Espoir BBC yahesheje u Rwanda ishema yegukana Zone 5

Ikipe ya Espoir BBC yitwaye neza mu mikino y’Akerere ka 5 ihesha u Rwanda ishema yegukana iki gikombe ndetse ibona n’itike y’imikino ya Afurika mu makipe (Afro-Basketball Club Championship). Iyi mikino ikaba yarabereye i Kampala muri Uganda kuva ku italiki ya 20 kugeza 26 Kanama 2012.

Ikipe ya Espoir BBC ikaba yaregukanye iki gikombe nyuma yo gutsinda ku mukino wa nyuma ikipe y’Urunani BBC yo mu gihugu cy’Uburundi ku manota 90 kuri 39. Espoir BBC ikaba yarihimuye ku Urunani BBC dore ko mu mikino yo mu matsinda Urunani yari yatsinze Espoir BBC ku manota 68 kuri 66.

Uko Espoir BBC yagiye ikina

Imikino ya Zone 5 yagombaga gutangira ku italiki ya 20 Kanama 2012, ikipe ya Espoir BBC ikaba yarahagurutse mu Rwanda ku cyumweru taliki ya 19 Kanama 2012 aho yajyanwe n’imodoka ya Jaguar. Nk’uko umutoza wungirije Mwiseneza Maxime Marius abitangaza, bageze i Kampala bakiriwe neza aho bakiriwe ahitwa Pope Paul VI Memorial Hotel-Rubaga akaba avuga ko hari heza cyane.

Ikipe ya Espoir BBC ikaba yarashyizwe mu itsinda rya A hamwe n’ Urunani (Burundi), Savio (Tanzania) na Kyambogo Warriors yo muri Uganda naho mu itsinda B harimo KCB (Kenya), D/Powers (Uganda), ABC (Tanzania) n’ikipe yo muri South Sudan.

Imikino Espoir BBC yakinnye yagiye yitwara neza dore ko mu mikino yo mu matsinda yatangiye neza itsinda aho ku munsi wa mbere w’iri rushanwa ku italiki ya 20 Kanama 2012, yatsinze Kyambogo Warriors yo muri Uganda ku manota 72 kuri 56. Ku munsi wa kabiri taliki ya 21 Kanama 2012, Espoir BBC ntabwo byayigendekeye neza aho yatsinze n’Urunani BBC ku manota 68 kuri 66. Espoir BBC n’abasore bayo ariko ntabwo bacitse intege kuko ku munsi wa 3 taliki ya 22 Kanama 2012 bitwaye neza aho batsinze Savio yo muri Tanzania ku manota 90 kuri 51.

Ikipe ya Espoir BBC nyuma yo gutsinda iyi mikino 2 ikaba yarasoje imikino yo mu matsinda ari iya mbere. Aha n’ubwo Espoir BBC yatsinzwe umukino 1 habazwe ikinyuranyo cy’amanota. Ikipe ya Espoir BBC ikaba yarahuye muri ½ na D/Powers yo muri Uganda yari ku mwanya wa 2 dore ko KCB ariyo yari ku mwanya wa mbere aho nta mukino yatsinzwe mu matsinda.

Muri ½ , Espoir BBC yitwaye enza maze itsinda D/Powers ku manota 67 kuri 54 naho Urunani y’I Burundi itsinda KCB. Ubwo Espoir BBC n’Urunani BBC nizo zahise zibona itike y’umukino wa nyuma.

Umukino wa nyuma w’imikino ya Zone 5 ikaba yarabaye ku cyumweru taliki ya 26 Kanama 2012, uyu mukino ukaba warabanjirijwe n’umukino wo guhatanira umwanya wa 3 aho D/Powers yo muri Uganda yatsinze KCB yo muri Kenya.

Umukino wa nyuma rero, Urunani BBC y’i Burundi niyo yahabwaga amahirwe yo kwegukana iki gikombe dore ko yari igiye kongera guhura na Espoir BBC kandi mu mikino yo mu matsinda Urunani BBC yari yatsinze Espoir BBC ku manota 68 kuri 66. Benshi rero bari bazi ko bigiye kongera kuba. Uko byari byitezwe rero byaje guhinduka cyane maze Espoir BBC itsinda itababariye Urunani BBC ku manota 90 kuri 39, aha abakinnyi nka Mugabe Arstide, Habineza Jean Louis n’abandi bakabarigaragaje cyane.

Ikipe ya Espoir ikaba yaratwaye iki gikombe cya Zone 5 ibifashijwemo n’abannyi bayo barimo Wazayira Christophe (Captaine), Mugabe Arstide, Habineza Jean Louis (V/Captaine), Barame A. Ally, Muhire Elibo, Ngandu Bienvenu, Kabange Kami, Twiringiyimana Jacques, Muganirwa Eric, Emile na Intwali Christian. Aba bakinnyi baka bari kumwe n’umutoza wabo Bahufite John n’umwungiriza we Mwiseneza Maxime Marius.

Espoir BBC ikaba ishimira Minisiteri y’umuco na Siporo ndetse n’ishyirahamwe ry’umukino wa Basketball mu Rwanda ku nkunga babateye n’uburyo bababaye hafi muri iri rushanwa. Bakaba banashima kandi ubwitange bw’abayobozi b’ikipe aribo Perezida Rutagarama Fidele ndetse na V-Perezida Pierre babaye iyi kipe hafi kugeza ku munsi wa nyuma.

Imvaho Nshya