Kwamamaza

Amateka yisubiyemo Amavubi atsinda Uganda Cranes(Amafoto)

Yanditswe kuya 30-06-2016 saa 21:44' na Manzi Rema Jules


Kuri uyu wa kane tariki 30 Kamena 2016 Kuri stade ya Kigali i Nyamirambo abahoze bakinira Amavubi n’abahoze bakinira Uganda Cranes bongeye gucakirana imbere y’imbaga y’abafana batari bake, mu mukino wagaragayemo ibitego umunani.

Amavubi yatsinze Uganda ibitego bitanu kuri bitatu mu mukino wari ugamije kwibuka abazize Jenoside yakorewe Abatutsi no gushaka inkunga yo gufasha abahoze bakina ubu babayeho nabi.

Uyu mukino wari utegerejwe na benshi ndetse saa munani hari abari bamaze kugera muri stade bategerezanyije akanyamuneza kongera kubona ibikurankota mu gutaha izamu nka Bokota Labama na Abedi Makasi, urukuta rw’ubwugarizi bwa Katauti , Gangi na Ntaganda Elias, utibagiwe hagati ha Jimmy Mulisa, Karekezi n’abandi.

Umukino watangiye saa cyenda n’iminota 50 witabiriwe n’abafana bari mu byishimo bitagira uko bisa ariko nyuma y’iminota 18 gusa Vincent Kayizi ahita atsindira igitego cya mbere Uganda.

Ntibyaciye intege abafana kuko bakomeje gushyigikira bikomeye Amavubi, ku munota wa 29 Kanamugire Aloys watozaga Amavubi yakoze impinduka akuramo Ashraf Kadubiri wari umaze kunanirwa yinjiza Lita Mana nyuma y’umunota umwe Kamana Bokota Labama ahita yishyurira Amavubi, amakipe yombi anganya igitego 1-1.

Ni igitego cyari kiryoheye ijisho bitewe n’uburyo Eric Nshimiyimana, Karekezi Olivier na Ntaganda Elias babanje guhererekanya umupira mbere yo kuwuha Said Abed Makasi na we awugeza neza kuri Bokota Labama wahise anyeganyeza inshundura.

Hamwe n’umurindi w’abafana, Amavubi yatangiye kurusha Uganda ndetse ku munota wa 41 Said Abed Makasi, wibukirwa ku gitego yatsinze DR Congo muri CAN 2004 ubwo u Rwanda rwatsindaga Congo igitego 1-0 abonera igitego cya kabiri Amavubi cyaje nyuma gato y’izindi mpinduka umutoza yari akoze akuramo Jimmy Mulisa akinjiza Mutarambirwa Djabil.

Igice cya kabiri kigitangira, Kamanzi Karim na we uri mu bakinnye muri CAN 2004 yongeye kwibutsa Abanyarwanda ko akiri wa wundi maze ku ishoti rikomeye yateye umuzamu wa Uganda ntabashe kurigarura atsinda igitego cya gatatu cy’u Rwanda.

Nyuma y’akanya gato cyane Bokota byagaragaraga ko ari ku rwego rwo hejuru cyane yatsinze igitego cya kane ndetse ku munota wa 60 kapiteni Olivier Karekezi yanga kuviramo aho ashyiramo icya gatanu.

Karekezi amaze gusimburwa na Muvunyi Fils yasigiye igitambaro cya kapiteni Ndikumana Hamadi Katauti, Bokota asimburwa na Bagumaho Hamissi Mutarambirwa Djabil na we asimburwa na Kayihura Youssuf Chami nibwo Uganda yagarutse mu mukino ndetse itangira gusatira cyane.

Umutoza Kanamugire yahise akora indi mpinduka yahagurukije abafana bose ku kibuga ubwo yinjizaga Muhamud Mossi asimbuye Nkunzingoma Ramadhan akakirizwa urufaya rw’amashyi y’abafana.

Nyuma yo gushimisha abafana akora utuntu tudasanzwe anakuramo ibitego byabazwe, mu minota ya nyuma Muhamud yatsinzwe ibitego bibiri bya Steven Bengo na Vincent Kayizi, umukino urangira u Rwanda rutsinze Uganda ibitego 5-3.

Abakinnyi babanjemo ku mpande zombi :

Rwanda: Nkunzingoma Ramadhan(GK), Hategekimana Bonaventure Gangi, Ndikumana Hamad Katauti, Mulisa Jimmy, Eric Nshimiyimana, Ntaganda Elias, Kayiranga Jean Baptiste, Karekezi Olivier ( C ), Bokota Labama, Munyaneza Ashraf,Munyakazi Hassan na Saidi Abed Makasi.

Uganda: Kamalya Sam (GK),Simeon Masaba, Daniel Ntare, Andy Lule, George Ssemwogerere, Abdallah Mubiru, Vincent Kayizi, Hakim Magumba, Philip Obwiy, James Odoch ( C ) na Kefa Kisala.

Amakipe yombi basuhuzanya mbere y'umukino
Abakinnyi babanje mu kibuga ku ruhande rw'Amavubi
Abakinnyi babanje mu kibuga ku ruhande rwa Uganda
Abakinnyi b'Amavubi bishimira igitego
Amavubi yongeye kwereka Uganda ko ababatsinze ntaho bagiye
Abakinnyi b'Amavubi bari babukereye kuri uyu mukino
Bokota Labama(ibumoso) yongeye kwigaragaza nk'umukinnyi w'umuhanga
Bokota Yacengaga ab'inyuma ba Uganda nk'uwoga mu mazi
Umutoza Eric Nshimiyimana yagaragaje ko usibye gutoza no kuwuconga akibyibuka
Mutarambirwa Djabil wanyuze muri Etincelles nawe yagaragaye muri uyu mukino
Umutoza wungirije mu ikipe y'igihugu Amavubi, Jimmy Mulisa(wambaye 7) yari yabukereye
Kanamugire Aloys niwe wari umutoza mukuru w'Amavubi
Karekezi Olivier(nimero 11) yishimira igitego na bagenzi be
Karim Kamanzi yacenze ab'inyuma ba Uganda na nyezamu maze atsinda igitego
Katawuti yongeye kugaragara yambaye umwenda w'ikipe y'igihugu
Kayiranga Baptiste yongeye kwigaragariza abafana b'Amavubi
Kayiranga yagaragaje ko akibuka kuwuconga
Muhamud Mossi yinjira mu kibuga asimbura Ramadhan
Said Abedi Makasi yongeye kugaragaza ko ari umukinnyi w'umuhanga
Ifoto y'urwibutso y'amakipe yombi mbere yuko umukino utangira

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 20 Ugushyingo 2016
Copyright © 2009 -2014 - IGIHE Ltd - All Rights Reserved