Amarozi mu mupira w’amaguru yagize ingaruka kuri Seninga Innocent utoza Police FC

Yanditswe na Manzi Rema Jules
Kuya 18 Ukuboza 2016 saa 10:04
45 30

Umutoza Mukuru wa Police FC, Seninga Innocent, yahamije ko amarozi akoreshwa ku rwego rwo hejuru mu mupira w’amaguru mu Rwanda ndetse atanga urugero rw’uburyo ubwo yakinaga muri AS Kigali yagiye yanga kenshi kuyakoresha biza no kumuviramo gusezera burundu kuri ruhago afata inzira y’ubutoza.

Seninga yabitangaje kuri uyu wa Gatandatu tariki 17 Ukuboza nyuma y’umukino Police FC atoza yari imaze gutsindamo Etincelles yatozaga umwaka ushize ibitego 2-0 bya Danny Usengimana na Mico Justin.

Abajijwe n’abanyamakuru niba yemera ko amarozi akoreshwa mu mupira w’amaguru mu Rwanda ahanini kubera ibisa nkayo byagaragaye ku mukino wahuje Rayon Sports na Mukura VS i Huye kuwa Gatanu; Seninga nta guca ku ruhande yemeje ko hari abayakoresha ndetse nawe ubwe yigeze kugirwaho ingaruka n’iyo myizerere.

Ati “Ibintu by’amarozi ndabivuga mu buryo bubiri. Ejo (kuwa Gatanu) narabibonye nanabisomye ku mbuga. Njyewe nkiri n’umukinnyi nabaye mu bintu… biri mu byatumye mva mu mupira. Ibintu by’amarozi simbyemera, nta gaciro mbiha kuko ngikina nko muri AS Kigali bajyaga batubwira ngo tubikoreshe nkabyanga rimwe na rimwe bituma ncika intege zo gukina umupira bituma nanawureka kubera ibyo bintu.”

“Njye rero nta gaciro mbiha nibaza ko iyo umutoza yatoje neza abakinnyi yarabateguye neza mu mutwe ashobora gutsinda atiriwe yiringira ibyo bintu byose.”

Uyu mutoza watoje amakipe arimo Isong FC, Kiyovu Sports, Etincelles na Police FC arimo ubu avuga ko ibanga rye muri aka kazi ari ukumvikana n’abakinnyi aba afite, bakamufata nka mukuru wabo ibi akaba aribyo bimuhesha kubumvisha intego ze zo gushaka intsinzi aho kuyibona akoresheje imbaraga z’abarozi atemera.

Ni kenshi byagiye bivugwa ko amakipe yo mu Rwanda amwe n’amwe akoresha amarozi by’umwihariko hakaba hari n’abatoza bashyirwa mu majwi kuba aho gutoza biringira amarozi.

Seninga Innocent yasobanuye ko yakuwe mu kibuga no kwanga gukoresha amarozi
Usengimana Danny niwe watsinze igitego cya mbere cya Police FC muri bibiri yatsinze Etincelles FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE