Kwamamaza

Amakipe yahagarikiwe ibibuga na Ferwafa ashobora gusezera muri Shampiyona

Yanditswe kuya 13-10-2016 saa 14:06' na Manzi Rema Jules


Habura iminsi ibiri ngo shampiyona y’icyiciro cya mbere mu Rwanda itangire nibwo Ferwafa binyuze mu kanama kari kashyizweho gashinzwe gusuzuma ibibuga katangaje ko icya Gicumbi FC, Amagaju FC na Sunrise FC bihagaritswe kuzakinirwaho uyu mwaka mu gihe nta gikozwe ngo bivugururwe.

Icyemezo cyatangajwe kuri uyu wa Gatatu cyaje gitinze ku buryo aya makipe atabonye umwanya wo kumenyeshwa icyo ibibuga bitujuje ngo bikosorwe.

Ibi byatumye aya makipe yose afata icyemezo cy’uko mu gihe Ferwafa itisubiyeho ngo iyemerere gukinira imbere y’abafana bayo cyangwa se imikino itangira shampiyona yari afite isubikwe hatunganywe ibibuga, ashobora gusezera uyu mwaka ntakine shampiyona.

Umunyamabanga Mukuru wa Gicumbi FC, Antoine Dukuzumuremyi, aganira na IGIHE yagize ati “Ferwafa ntabwo idutegeka, nitwe nk’abanyamuryango tugomba kureba igikenewe. Sinumva ko ishobora gufata umwanzuro wo gukura ikipe imbere y’abaturage kandi ari iyabo. Kugeza iyi saha nta baruwa turabona itubuza gukinira hano, ni mu itangazamakuru gusa.”

Yakomeje agira ati “Icyo navuga ni uko hari ingengo y’imari tuba twarateguye mbere kandi nta bushobozi twabona bwo kwimura ikipe nubwo bidashoboka kuko mu mahame ayishyiraho hari irivuga ko Gicumbi FC ari iy’abaturage, ubwo twaba tubirenzeho. Ndizera ko baza kwisubiraho ariko bidakozwe bishobora gutuma tutongera kugaragara muri shampiyona kuko ibyakorwa byose gukura ikipe ku baturage ntibishoboka.”

Perezida wungirije w’ikipe y’Amagaju, Nkurunziza Jean Damascène we yagize ati “Ibyo bintu turabyumva mu itangazamakuru gusa. Dukomeje gahunda zacu nk’uko bisanzwe. Gusa niba ariko bimeze koko byaba bitangaje kuko nta kintu bigeze batubwira, ikibuga cyacu kitujuje ngo twange kugikosora.”

“Twabonye bahinduye aho imikino izabera batanatubwiye, ubuse urumva ku bushobozi buke dusanzwe dufite hakiyongeraho ayo kujya gukinira i Huye, kuhakorera imyitozo buri munsi byatwara hafi ibihumbi 100 ku munsi, yava he? Ibyo ni nko kutwirukana muri shampiyona.”

Muri Sunrise ho ubuyobozi buravuga ko basabye Ferwafa gusubika umukino wa mbere wa shampiyona bagombaga gukina na AS Kigali ibyo banenze ku kibuga bikabanza gutunganywa ariko kuvana ikipe y’abaturage aho iri bidashoboka nk’uko umuyobozi wayo Ndungutse Bosco yabitangarije IGIHE.

Ati “Ibyo bari badusabye birimo gushyiraho amazamu mashya, guca imifurege ifata amazi no gucisha imashini mu kibuga twarabikoze. Twasabye Ferwafa gusubika umukino wacu bakatubwira ibyo bavuga tutujuje bigatunganywa. Gukura ikipe hano kandi aribwo abaturage bari bakiyibona bafite amatsiko yo kuyireba ikina ntibyakunda ku buryo hari n’abatangiye kudusaba ko niba igiye i Kigali ihindurirwa izina kuko itazaba ikiri iyabo.”

Ibi byose biraza byiyongera ku bibazo uruhuri biri muri Ferwafa mbere y’umunsi umwe ngo shampiyona itangire, haba iby’abakinnyi batarahabwa ibyangombwa, amakipe byose nta na kimwe kiracyemuka by’umwihariko Rayon Sports yagombaga gukina na Police FC kuri uyu wa Gatanu ikaba yabaye iya mbere kwandika isaba ko umukino usubikwa kuko idashobora gukina ibibazo by’abakinnyi bayo iburana na APR FC bitarakemuka.

Ikibuga cy'Amagaju cyahagaritswe kwakira imikino ya shampiyona uyu mwaka
Sunrise FC irasaba umwanya wo gutunganya ikibuga cyayo ariko ikipe ntive imbere y'abaturage

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved