Kwamamaza

Abafana ba Rayon Sports batangiye gukusanya amafaranga yo kugarura Cedric

Yanditswe kuya 30-11-2016 saa 15:53' na Manzi Rema Jules


Abafana ba Rayon Sports barashaka kwisubiza rutahizamu mpuzamahanga w’umurundi, Hamis Cedric wahoze abakinira ndetse akahagirira ibihe byiza kuri ubu udafite ikipe nyuma yo kurangiza amasezerano muri Chibuto FC yo muri Mozambique.

Uyu mukinnyi uri i Kigali, byari bimaze iminsi bivugwa ko ashobora kugaruka muri Rayon Sports ndetse ibiganiro byari byaratangiye, nawe yamaze kwemerera ubuyobozi ko yiteguye kugaruka agafatanya n’abandi urugendo rwo gushaka igikombe cya shampiyona no mu marushanwa Nyafurika ya CAF Confederation Cup iyi kipe izahagarariramo u Rwanda.

Ubuyobozi bw’abafana b’iyi kipe, bwafashe iya mbere bwiyemeza gutangira gukusanya amafaranga uyu mukinnyi akeneye dore ko ari mu babashije kubashimisha bidasanzwe abahesha igikombe cya shampiyona bari bamaze hafi imyaka 10 barota, inzozi zaranze kuba impamo.

Aganira na IGIHE, Muhawenimana Claude uyobora abafana ba Rayon Sports yagize ati “Ikipe yacu ni iy’abafana. Ubuyobozi buba bufite inshingano nyinshi zirimo gushaka imishahara kugira ngo abakinnyi bakomeze kwitwara neza kandi babone ibyo bemerewe. Niyo mpamvu twahisemo nk’abafana ko twahagurukira rimwe tugakora ibishoboka byose tukabona amafaranga yo kwigurira umukinnyi waduhaye ibyishimo bidasanzwe akidukinira.”

Muhawenimana avuga ko atatangaza amafaranga Cedric yasabye kuko hari amakipe y’abakeba amushaka yanatangiye kumwegera nubwo we ashaka gukinira Rayon Sports.

Aya mafaranga ngo agomba kuboneka bitarenze Ukuboza 2016 kugira ngo muri Mutarama azahite ashyira umukono ku masezerano y’umwaka yemeye, noneho afatanye n’abandi mu gushakira iyi kipe ifite inkomoko I Nyanza ibikombe.

Nk’uko Muhawenimana abivuga, igikorwa cyo gukusanya inkunga kizakorerwa muri fan Club zitandukanye aho abazigize bazajya bakusanya amafaranga noneho akazahurizwa hamwe yaba menshi kurenza ayo Cedric yasabye akaba yanakoreshwa mu bindi bikorwa biteza imbere ikipe.

Rayon Sports kuri ubu ifite abanyamahanga bane bituma umwe atagomba kugaragara mu bakinnyi 18 bitewe n’amategeko y’umupira w’amaguru mu Rwanda yemera batatu gusa ariko ngo kubera ubuhanga budasanzwe bwa Cedric, kuza kwe ngo byatuma n’abandi batirara, ariko akazi ke gakomeye kakaba ari ako gufasha Rayon Sports kugera kure muri CAF Confederation Cup.

Hamis Cedric ni umwe bakinnyi batazibagirana mu mitima y’abakunzi ba Rayon Sports ahanini kubera uruhare rwe mu kwegukana igikombe cya shampiyona cya 2013 atsinze ibitego 16 mu mikino 14 ya shampiyona yakinnye by’umwihariko n’urukundo yakunze kugaragaza ko afitiye iyi kipe na nyuma yo kuyivamo muri 2014 kubera ibihano byo guhagarikwa amezi atandatu yari yafatiwe na Ferwafa imushinja uruhare mu mvururu zakurikiye umukino wa AS Kigali na Rayon Sports, wabaye ku wa 20 Mata 2014.

Hamis nagaruka muri Rayon Sports azaba yiyongereye ku bandi Barundi barimo Nahimana Shasiir na Kwizera Pierrot bakinana no mu ikipe y’igihugu ‘Intamba mu Rugamba’.

Hamis Cedric(wambaye umweru) yamaze kwemera kugaruka muri Rayon Sports
Cedric amaze iminsi akorana imyitozo n'abakinnyi ba Rayon Sports
Bitewe n'ibyishimo Cedric yabahaye, abafana ba Rayon Sports batangiye gukusanya amafaranga yo kumugarura

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved