwa na Jado Castar
Kirehe yegukanye igikombe cya Volleball mu bagabo
Gatsibo yabaye iya kabiri muri Volleyball y'abagore
Gicumbi yegukanye irushanwa muri Sit Ball mu bagore
Intara y'Uburengerazuba yitwaye neza mu magare, ihabwa ibikombe bibiri
Mukarukundo Bertine yahawe igare nyuma yo kuba uwa mbere
Ababaye aba mbere mu gusiganwa metero 1500 mu bagore
Ababaye aba mbere mu gusiganwa metero 100 mu bagore bashimirwa
Rukundo Jean Aime wa Gihango ashimirwa na bagenzi nyuma yo kubafasha gutsinda kuri penaliti
Nyarugenge ifite igikombe giheruka, yatsindiwe kuri penaliti
Gihango (yambaye icyatsi) na Nyarugenge (yambaye umweru) zanganyije igitego 1-1 hitabazwa penaliti
Banamwana Camarade utoza Gicumbi FC yari umutoza wa Nyarugenge
Minisitiri w'Ubutegetsi bw'Igihugu, Prof. Shyaka Anastase atanga ubutumwa bujyanye n'amarushanwa y'Umurenge Kagame Cup
Guverineri w'intara y'Amajyaruguru, Gatabazi Jean Marie Vianney ni umwe mu bayobozi bitabiriye isozwa ry'iyi mikino
Guverineri w'Intara y'Amajyepfo, CG Gasana Emmanuel, Minisitiri Shyaka na Kayitesi Usta uyobora RGB mu muhango wo gusoza amarushanwa y'Umurenge Kagame Cup
Umuyobozi wa RGB, Kayitesi Usta yavuze ko iyi mikino igamije kureba niba no mu mikino hakurikizwa amahame y'imiyoborere ikwiye umunyarwanda
Gihombo bashimira umunyezamu wabatabaye muri penaliti
Umurenge wa Gihombo wishimira intsinzi wabonye nyuma yo gutera penaliti mu mupira w'amaguru mu bagore
Gicumbi yegukanye igikombe muri Sit Ball y'abagore
Tuyizere yanikiye bagenzi be mu gusiganwa mu magare mu bahungu
Abatuye Gisagara na Huye baryoheye n'amasiganwa y'amagare mu marushanwa y'Umurenge Kagame Cup

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza