Abakinnyi 11 ba Rayon Sports bacakirana na Mukura VS mu mukino w’imibare myinshi

Yanditswe na Manzi Rema Jules
Kuya 16 Ukuboza 2016 saa 02:18
45 31

Rayon Sports yamaze gushyira ahagaragara abakinnyi 11 igomba gukoresha kuri uyu wa Gatanu saa 15h30 ihura na Mukura VS kuri Stade ya Huye mu mukino ishakamo amanota atatu byanze bikunze yo kuyifasha kwizera gukomeza kuyobora urutonde rwa shampiyona.

Rayon Sports yaraye i Huye aho yagiye gushaka amanota atatu y’umunsi wa cyenda yo kuyifasha gukomeza kwicara ku mwanya wa mbere iracakirana na Mukura VS nayo ishaka amanota atatu ku bubi n’ubwiza kugira ngo ive mu myanya mibi aho ihagaze kuwa munani n’amanota 11, mu gihe yihaye intego yo gutwara igikombe uyu mwaka.

Umutoza wa Rayon Sports, Masoudi Djuma udafite ba myugariro barimo Manzi Thierry na Ange Mutsinzi bavunitse, mu mutima w’ubwugarizi yitabaje Rwigema Yves iyi kipe yakuye muri APR FC usanzwe ukina ku ruhande akaza gufatanya na Munezero Fiston.

Rayon Sports ishaka no kugumana agahigo ihuriyeho na APR FC na Espoir FC ko kuba zitaratsindwa muri shampiyona uyu mwaka, yagaruye umuzamu wa mbere akaba na kapiteni Ndayishimiye Eric Bakame utarakinnye umukino uheruka byanatumye itakaza akandi gahigo yari ifite ko gukina imikino irindwi itinjizwa igitego.

Iyi kipe ifite amanota 22 iramutse itakaje uyu mukino ishobora guhita itakaza umwanya wa mbere ugafatwa na mukeba APR FC ya kabiri n’amanota 20 igihe yo yaba yabashije gutsinda Kiyovu Sports ku Cyumweru mu mukino uzabera kuri stade ya Kigali.

Abakinnyi 11 ba Rayon Sports babanza mu kibuga:

Mu izamu: Ndayishimiye Eric Bakame

Ba myugariro: Eric Irambona, Rwigema Yves, Munezero Fiston, Nzayisenga Jean d’Amour Mayor

Abakina hagati: Niyonzima Olivier Sefu, Kwizera Pierrot, Manishimwe Djabel, Nahimana Shassir, Savio Nshuti Dominique

Rutahizamu: Moussa Camara

Rayon Sports irasabwa gutsinda uyu mukino kugira ngo igumane umwanya wa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE