Abakinnyi batatu bakomoka muri Afurika nibo batsinze ibitego byinshi muri Premier League

Yanditswe na Eric Tony Ukurikiyimfura
Kuya 13 Gicurasi 2019 saa 03:52
Yasuwe :
0 0

Ba rutahizamu batatu b’abanyafurika bakina muri Premier League; umunya-Misiri Mohamed Salah, Umunya-Sénégal, Sadio Mané na Pierre-Emerick Aubameyang ukomoka muri Gabon basoje shampiyona y’u Bwongereza ari bo batsinze ibitego byinshi, aho babonye inshundura inshuro 22.

Umunya-Gabon, Pierre-Emerick Aubameyang yatsinze ibitego bibiri mu mukino ikipe ye yatsinzemo Burnley ku munsi wa nyuma wa Premier League kuri iki Cyumweru, anganya ibitego na Mohamed Salah na Sadio Mane bakinira Liverpool, nyuma y’uko uyu munya-Sénégal na we atsindiye ikipe ye ibitego bibiri bakina na Wolves.

Aba bakinnyi bahise batambuka kuri Sergio Kun Agüero wa Manchester City we wasoje shampiyona afite ibitego 21.

Mohamed Salah yegukanye iki gihembo cy’umukinnyi watsinze ibitego byinshi mu Bwongereza ku nshuro ya kabiri yikurikiranya, aho mu mwaka ushize yaciye agahigo ko gutsinda ibitego 32 mu mikino 38.

Ni ku nshuro ya mbere abatsinze ibitego byinshi bagize bike muri Premier League guhera mu 2010/11 ubwo Dimitar Berbatov na Carlos Tevez banganyaga ibitego 20.

Mu kiganiro yagiranye na BBC, Aubameyang yishimiye kunganya ibitego n’abakinnyi akunda ndetse b’abanyafurika.

Ati” Ni igihembo nsangiye n’abandi babiri nkunda, abakinnyi bakomeye kandi bakomoka muri Afurika. Duhagarariye Afurika, birashimishije.”

Umutoza wa Liverpool, Jürgen Klopp yavuze ko ashimishijwe no kuba abakinnyi bose batsinze ibitego byinshi uyu mwaka yarabatoje dore ko Aubameyang yamutoje muri Borussia Dortmund nyuma yo kumukura muri Saint-Étienne mu 2013.

Ati "Na Aubameyang yagize 22? Ubwo se bafite ibihembo bitatu babaha? Ni byiza. Bose ni abakinnyi banjye.”

Mohamed Salah yabaye umukinnyi wa gatandatu ubashije kwegukana igihembo cy’umukinnyi watsinze ibitego byinshi muri Premier League ku nshuro ebyiri zikurikiranya.

Harry Kane wa Tottenham ni we waherukaga kubigeraho ubwo yasozaga shampiyona ayoboye abandi mu 2015/16 na 2016/17 ariko uyu mwaka yibasiwe n’imvune asoza afite ibitego 17 gusa.

Mohamed Salah yegukanye igihembo cy'umukinnyi watsinze ibitego byinshi muri Premier League ku nshuro ya kabiri yikurikiranya
Salah na Sadio Mane bombi bakinira Liverpool, banganyije ibitego 22
Umunya-Gabon ukinira Arsenal, Pierre-Emerick Aubameyang na we yatsinze ibitego 22
Sergio Aguero wa Manchester City yatwaye shampiyona, yatsinze ibitego 21

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza