NBA Playoffs: Kevin Durant yafashije Warriors gutsinda Houston Rockets umukino wa kabiri

Yanditswe na Eric Tony Ukurikiyimfura
Kuya 1 Gicurasi 2019 saa 02:31
Yasuwe :
0 0

Imikino ya nyuma muri Shampiyona ya Basketball muri Leta Zunze Ubumwe za Amerika (NBA) yakomeje mu rukerera rwo ku wa Kabiri, aho Golden State Warriors ibifashijwemo na Kevin Durant yatsinze Houston Rockets amanota 115-109 mu mukino wa kabiri.

Umukino wabereye ku kibuga cya Golden State Warriors ’Oracle Arena’, warangiye Kevin Wayne Durant w’imyaka 30 atsinze amanota 29.

Wahuje amakipe yombi yo mu gice (conference) cy’Uburengerazuba warimo ishyaka ryinshi, waranzwe n’imvune kuri Stephen Curry na James Harden wakomeretse mu maso mu gace ka mbere k’umukino, ariko bombi bakaza gusubira mu kibuga.

Golden State Warriors yatsinze agace ka mbere k’umukino ku manota 29-20 mbere y’uko James Edward Harden w’imyaka 29 agaruka mu kibuga mu gace ka kabiri. Uyu Munyamerika ukinira Houston Rockets yafashije ikipe ye kuzamura amanota, amakipe yombi anganya 29 muri aka gace.

Houston Rockets ibifashijwemo n’abarimo Chris Paul, yatsinze agace ka gatatu ku manota 26-24 ndetse n’aka kane ku manota 34-33, ariko amanota menshi yatsinzwe mu gace ka mbere ayibera imbogamizi yo gutsinda umukino.

Mu bakinnyi batanu babanje mu kibuga ku ruhande rwa Warriors, buri wese yatsinze amanota arenze 10; ku isonga hari Kevin Durant winjije amanota 29, agarura imipira itanu yari igiye kujya mu nkangara (rebounds), atanga imipira ine yavuyemo amanota, Klay Thompson (amanota 21), Stephen Curry (amanota 20) na Draymond Green (amanota 15).

Houston Rockets imaze gutsindwa imikino ibiri, izakira uwa gatatu uzahuza amakipe yombi ku Cyumweru tariki ya 5 Gicurasi 2019 mu rukerera (saa 02:30). Golden State Warriors ni yo ifite igikombe cya NBA mu nshuro ebyiri ziheruka.

Mu cyiciro kibanza, Golden State Warriors yasezereye Los Angeles Clippers iyitsinze imikino 4-2 mu gihe Houston Rockets yatsinze Utah Jazz imikino 4-1.

Undi mukino wabaye uyu munsi, muri conference y’Uburasirazuba, Milwaukee Bucks yatsinze Boston Celtics amanota 123-102, amakipe yombi anganya umukino umwe kuri umwe.

Boston Celtics yageze muri iki cyiciro nyuma yo gusezerera Indiana Pacers iyitsinze imikino 4-0 mu gihe Milwaukee Bucks yatsinze Detroit Pistons imikino 4-0.

Imikino ya nyuma ya Shampiyona ya mbere ikunzwe ku Isi muri Basketball (NBA Playoffs) yitabirwa n’amakipe umunani yaje imbere muri buri conference, haba mu Burasirazuba no mu Burengerezuba.

Amakipe yo muri conference abanza guhura hagati yayo, agakuranamo aho atanguranwa gutsinda imikino ine ariko ishobora kugera kuri irindwi; ahatanira igikombe cyo mu gace abarizwamo mbere yo gukina umukino uhuza amakipe yitwaye neza mu duce twombi, ahanatorwa umukinnyi witwaye neza muri iyi mikino (MVP).

Draymond Jamal Green Sr. wa Golden State Warriors ahanganye na Chris Paul wa Houston Rockets
Golden State Warriors imaze gutsinda imikino ibiri yayihuje na Houston Rockets
James Harden yakozwe mu jisho mu gace ka mbere k'umukino
Houston Rockets izakira imikino ibiri itaha
Kevin Durant yatsinze amanota 29 ubwo Golden State Warriors yatsindaga Houston Rockets umukino wa kabiri muri Playoffs za NBA
Klay Thompson yatsinze amanota 21 muri uyu mukino
Steph Curry wavunitse urutoki mu gace ka mbere k'umukino akaza kongera kugaruka mu kibuga, yishimira intsinzi ya kabiri y'ikipe ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza