IGIHE.com > Imikino > Football
Arsene Wenger avuga ko hari igihe abafana ba Arsenal bazamwifuza

Arsene Wenger avuga ko hari igihe abafana ba Arsenal bazamwifuza


Yanditswe kuya 19-02-2013 - Saa 11:19' na IGIHE

Umutoza w’ikipe ya Arsenal y’umupira w’amaguru wo mu Bwongereza Arsene Wenger, aratangaza ko abafana b’iyi kipe bazicuza igihe azaba atagitoza iyi kipe.

Ni nyuma y’uko mu mpera z’icyumweru gishize abafana b’iyi kipe bari bamurakariye cyane bitewe n’uko Arsenal yasezerewe mu mikino y’igikombe cya FA n’ikipe ya Blackburn Rovers yo mu cyiciro cya kabiri; nyamara ngo hari abakinnyi atari yakinishije aba bafana bavuga ko iyo bakina bari gutuma ikipe yabo yitwara neza igakomeza kuba mu makipe ahatanira FA.

Wenger w’imyaka 63 afite imikino ikomeye muri iki cyumweru irimo uwo akina na Bayern Munich kuri uyu wa kabiri mu marushanwa y’amakipe yabaye aya mbere iwayo ku mugabane w’u Burayi, n’uwo azakina na Aston Villa mu mpera z’iki cyumweru muri shampiyona.

Iyi mikino yombi iratuma abakunzi ba Arsenal botsa igitutu umutoza wabo banamushinja ubuswa, ariko we akavuga ko igihe azaba atakiri muri iyi kipe bazamwifuza. Ati “Nzi neza ko muzanyifuza igihe nzaba naragiye. Amasezerano yanjye ararangira muri 2014 aho nzaba nujuje imyaka 30 ndi ku rwego rwo hejuru nta guhagarikwa. Ruhago isaba ubwitange bwinshi.”

Arsene Wenger avuga ko abafana ba Arsenal bazamukenera batakimubonye

Mu mukino wo kuri uyu wa kabiri Wenger arashaka ko nibura ikipe ye yanganya nk’uko ikinyamakuru the sun dukesha iyi nkuru kibigaragaza mu magambo yagitangarije agira ati “Ubusa ku busa uri iwawe ni ibintu byiza muri uru rwego rwo gukuranamo [kw’amakipe]. Turagerageza gutsinda, ariko ubusa ku busa si igikuba kiba gicitse. Mu Burayi haba amakipe meza nka Barcelone na Real Madrid ariko na yo ntatwara ibikombe buri mwaka!”

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO