NBA: Intangiriro zisharira ku munyarwanda Frank Ntilikina

Yanditswe na Manzi Rema Jules
Kuya 20 Ukwakira 2017 saa 05:04
Yasuwe :
0 0

Frank Ntilikina ufite inkomoko mu Rwanda, yaraye akinnye umukino wa mbere muri shampiyona ya Basketball muri Leta Zunze Ubumwe za Amerika, aho ikipe ye ya New York Knicks yasuye Oklahoma City Thunder agorwa bikomeye no kwigaragaza.

Ntilikina w’imyaka 19 uvuka ku babyeyi b’abanyarwanda ariko ufite ubwenegihugu bw’u Bufaransa ari nacyo gihugu akinira, yaraye akinnye umukino wa mbere muri shampiyona ubwo ikipe ye ya New York Knicks yatsindwaga na Oklahoma City Thunder amanota 105-84.

Uyu musore yabanje hanze y’ikibuga ariko umutoza aza kumwinjiza ikipe ye imaze gutsindwa agace ka mbere ku manota 27-23. Yinjiye ku munota wa kabiri w’agace ka kabiri gusa ntabwo yorohewe no guhangana na Oklahama City iyobowe n’ibihangange nka Russell Westbrook, Carmelo Anthony na Paul George.

Mu minota irindwi yamaze mu kibuga ntiyamubereye myiza kuko nta nota yabashije gutsinda, gusa yatanze umupira umwe wavuyemo amanota anakora amakosa abiri. Haracyari kare kuri uyu musore kuko agifite amahirwe yo kuzigaragaza mu yindi mikino 81 ya shampiyona isigaye.

Muri uyu mukino, Carmelo Anthony wahuraga bwa mbere na New York Knicks yakiniye imyaka irindwi, yatsinze amanota 22 mu minota 34 yakinnye naho Russell Westbrook watowe nk’umukinnyi mwiza w’umwaka ushize (MVP) atsinda 21 atanga imipira 16 ivamo amanota anabuza indi 10 kujya mu nkangara.

Mu yindi mikino Toronto Raptors yatsinze Chicago Bulls amanota 117 ku 100 naho L. A. Lakers ku kibuga cyayo ihatsindirwa na L. A. Clippers ku manota 108 kuri 92.

Frank Ntilikina (11) ahanganiye umupira na Paul George (13) wageze muri Oklahoma City Thunder avuye muri Indiana Pacers
Ntilikina yakinnye iminota irindwi mu mukino we wa mbere muri NBA
Russell Westbrook (0) atsinda amanota abiri ku mupira yari yambuye Ntilikina (11)
Carmelo Anthony yahuraga n'ikipe yahozemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza