Zone V: U Rwanda rwatsinzwe na Uganda mu bangavu, imikino iba ibiri nta ntsinzi (Amafoto)

Yanditswe na Eric Tony Ukurikiyimfura
Kuya 12 Kamena 2019 saa 10:36
Yasuwe :
0 0

Ikipe y’Igihugu y’u Rwanda y’Abangavu muri Basketball yatakaje umukino wa kabiri mu y’Akarere ka Gatanu igamije gushaka itike ya Afrobasket U-16 izabera mu Rwanda muri Kanama 2019, nyuma yo gutsindwa na Uganda amanota 63-55.

Uyu mukino wabereye kuri Petit Stade i Remera, ku mugoroba wo ku wa 12 Kamena 2019.

U Rwanda rwakiriye iyi mikino, rwatsinzwe na Tanzania mu mukino wabimburiye iyindi ku wa Mbere mu gihe Uganda yatsinze Tanzania kuri uyu wa Kabiri.

Muri uyu mukino wabaye kuri uyu wa Gatatu guhera saa 17:00, abangavu b’u Rwanda n’ubwo batsinzwe, ariko bagaragaje ko hari ibyo bamaze gukosora mu bwugarizi no kwisubiza imipira batakaje ndetse uyu munsi bahatanaga bakinjira mu bwugarizi bwa Uganda.

Ikipe y’u Rwanda yatsinze agace ka mbere k’uyu mukino ku manota 17-14 ndetse n’aka kabiri ku manota 16-15, bajya kuruhuka harimo ikinyuranyo cy’amanota ane (33-29).

Uganda yazamuye amanota yayo mu gace ka gatatu, aho abakinnyi bayo barebare barimo Majjuma Maria na Ajuma Regina bagoye cyane abakinnyi b’u Rwanda, ishyiramo ikinyuranyo cy’amanota atatu mu gihe haburaga amasegonda 44 ngo aka gace karangire, Munezero ayakuramo ku isegonda rya nyuma, banganya 42-42.

Uganda yongeye gutangira agace ka kane iri hejuru, itsinda amanota icyenda u Rwanda rutarabona na rimwe mu minota hafi itanu ibanza.

Usanase Stacy Charlène yatsinze amanota abiri na Munezero Lamla atsinda andi atatu hasigaramo inyuranyo cy’amanota abiri, ariko Majjuma Maria wa Uganda yongeramo andi abiri.

Habura umunota umwe n’amasegonda 25, Umuhamya Ange Promesse yatsindiye u Rwanda amanota abiri, hasigaramo inyuranyo cy’amanota atatu, Uganda yongeramo andi manota ndetse umukino urangira irusha u Rwanda amanota umunani (63-55).

Maria Majjuma wa Uganda yatsinze amanota 31 muri uyu mukino mu gihe Munezero Lamla w’u Rwanda yatsinzemo amanota 17.

Umutoza w’Ikipe y’u Rwanda y’Abangavu, Mushumba Charles, yavuze ko iyi mikino idahagije kugira ngo ikipe izitware neza mu mikino y’Igikombe cya Afurika, ariko yishimira ko urwego rw’abakinnyi rugenda ruzamuka dore ko iyi mikino ibiri bamaze gukina ari ya mbere mpuzamahanga babonye.

Abangavu b’u Rwanda bazagaruka mu kibuga ku wa Kane, aho bazahura n’aba Tanzania mu mukino uzatangira saa 18:00 muri Petit Stade i Remera.

Uganda na Tanzania zizavamo ikipe imwe izabona itike y’imikino ya nyuma y’Igikombe cya Afurika kizabera mu Rwanda guhera tariki 26 Nyakanga kugeza ku ya 4 Kanama 2019, aho umwanya u Rwanda ruzagira muri iyi mikino y’Akarere ka Gatanu nta gaciro gakomeye ufite mu guhatanira itike.

Kapiteni w'u Rwanda Usanase Stacy Charlene adunda umupira mu gihe yegeraga imbere ashaka bagenzi be
Munezero Lamla yatsindiye u Rwanda amanota menshi muri uyu mukino
Tumukunde areba aho anyuza umupira hagati y'abakinnyi ba Uganda
Vladimir Bosnjack utoza ikipe nkuru y'abagabo y'u Rwanda aganira n'umutoza wa Tanzania muri iyi mikino ya Zone V
Namilo Kwagala wa Uganda ashaka kurenza umupira abakinnyi b'u Rwanda
Abakinnnyi b'u Rwanda bagerageza kwambura umupira uwa Uganda
Namuddu Syliva ni umwe mu bakinnyi bakomeye Uganda ifite
Uganda yarushije u Rwanda mu minota ya nyuma
Abafana bari baje gushyigikira ikipe y'igihugu
Umutoza w'u Rwanda Mushumba Charles ashimira abakinnyi be
Umubyeyi Amelia Ella ni we mukinnyi muremure u Rwanda rufite
Abangavu b'u Rwanda batsinzwe umukino wa kabiri
Nyiramugisha Hope yagowe n'umukino wo kuri uyu wa Gatatu
Munezero Lamla azamukana abakinnyi ba Uganda

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza