Basketball: Lionel ukinira ikipe y’igihugu yafashije BK kunyagira BNR mu irushanwa ry’Amabanki

Yanditswe na Manzi Rema Jules
Kuya 4 Nzeri 2017 saa 06:43
Yasuwe :
1 0

Irushanwa rihuza amabanki yo mu Rwanda mu mikino itandukanye ryatangijwe ku mugaragaro kuri iki Cyumweru kuri Stade nto i Remera, mu mukino ufungura wa Basketball, Banki ya Kigali ibifashijwemo na Hakizimana Lionel usanzwe ukinira Ikipe y’Igihugu yatsinze BNR amanota 73 kuri 28.

Iri rushanwa ryiswe “Interbank Sports Tournament 2017” ririmo kuba ku nshuro ya mbere, ryateguwe n’Ihuriro ry’amabanki yo mu Rwanda,RBA, nyuma yo kubona ko hari bamwe mu bakozi batabona uko bakora siporo bamara amasaha menshi bicaye mu kazi.

Mu rwego rwo kubafasha kwidagadura no kubakundisha siporo hatangijwe iri rushanwa mu mikino itandukanye yaba umupira w’amaguru, volleyball, basketball, igisoro, gusiganwa ku maguru n’imikino ngororamubiri aho byitezwe ko izajya iba ngarukamwaka.

Umukino wo kurifungura ku mugaragaro kuri iki Cyumweru, muri basketball; Banki ya Kigali (BK) yatsinze Banki Nkuru y’Igihugu (BNR) amanota 73-28 mu mukino warebwe n’abayobozi bakuru barimo Umuyobozi w’Umujyi wa Kigali, Nyamulinda Pascal ari nawe waritanjije, Guverineri wa Banki Nkuru y’Igihugu (BNR) John Rwangombwa na Dr Diane Karusisi uyobora Banki ya Kigali (BK).

Ni umukino watangiye amakipe yombi asa n’anganya ndetse agira amanota 10 akiri kumwe gusa abakinnyi ba BNR baje kunanirwa igice cya mbere kirangira BK iri imbere n’amanota 31-17 ahanini ibifashijwemo n’amazina akomeye ifite nka Hakizimana Lionel ukinira Patriots BBC kimwe na Ihirwe Robert wahoze akinira Kaminuza y’u Rwanda mbere yo kujya gukora muri BK.

Mu gice cya kabiri bayizonze noneho, Lionel atsinda amanota atatu ubugira gatatu ari nako bagenzi be babona mu nkangara umusubirizo cyane ko abugarizi ba BNR bari bananiwe bigaragara bituma umukino urangira BK itahukanye itsinzi ku manota 73 kuri 28 bivuze ko igice cya kabiri cyabaye amanota 42 kuri 11.

Nyuma y’uyu mukino, Dr Diane Karusisi uyobora Banki ya Kigali (BK) akaba n’Umuyobozi wungirije w’Ihuriro ry’amabanki, yatangaje ko abona iyi mikino izagera ku ntego zayo kuko amabanki yose yayihaye agaciro, bakaba bakina bashaka intsinzi ariko banasabana.

Yagize ati “Intego ni ugufasha Leta y’u Rwanda kugira ngo Abanyarwanda bahorane ubuzima bwiza. Abakozi bo mu mabanki bamara igihe kinini bicaye ku buryo ari byiza kubona umwanya nk’uyu bakidagadura, bakanasabana. Uyu munsi wabaye mwiza cyane kuko na BK yabashije gutsinda BNR.”

Iyi mikino yatangiye mu mpera z’iki cyumweru ikazasozwa mu ku Cyumweru gitaha hakinwa imikino ya nyuma ari nabwo banki zitwaye neza kurusha izindi zizashyikirizwa ibihembo zegukanye.

Uko imikino yose yo mu matsinda yagenze:

Umupira w’amaguru:

- I&M 2 - 0 EQUITY BANK
- BK 7 - 3 BOA
- BPR 5 - 1 URWEGO BANK
- BNR 5 - 2 COGEBANQUE.
- GT BANK 2 - 1 UNGUKA BANK.

NB: GT Bank ntabwo yakomeje nubwo yatsinze kuko izindi enye zayirushije gutsinda neza.

Basketball:

- EQUITY 39- 25 BNR
- BK 64-39 GT BANK
- ECOBANK 32 - 44 ACCESS BANK
- AB BANK 18 -71 KCB
- BK 50-23 EQUITY BANK
- BNR 22-33 GT BANK
- I&M 27-48 ECOBANK
- BNR 28-73 BK
- ACCESS BANK 46-38 I&M
- KCB 33-45 BPR
- EQUITY BANK 54-60 GT BANK
- BPR 52-11 AB BANK

Imikino ya ½ Kuwa Gatandatu tariki ya 9 Nzeri 2017

- BK vs Access Bank: 10:00
- BPR vs GT Bank 12:00

Volleyball:

- URWEGO seti 2-1 (25-15,22-25,15-8) AB BANK
- BK seti 2-0 (25-22,25-20) ECOBANK
- BNR seti 1-2 (25-23,11-25,13-15) COGEBANQUE
- COGEBANQUE seti 2-0 (25-15,25-21) AB BANK
- BK seti 2-0 (25-13,25-14) BPR
- BNR Seti 2-0 (26-24,25-19 URWEGO
- URWEGO seti 1-2 (27-25,24-26,9-15) COGEBANQUE
- ECOBANK seti 2-0 (25-05,25-10) BPR
- AB BANK seti 0-2 (06-25,22-25) BNR

Imikino ya ½ iteganyijwe ku wa Gatandatu tariki ya 9 Nzeri 2017:

- BK vs BNR
- ECOBANK vs COGEBANQUE

Abafana ba BK bashimira Hakizimana Lionel ku kazi gakomeye yakoze
BNR yatangiye yihagazeho ariko abakinnyi bayo baza kunanirwa mu gice cya kabiri
Uhereye ibumoso: Dr Diane Karusisi uyobora Banki ya Kigali (BK), Umuyobozi w'Umujyi wa Kigali, Nyamulinda Pascal na Guverineri wa Banki Nkuru y'Igihugu (BNR) John Rwangombwa bareba umukino
Lionel (ufite umupira) yari yazonze abakinnyi ba BNR

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza