Abahohotera abana tubafata nk’abanzi b’igihugu - Guverineri Mufulukye

Yanditswe na Hakizimana Jean Paul
Kuya 30 Mata 2019 saa 09:28
Yasuwe :
0 0

Guverineri w’Intara y’Iburasirazuba, Mufulukye Fred, yavuze ko umuturage uhohotera umwana ndetse n’undi uwo ari we wese, akwiye gufatwa nk’umwanzi w’igihugu kuko aba atacyifuriza ibyiza.

Ni ubutumwa yatanze kuri uyu wa Kabiri mu Murenge wa Kibungo mu Karere ka Ngoma, ubwo Urwego rw’ubugenzacyaha, RIB, rwatangizaga ubukangurambaga bugamije kurwanya ihohoterwa.

Ubu bukangurambaga bufite insanganyamatsiko igira iti “Sobanukirwa ibyaha ubyirinde ubirinde n’abandi: turwanye ihohoterwa rishingiye ku gitsina n’irikorerwa abana.”

Guverineri Mufulukye yagize ati “Umuturage wese uzajya ugaragarwaho biriya byaha byo guhohotera, twebwe tumufata nk’umwanzi w’igihugu by’umwihariko abatera abana b’ababangavu inda nabo tubafata kimwe na bariya bahungabanya umutekano.”

“Iyo ufashe ku ngufu umwana ukamutera inda, Sida ndetse n’izindi ndwara zidakira, uba wishe igihugu kuko uba wangije umuyobozi w’ejo hazaza.”

Yasabye abaturage gufatanya n’ubuyobozi mu kurwanya abo bantu, bagatanga amakuru. Yanabasabye gukoresha neza Isibo, umugoroba w’ababyeyi, inteko z’abaturage n’irondo ry’umwuga mu gukumira ibi byaha.

Umunyamabanga Mukuru wa RIB, Col. Ruhunga Jeannot, yavuze ko mu bituma ibi byaha by’ihohoterwa bidacika burundu ari uko abantu batarabisobanukirwa neza ngo babyange, babivuge bicike burundu.

Yavuze ko leta yazamuye ibihano ku bantu bakora ihohotera, urugero nko ku muntu mukuru wafashe ku ngufu umwana uri munsi y’imyaka 14, ubihamijwe akatirwa igifungo cya burundu.

Ati “Turabasaba kudakomeza guhishira abantu bahohotera abandi kuko kubahishira bituma iki cyaha kidacika. Mureke tucyange kandi dutangire amakuru ku gihe ku bantu baba bahohoteye abandi.”

Umunyamabanga uhoraho muri Minisiteri y’iterambere ry’umuryango, Umutoni Gatsinzi Nadine, yavuze mu minsi iri imbere hagiye gushyirwa serivisi za Isange One Stop Center ku bigo nderabuzima byose, hagamijwe kwegereza iyi serivisi abaturage.

Urwego rw’ubugenzacyaha rugaragaza ko kuva muri Mata 2018 kugeza muri Werurwe 2019, mu gihugu hose hakozwe ibyaha ibihumbi 39, ibyaha by’ihohoterwa bingana n’ibihumbi bitandatu, rikaba ari naryo ryihariye ibyaha byinshi bingana na 27%.

Mu Karere ka Ngoma ho kuva muri Mata 2018 kugeza muri Werurwe 2019 ibyaha byo gusambanya abana ni 215, gufata kungufu ni 17, guhozwa ku nkeke ni 34, ubushoreke ni 4 n’ibyaha bibiri by’ubusambanyi.

Col. Ruhunga yasabye abaturage gutangira amakuru ku gihe hagamijwe gukumira ibyaha
Umunyamabanga uhoraho muri Migeprof, Umutoni Nadine, yavuze ko hakenewe uruhare rwa buri wese mu kurwanya ihohoterwa rikorerwa abana
Guverineri Mufulukye Fred asanga abahohotera abana bakwiye gufatwa nk'abanzi b'igihugu
Umunyamabanga Mukuru wa RIB Col. Jeannot Ruhunga, Umunyamabanga uhoraho muri Migeprof Umutoni Nadine ndetse na Guverineri Mufulukye Fred mu itangizwa ry'ubu bukangurambaga
Umuyobozi w'Ingabo mu Ntara y'Iburasirazuba Gen Maj Mubarakh Muganga yitabiriye iki gikorwa
Hifashishijwe umukino mu kugaragaza ububi bw'ihohoterwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza