Ally Niyonzima yahagaritswe muri Mukura VS

Yanditswe na Manzi Rema Jules
Kuya 20 Ukuboza 2016 saa 01:14
Yasuwe :
0 0

Ubuyobozi bwa Mukura VS bwafashe icyemezo cyo guhagarika Niyonzima Ally, mu gihe kingana n’ukwezi bumushinja imyitwarire mibi ijyanye no guta akazi nta mpamvu, nta n’uruhushya yahawe.

Umunyamabanga w’iyi kipe, Niyobuhungiro Fidel yemereye IGIHE ko aya makuru ari impamo.

Ati “ Twafashe icyemezo cyo guhagarika Ally Niyonzima mu bikorwa byose bya Mukura VS ndetse n’aho ikipe ikorera umwiherero mu gihe cy’ukwezi.”

Niyobuhungiro atangaza ko mu byatumye bafata iki cyemezo harimo kuba uyu mukinnyi yarataye bagenzi be atabiherewe uruhushya.

Ati “ Ally Niyonzima yavuye hano atubwiye ko agiye kwivuriza muri Butare nyuma y’umukino wa Kiyovu Sports. Nyuma y’aho twumvise ko yahise ajya i Burundi ariko nta makuru ye twamenye kuko twongeye kumubona twitegura gukina na Rayon Sports."

" Twahise tumuhana nk’uko n’uwundi wese wakora amakosa yahanwa. Ni umukozi wari warataye akazi agarutse turamuhana, twamuhanishije ukwezi kose atagaragara mu bikorwa bya Mukura.”

Ibaruwa yashyizweho umukono n’umunyamabanga Niyobuhungiro, IGIHE ifitiye kopi igaragaza ko Ally yahanwe kuva kuya 17 Ukuboza yemerewe kugaruka mu bikorwa bya Mukura VS ku ya 17 Mutarama 2017.

Mukura VS ngo ntitewe impungenge n’ibura rya Ally nubwo ari umukinnyi iyi kipe igenderaho mu kibuga hagati.

Niyobuhungiro ati “Ni umukinnyi mwiza ariko yaradutereranye kandi n’abari bahari babikoraga neza nta kibazo. Nta mpungenge dutewe n’uko agiye kumara ukwezi adahari.”

Yakomeje atangaza ko bafite amakuru ko uyu mukinnyi yaba ari kwitegura gusaba imbabazi ndetse ngo aramutse abikoze bakicara nk’ubuyobozi bakabisuzuma.

Mukura VS iri ku mwanya wa 12 muri shampiyona y’icyiciro cya mbere mu Rwanda igeze ku munsi wayo wa munani, aho ifite amanota icyenda.

Mukura VS yahagaritse Ally Niyonzima (ufite umupira) mu gihe kingana n'ukwezi adakandagira mu kibuga
Ibaruwa ihagarika Ally Niyonzima yashyizweho umukono n'ubuyobozi bwa Mukura VS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244