Abakinnyi ba Rayon Sport bemerewe agahimbazamusyi ka 400 000 Frw nibakuramo Al Hilal

Yanditswe na Ndayikunda Josué
Kuya 22 Kanama 2019 saa 10:58
Yasuwe :
0 0

Abakinnyi ba Rayon Sports bemerewe agahimbazamusyi k’ibihumbi 400 Frw kuri buri wese mu gihe babasha gukuramo ikipe ya Al Hilal Omdruman yo muri Sudani mu ijonjora ribanza rya CAF Champions League.

Iri sezerano barihawe ku mugoroba wo ku wa Kane, tariki ya 22 Kamena 2019 ubwo bagiranaga ikiganiro n’abayobozi ba Rayon Sport mbere yo gufata rutemikirere berekeza i Khartoum muri Sudani.

Rayon Sports izisobanura na Al-Hilal Omdruman mu mukino wo kwishyura uzabera muri Sudani ku wa 25 Kanama 2019 nyuma yo kunganyiriza i Kigali igitego 1-1.

Perezida wa Rayon Sports, Munyakazi Sadate, yasabye abakinnyi kuzasezerera Al Hilal cyane ko kuvana intsinzi mu mahanga ari ibintu bamenyereye.

Ati “icyo dusabye abakinnyi kandi twese twifuza ni intsinzi, twifuje yuko twazatsinda Al-Hilal tukayisezerera amateka akisubiramo nyuma y’imyaka 25 [icyo gihe yayisezereye muri CAF Winners Cup]. Twabwiye abakinnyi ko byose bishoboka, imikino myinshi bayitsindiye hanze, ko n’aka kanya kuba batsindira Al-Hilal hanze ari ibintu bishoboka.”

Perezida Munyakazi yasuye abakinnyi ari kumwe na Visi Perezida Twagirayezu Thaddée n’abandi bari muri komite ya Rayon Sports.

Mu byo bemereye abakinnyi harimo kuzahabwa agahimbazamusyi k’ibihumbi 400 Frw mu gihe bakuramo Al Hilal yo muri Sudani. Ubusanzwe bahabwa 25 ooo Frw by’agahimbazamusyi ku mukino batsinze

Kapiteni wa Rayon Sports, Rutanga Eric, yavuze ko batagiye muri Sudani gutsindwa nubwo bajyanye n’Umutoza Kayiranga Baptiste bamaranye igihe gito.

Yagize ati “Tugiye muri Sudani kwegukana intsinzi, ntabwo tugiye gutsindwa bitewe n’imyitozo twakoze nuko abakinnyi tuganira. Umutoza navuga ko atari mushya kuri twe kuko abakinnyi 80% arabazi kandi natwe turamuzi. Nkeka iyo haza kuba wenda undi mutoza uturutse mu kindi gihugu byo byari kugorana, ndakeka nta mbogamizi.”

Rayon Sports irahaguruka i Kanombe saa 00:15 n’indege ya Ethiopian Airways n’abakinnyi 19, umukino ukaba uteganyijwe ku Cyumweru tariki ya 25 Kanama 2019 ku isaha ya saa 19:30 muri Sudani.

Ikipe izakomeza hagati ya Rayon Sports na Al Hilal izahura n’izaba yakomeje hagati ya Rahimo FC yo muri Burkina Faso na Enyimba FC yo muri Nigeria, mu cyiciro gikurikira.

Abakinnyi 19 Rayon Sports ijyana muri Sudani: Bizimana Yannick, Ciza Hussein, Habimana Hussein, Iradukunda Eric, Iragire Saidi, Irambona Eric, Iranzi Jean Claude, Kakule Mugheni Fabrice, Kimenyi Yves, Mazimpaka André, Mugisha Gilbert, Nizeyimana Mirafa, Nshimiyimana Imran, Nyandwi Saddam, Rugwiro Hervé, Rutanga Eric, Sarpong Michael, Sekamana Maxime na Ulimwengu Jules.

Abandi bajyana n’abakinnyi: Munyakazi Sadate (Perezida w’ikipe), Kayiranga Baptiste (Umutoza mukuru), Kirasa Alain (Umutoza wungirije), Mwiseneza Djamal (umutoza wongerera ingufu abakinnyi), Kalyesubura Hannington utoza abanyezamu, Mugemana Charles (Umuganga), Nkubana Adrien (Team Manager), Nkurunziza Jean Paul (Ushinzwe itangazamakuru), Rukundo Fidèle (Uyobora Komisiyo y’imyitwarire), Nkurunziza Emmanuel (Umunyamakuru) na Ganza Gisa (Umufana).

Perezida wa Rayon Sports, Munyakazi Sadate, yasabye abakinnyi kongera kwandika amateka nk'ayakozwe mu myaka 25 ishize
Abakinnyi ba Rayon Sports babanje gufata amafunguro mbere yo gufata rutemikirere igana muri Sudani
Kapiteni wa Rayon Sports, Rutanga Eric, yavuze ko bizeye kwitwara neza muri Sudani
Kayiranga Baptiste wahawe gutoza Rayon Sports na Kirasa Alain umwungirije bafite inshingano zo gukuramo Al-Hilal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza