Kwamamaza

Amakipe yo muri Brazil yiyemeje gufata mu mugongo Chapecoense imyaka itatu

Yanditswe kuya 30-11-2016 saa 13:15' na Manzi Rema Jules


Nyuma y’impanuka y’indege yahitanye abakinnyi n’abatoza b’ikipe ya Chapecoense yo muri Brazil kuri uyu wa Kabiri mu rukerera berekeza muri Colombia, andi makipe yo muri iki gihugu yamaze gutangaza ko azayifata mu mugongo ayitiza abakinnyi ku buntu ndetse anasaba Ishyirahamwe ry’umupira w’amaguru gukora ibishoboka byose rikayirinda kumanuka mu cyiciro cya kabiri mu myaka itatu itaha.

Isi yose muri rusange by’umwihariko abakunzi b’umupira w’amaguru bagiye bagaragaza ko bifatanyije mu kababaro n’imiryango y’abazize impanuka y’indege yarimo abakinnyi b’ikipe ya Chapecoense yo muri Brazil yari igiye muri Colombia gukina umukino wa nyuma na Atletico Nacional mu irushanwa rihuza amakipe yo muri Amerika y’Epfo.

Aba bakinnyi ntibagize amahirwe yo kugera aho bari bagiye kuko indege barimo yagize ikibazo cyo kubura amavuta bituma ita icyerekezo ndetse iza gukora impanuka mu bantu 77 bari bayirimo batandatu aba aribo barokoka barimo abakinnyi b’iyi kipe batatu.

Nk’uko BBC yabitangaje, amakipe yo mu cyiciro cya mbere muri Brazil atandukanye yemeye gutiza Chapecoense abakinnyi nta kiguzi kugira ngo yongere yiyubake ndetse anasaba Ishyirahamwe ry’umupira w’amaguru muri iki gihugu gushyiraho amategeko mashya abuza ko iyi kipe yazamanuka mu cyiciro cya kabiri mu myaka itatu itaha.

Ikipe ya Atletico Nacional yo muri Colombia yagombaga guhura na Chapecoense ku mukino wa nyuma w’igikombe cy’irushanwa rihuza amakipe yo muri Amerika y’Epfo, yamaze gusaba ko igikombe cyahabwa mukeba (Chapecoense) ndetse inahamagarira abafana bayo kuza ku bwinshi kuri stade bagombaga gukiniraho kuri uyu wa Gatatu bambaye imyenda y’umweru mu rwego rwo guha icyubahiro ababuze ubuzima bwabo.

Uretse aya makipe, n’abakinnyi batandukanye ku Isi barimo Cristiano Ronaldo, Lionel Messi, Neymar, Wayne Roney, Sergio Aguero n’abandi batanze ubutumwa bwihanganisha imiryango y’abitabye Imana ndetse n’abafana b’iyi kipe.

Impanuka ikimara kuba byari byatangajwe ko indege yarimo abantu 81 ariko ikigo cyo muri Colombia gishinzwe gucunga ibiza cyamaze kwemeza ko harimo 77 gusa kuko bane batafashe uru rugendo kubera ibibazo by’ibyangombwa.

Mbere gato yo gufata rutemikirere bahaguruka i Sao Paulo, umutoza w’iyi kipe Cadu Gaucho wari ufite imyaka 36 yari yashyize aka video kuri facebook avuga ko ari itariki itazibagirana mu mateka kuri Chapecoense kuko wari wo mukino wa mbere ukomeye bahatanira igikombe mpuzamahanga bari bagiye gukina kuko igihe kinini bakimaze mu byiciro byo hasi.

Chapecoense ni imwe mu makipe yatangaga icyizere mu mupira wa Brazil kuko uretse kuba yarazamutse muri 2014, uyu mwaka yari ku mwanya wa cyenda imbere y’ibikomerezwa nka Sao Paulo, Fluminense na Cruzeiro.

Perezida wa Brazil, Michel Temer yamaze gutangaza iminsi itatu y’icyumano mu gihugu hose ndetse n’amakipe atandukanye arimo Real Madrid na FC Barcelona zatangaje ko mbere y’imyitozo zigomba gufata umunota wo kunamira aba bakinnyi.

Iyi ndege yakoze impanuka irashwanyagurika

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved