APR FC yatsinze Pepiniere itura intsinzi umutoza wayo wabuze umubyeyi

Yanditswe na Jah d’eau Dukuze
Kuya 14 Ukuboza 2016 saa 07:36
Yasuwe :
0 0

Ikipe ya APR FC yongeye gusatira Rayon Sports ku rutonde rwa shampiyona, nyuma yaho ibitego bya Nshuti Innocent na Rugwiro Herve bitumye yegukana intsinzi y’ibitego 2-0, ari nako iyitura umutoza wayo Jimmy Mulisa wapfushije nyirarume.

Uyu mukino wagombaga kubera kuri stade ya Pepiniere i Runda, gusa uza kwimurirwa kuri stade ya Kigali i Nyamirambo, nyuma yaho bigaragariye ko ikibuga cya Pepiniere kitameze neza ku buryo cyakwakira umukino wa shampiyona, ahanini bitewe n’umukino wari wahuje iyi kipe na Police.

Baptiste yatunguwe no kumva umukino wajyanywe i Nyamirambo

Muri uyu mukino wari ikirarane cy’umunsi wa gatandatu wa shampiyona, ntabwo byasabye umwanya munini ngo bimeneyekane aho werekeza, dore ko ku munota wa kane gusa, Nshuti Innocent yaje kuyitsindira igitego cya mbere muri uwo mukino, igitego cya kabiri muri shampiyona kuri uyu musore w’imyaka 16 gusa.

APR FC yakomeje gusatira nyuma y’iki gitego, ndetse igenda irema ubundi buryo bwo gutsinda, gusa yongeye kwifashisha myugariro Herve Rugwiro ngo ibone igitego cya kabiri, ubwo Papy Sibomana Patrick yazaga kumuterekera umupira mu rubuga rw’amahina na we ntakore ikosa imbere ry’izamu ryari ryambaye ubusa.

Igice cya mbere cyarangiye ari ibyo bitego bibiri ku busa, ndetse umukino wose uza kurangira gutyo nubwo amakipe yombi yagiye abona amahirwe yo kuba yanyeganyezaga inshundura. Nyuma y’umukino, umutoza Yves Rwasamanzi wari wayoboye iyi kipe kubera ko umutoza mukuru Jimmy Mulisa yagize ibyago, yaje gutangaza ko bishimiye intsinzi yari ifite intego.

Yagize ati: “Iyi ntsinzi twari tuyikwiye kuko twashakaga gusatira ikipe ya Rayon Sports. Twakoze ibishoboka mu muryango wa APR FC turishimye.Umutoza mukuru yagize ibyago abura nyirarume, twagombaga gutsinda uyu mukino kugirango tumufate mu mugongo”.

Ku ruhande rw’umutoza Kayiranga Baptiste, yatangaje ko kuba batsinzwe byatewe ahanini n’amakosa ba myugariro be bakoze hakiri kare gusa ko yaje no gutungurwa kuba yakiniye i Nyamirambo.

“Ikibuga bari bagikoreye igenzura, sinzi icyabaye kidasanzwe ku Ruyenzi cyaba cyatumye bagihagarika. Baduhamagaye habura iminota 20 ngo imyitozo yanyuma tuyisoze. Ibyo twateguraga byose twari twabikoze tugendeye kuri icyo kibuga nta bindi twari bukore. Twarabyakiriye ni yo mpamvu twaje gukina, perezida yabimbwiye, nanjye nzana ikipe ye i Nyamirambo nza gukina”.

Gutsinda uyu mukino, bitumye APR FC ikomeza gushimangira umwanya wa kabiri n’amanota 20 nyuma y’umunsi wa munani wa shampiyona, amanota abiri yonyine inyuma ya Rayon Sports ya mbere. Pepiniere ya Kayiranga Baptiste, yo ku rundi ruhande ikaba ikomeje guheruka izindi n’inota rimwe ryonyine.

Nshuti Innocent yongeye guha akazi ba myugariro ba Pepiniere nkuko yabikoze kuri Sunrise
Nshuti yatsindiye APR F igitego cya gatatu kuva yazamurwa mu ikipe nkuru
Nshuti yari yakoze ibishoboka mu mukino...
Gusa nkuko bimaze kumenyerwa kuri ba rutahizamu ba APR FC bitwara neza ku mukino, na we yahise avunika bitunguranye...
Asimbuzwa ISSA BIGIRIMANA!
Buteera Andrew yagaragazaga imbaraga mu kibuga hagati
Bizimana Djihad yaje gutorwa nk'umukinnyi w'umukino
Herve Rugwiro uretse gutsinda igitego, yanugariraga neza
No hejuru ntiyahatangwaga
Benedata Janvier yongeye kugaragaza ubuhanga asanganywe
Maestro Jijiya!
Mu kirere no hasi wakinwaga
Rwari rwambikanye
Umunyezamu na we ati si nge wahera!
Umunyezamu wa Pepiniere yahindukijwe ubugira kabiri
Herve yatsinze igitego gishimangira intsinzi
Innocent Di Maria aza kumushimira
Na we ashimira Papy wamuterekeye ku isahani
Ishimwe Kevin yasenze Imana mbere yo kwinjira mu kibuga ngo ntiyongere gushwana n'umutoza nkuko byagenze mu mukino uheruka
Uyu musore yaje no kwitwara neza mu minota yakinnye
Abafana bari bagerageje kuza
...Nubwo batari benshi i Nyamirambo
Mwiseneza Djamar yongeye kugaragara mu kibuga akina umukino we wa kabiri nyuma yo gukira imvune
Rwasamanzi Yves yari yongeye gutoza APR FC nk'umutoza mukuru.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza