NBA: Dwyane Wade yerekeje muri Cleveland Cavaliers

Yanditswe na Ishimwe Israel
Kuya 28 Nzeri 2017 saa 09:56
Yasuwe :
0 0

Dwyane Wade wari umaze umwaka akinira Chicago Bulls yaguze amasezerano yari asigaranye muri iyi kipe ahita yerekeza muri Cleveland Cavaliers, ikipe y’ubukombe muri Shampiyona ya Basketball muri Leta Zunze Ubumwe za Amerika.

Uyu mukinnyi wari mu bagenderwaho muri Chicago Bulls asanze muri Cleveland Cavaliers, inshuti ye magara LeBron James uri mu bakomeye muri Amerika, banakinanye muri Miami Heats.

Wade w’imyaka 35, yageze muri Chicago Bulls muri Nyakanga 2016 avuye muri Miami Heats asinya amasezerano y’imyaka ibiri afite agaciro ka miliyoni 47.5 z’amadorali ya Amerika.

Wade yemeranyije na Chicago Bulls ku bijyanye no kugura amasezerano yari asigaranye ku Cyumweru ahita atanga miliyoni umunani z’amadorali ku mushahara yagombaga guhembwa mu mwaka wa 2017/18 ungana na $23.8.

Nyuma y’umwaka umwe akinira Bulls yo mu Mujyi avukamo wa Chicago, yasabye ko yamurekura bitewe ahanini n’uko iyi kipe yatanze bamwe mu bakinnyi bayo b’inkorokoro barimo Jimmy Butler wagiye muri Minnesota Timberwolves na Rajon Rondo werekeje muri New Orleans Pelicans bityo akabona ko nta bushobozi bwo guhangana isigaranye.

Mu rugamba rwo kwegukana Wade, Cleveland yakubanaga n’amakipe arimo Miami Heats yahoze akinira, San Antonio Spurs, Oklahoma City Thunder ikomeje kwiyubaka cyane uyu mwaka dore ko yamaze kugura Paul George na Carmelo Anthony.

Miami Heats niyo yatangaga umushahara uri hejuru ungana na miliyoni 4.2 z’amadorali ya Amerika; San Antonio Spurs ikamuha miliyoni 3.3 z’amadorali; Cleveland Cavaliers yo ikamuha miliyoni 2.5 mu gihe Oklahoma City Thunder yatangaga miliyoni 2.3 ku mwaka.

Wade wanagaragaye mu myitozo y’iyi kipe ku mugoroba wo ku wa Gatatu, tariki ya 27 Nzeri 2017, azajya ahembwa agera kuri miliyoni 2.3 z’amadorali ya Amerika nk’uko ESPN dukesha iyi nkuru yabitangaje.

Mu magambo ye yagize ati “Nishimiye ko ndi mu ikipe nziza izamfasha gukomeza guhangana ku rwego rwo hejuru. Cleveland yizera mu bushobozi n’impano byanjye ndetse n’icyo nshobora gukora nk’umukinnyi ngo yongere itware igikombe. Nongeye kwishimira ko ngiye guhura no gukina iruhande rw’umuvandimwe wanjye LeBron.”

Wade umaze kuza mu ikipe ya NBA All Stars inshuro 12 yakomeje agira ati “Twatwaranye ibikombe bibiri bya Shampiyona kandi nizeye ko n’icya gatatu tuzacyegukana.”

Nyuma y’imyitozo James yatangaje ko yishimiye ko Cavaliers yegukanye uyu mukinnyi washakishwaga n’amakipe menshi.

Wade agiye gukinana n’ibihangange birimo LeBron James, Kevin Love, JR Smith, Derrick Rose na Tristan Thompson mu gihe iyi kipe idafite Isaiah Thomas ufite imvune izatuma agaruka mu kibuga muri Mutarama umwaka utaha.

Dwyane Wade yatwaye shampiyona ebyiri ari muri Miami Heats
Wade agiye kongera gukinana na LeBron James yita inshuti ye magara
Wade yari umaze umwaka muri Chicago Bulls

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza