Abouba Sibomana twaraganiriye ariko ntacyo nakwizeza abakunzi ba Rayon Sports –Gakwaya

Yanditswe na Manzi Rema Jules
Kuya 4 Mutarama 2017 saa 06:51
Yasuwe : XX
0

Rayon Sports yatangiye ibiganiro na myugariro Abouba Sibomana wahoze ayikinira mbere yo kujya muri Gor Mahia yo muri Kenya ariko ubuyobozi buratangaza ko ntaho biragera ku buryo bwakwizeza abakunzi bayo kongera kumubona mu mwenda w’ubururu n’umweru mu gihe cya vuba.

Sibomana Abouba wasoje amasezerano muri Gor Mahia, amaze iminsi akorera imyitozo muri Rayon Sports aho bivugwa ko iyi kipe y’i Nyanza yahoze akinira mbere yo kujya muri Kenya ishaka kumugarura akaba yayifasha mu bwugarizi bwayo bukomeje kwibasirwa n’imvune za hato na hato.

Mu kiganiro, Umunyamabanga wa Rayon Sports, Gakwaya Olivier yagiranye na IGIHE yavuze ko batangiye ibiganiro kugira ngo uyu mukinnyi agaruke ariko ntacyo birageraho.

Ati “Mu mikino Nyafurika (CAF Confederation cup) tuzitabira birasaba ko tuba dufite ikipe ikomeye. Bimaze kumenyerwa ko amakipe yo mu Rwanda aviramo ku ikubitiro ariko turashaka guhindura ayo mateka. Hari abakinnyi tuzongeramo ariko tuzabatangaza ibiganiro byarangiye.”

Abajijwe kuri Abouba Sibomana bivugwa ko ari mu ba mbere iyi kipe ikeneye yagize ati “Abouba Sibomana twaraganiriye ariko ntacyo nakwizeza abakunzi ba Rayon Sports. Kugeza ubu nta kintu turumvikana.”

Amakuru agera ku IGIHE ni uko uyu mukinnyi kimwe na mugenzi we bakinanaga muri Gor Mahia, Nizigiyimana Karim Mackenzi bari ku rutonde rw’abakinnyi Rayon Sports yatanze izakoresha mu marushanwa Nyafurika ya CAF Confederation Cup, izatangira gukina hagati ya tariki 10 -12 Gashyantare 2017 icakirana na Al Salam yo muri Sudani y’Epfo.

Amahirwe ya Abouba yo kuguma muri Gor Mahia yayoyotse ubwo iyi kipe ikunzwe bikomeye muri Kenya yasinyishaga Umunyarwanda, Mugiraneza Jean Baptiste Migi mu mpera z’umwaka ushize na we wari umaze gutandukana na Azam FC yo muri Tanzania yakiniraga.

Nyuma yo kurangiza amasezerano muri Gor Mahia, Sibomana Abouba arifuzwa na Rayon Sports
Ibiganiro bigenze neza, Abouba Sibomana ashobora kugaruka muri Rayon Sports
Mackenzi amaze iminsi agaragara mu myitozo ya Rayon Sports ndetse akanayikinira mu mikino ya gicuti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza