Abakinnyi 11 ntasimburwa Kodo yakinanye nabo kuva yatangira ruhago

Yanditswe na Manzi Rema Jules
Kuya 28 Ukuboza 2016 saa 11:25
Yasuwe : XX
0

Nshutinamagara Ismael bita ‘Kodo’, wakiniye amakipe nka Marines FC, Kiyovu Sports, Atraco FC, APR FC na AS Kigali akinira ubu nka myugariro, yatangaje ko yakinanye n’abakinnyi benshi bafite ubuhanga buhanitse, ariko ngo hari 11 b’ibihe byose yemeza ko bamurutiye abandi mu gihe amaze akina umupira w’amaguru.

Uyu mukinnyi wamaze imyaka hafi 10 akinira APR FC ari nayo yakoreyemo amateka menshi dore ko yatwaranye nayo ibikombe birindwi bya shampiyona, bitanu by’Amahoro na CECAFA imwe, ndetse akanayibera kapiteni, aganira na IGIHE, yagaragaje abakinnyi 11 bakinanye nabo beza kurusha abandi ku giti cye.

Ati “Aba ni abakinnyi 11 beza nahisemo mu bo twakinanye aho nagiye nyura hose. Birumvikana mu myaka maze mu mupira w’amaguru kandi nkina mu makipe akomeye, hari abakinnyi b’abahanga benshi nakinanye nabo, ariko hari ikintu cy’ingenzi nagendeyeho mpitamo buri umwe ku mwanya we.”

Ndizeye Aimé Désiré (Ndanda): Kodo avuga ko yakinanye n’abazamu bakomeye ariko ngo yahisemo Ndanda kubera ikintu yari yihariye cyo kumenya guhagarika ba myugariro bamuri imbere, akamenya kuvuga ndetse no mu buzima busanzwe ngo yari umuntu mwiza cyane.

Mbuyu Twite bakinanye muri APR FC no mu ikipe y’igihugu, Amavubi, amuvugaho yagize ati “Nakinanye nawe. Ni myugariro mwiza, utemera gutsindwa kandi imikinire ye na bagenzi be ni myiza; ni nawe nigiyeho ibintu byinshi byamfashije kumara igihe kinini nkina ku rwego rwo hejuru haba mu ikipe y’igihugu no mu makipe nanyuzemo.”

Amoroso bakinanye muri Atraco FC, Kodo amusobanura nk’umukinnyi wari myugariro mwiza uzi guhagarika neza bagenzi be bakinanaga mu bwugarizi ndetse akaba umwe mu bakinnyi batakundaga gukora amakosa menshi.

Nizigiyimana Karim “Mackenzi”:“Namuhisemo kubera ko ari myugariro ariko ufasha ikipe ye gusatira cyane kandi akanagaruka gufasha ubwugarizi.

Kayizi Vincent: Amugarukaho yagize ati “Yari umuntu wakinaga ibintu bike ariko byiza kandi mu gihe nyacyo. Yari azwiho gutanga imipira miremire igera neza ku kirenge cy’uwo yashakaga guha.”

Sebaringa Mike: “Ni umukinnyi wakinaga ku ruhande rw’iburyo ariko w’umuhanga. Mu by’ukuri iyo yabaga afite umupira nta muntu wapfaga kuwumwambura. Kandi na we yari umukinnyi watsindaga.”

Haruna Niyonzima bakinanye muri APR FC no mu ikipe y’igihugu, Amavubi, Kodo amusobanura nk’umukinnyi uzi kuyobora bagenzi be neza mu kibuga akamenya icyo abaganiriza igihe bashaka gutsinda. Avuga ko Haruna adakunda gutsinda ibitego byinshi ariko atanga imipira myiza ivamo ibitego.

Mafisango Patrick:Na we babanye muri APR FC no mu ikipe y’igihugu, Amavubi, avuga ko yari umukinnyi mwiza, wahoranaga ishyaka ryo gushaka intsinzi kandi ko nta na rimwe ngo wari kumubona yataye icyizere kabone n’iyo babaga batsinzwe bashaka kwishyura, akemeza ko ari ikintu utasangana abakinnyi benshi.

Karekezi Olivier: Bakinanye muri APR FC no mu ikipe y’igihugu, Amavubi, agaruka ku buhanga bwe yagize ati “Uyu we kumuvugaho byinshi kwaba ari ukwigiza nkana. Yari umuhanga cyane kandi atsinda ibitego byiza.”

Bokota Labama: Bakinanye muri APR FC no mu ikipe y’igihugu, Amavubi,yamuvuzeho agira ati “Bitandukanye n’igihagararo cye, yari umukinnyi mwiza ushobora kugumana umupira, ushobora gucenga, uzi no gutsinda kandi ni byo biba bikenewe hariya imbere (mu busatirizi).”

Kodo ashimangira ko iyi kipe ye yatozwa na Michael Nees watoje Amavubi hagati ya 2006 na 2007. Ahamya ko yari umutoza mwiza, ucishije make kandi umenya kubana n’abakinnyi.

Kuri Kodo ngo Karekezi Olivier si umukinnyi wo kuvugaho byinshi kuko ubuhanga bwe bumusobanura
Nubwo Haruna adatsinda cyane ibitego, Kodo amubonamo ubuhanga cyane bwo gutanga imipira ivamo ibitego
Kodo avuga ko Mbuyu Twite (hagati) yamwigiyeho byinshi mu gihe bakinanaga
Kodo(inyuma) nawe ngo yibonamo ubuhanga ari nabwo butuma yaragiye agirirwa icyizere n'amakipe akomeye
Abakinnyi yatoranyije n'uko bapanze mu kibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza