Kwamamaza

Abasirikare bakuru bakurikiye imyitozo ya mbere ya Jimmy Mulisa muri APR FC (Amafoto)

Yanditswe kuya 1-12-2016 saa 07:55' na Manzi Rema Jules


Jimmy Mulisa watangajwe nk’umutoza mukuru wa APR FC kuri uyu wa Kabiri, yatangiye gukoresha imyitozo yakurikiwe n’abayobozi bakuru b’iyi kipe y’Ingabo z’Igihugu barimo Perezida wayo Maj Gen Jacques Musemakweli.

Kuri Stade ya Kicukiro imbere y’abafana batari bake na bamwe mu bayobozi ba APR FC nka Perezida wayo Maj Gen Jacques Musemakweli na Col. Geoffrey Kabagambe uyobora abafana; Umutoza Mukuru Jimmy Mulisa ari kumwe n’uzamwungiriza, Yves Rwasamanzi, wari umaze iminsi ariwe uyoboye iyi kipe, bakoresheje imyitozo yagombaga gutangira saa 15:30 ariko imvura ituma itinda.

Mulisa wabaye umukinnyi ukomeye muri APR FC kuva 2002 kugera 2005 agatwarana nayo ibikombe bibiri bya shampiyona mbere yo kwerekeza i Burayi, yatangaje ko intego zimuzanye ari ukubakira ku muco w’ikipe wo gutwara ibikombe ndetse akaba yishimiye abakinnyi yasanze.

Perezida w'abafana ba APR FC, Col. Geoffrey Kabagambe (ubanza iburyo) na Perezida wayo Maj Gen Jacques Musemakweli (umukurikira) bari ku myitozo

Ati “Ntabwo ndasinya ariko mu minsi iri imbere nshobora kubikora. Ibyangombwa byo twarabivuganye ntegereje gusinya gusa. Ikinzanye ni ugutoza, n’ubundi intego za APR FC ni za zindi, iba ishaka gutsinda nk’ikipe ya mbere ikagumana shampiyona ndetse no kwitwara neza muri Champions League.”

Mulisa aje muri APR FC ayisanga ku mwanya wa munani n’amanota umunani irushwa na mukeba Rayon Sports ya mbere amanota umunani nubwo igifite imikino ibiri y’ibirarane.

Yavuze ko uyu ari umwanya wo kugaragaza ibyo azi kandi afitiye ubunararibonye bw’imyaka hafi 17 amaze mu mupira.

Ati “Mfite amahirwe ko nagiye gukina hanze, natojwe n’abatoza benshi ku buryo hari ibyo nibuka nanjye nzakoresha uretse ko hari n’ibindi niga buri munsi. Kugeza ubu mfite impamyabumenyi ya B muri CAF, mfite indi ya B nakuye mu Budage n’amahugurwa atandukanye ya FIFA nakoze.”

Mu kazi gakomeye gategereje Mulisa muri iyi kipe y’Ingabo z’Igihugu harimo kugarura umwuka mwiza mu bakinnyi aho bivugwa ko ubwo bari muri Congo Brazzaville mu irushanwa bari batumiwemo bagasezererwa ku ikubitiro, habayemo kutumvikana ndetse bamwe mu bakinnyi bagaragaza gusuzugura Yves Rwasamanzi bikomeye.

Ikindi ni ugufasha iyi kipe ifite igikombe cya shampiyona giheruka kwitwara neza by’umwihariko ku mikino y’ibirarane izahura na Kirehe FC ndetse na Pepiniere FC kugira ngo igabanye ikinyuranyo hagati yayo na Rayon Sports. APR FC izahura na Rayon Sports ku munsi wa 14 wa shampiyona tariki 20 Mutarama 2017.

Mulisa wari usanzwe ari umuyobozi wa tekinike mu Mavubi akanayabera umutoza wungirije, uretse amateka meza yagize nk’umukinnyi anamushyira mu Banyarwanda bake bakinnyi ku rwego rwo hejuru ku mugabane w’u Burayi na Aziya, yatangiye urugendo rw’ubutoza muri Sunrise FC mu myaka ibiri ishize nubwo atayitinzemo.

Mwiseneza Djamal (wambaye nimero 25) umaze igihe kinini mu mvune nawe yari kumwe na bagenzi be
Maj Gen Jacques Musemakweli nyuma y'imyitozo yagaragazaga akanyamuneza ku maso
Abakinnyi bose bari mu byishimo
Nyuma y'imyitozo, Maj Gen Jacques Musemakweli yaramukanyije n'abakinnyi
Jimmy Mulisa asuhuza abayobozi b'ikipe ye
Bagiranye akanama gato
Jimmy Mulisa ngo agiye gukoresha ubunararibonye bw'imyaka 17 mu mupira w'amaguru

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved