APR FC izerekeza muri Zambia, Rayon Sports muri Sudani y’Epfo mu marushanwa Nyafurika

Yanditswe na Manzi Rema Jules
Kuya 21 Ukuboza 2016 saa 04:30
Yasuwe : XX
0

Muri tombola y’uko amakipe yabonye itike yo gukina amarushanwa Nyafurika uyu mwaka azahura, APR FC izahagararira u Rwanda muri CAF Champions League, yatomboye Zanaco FC yo muri Zambia naho Rayon Sports izakina CAF Confederation Cup yo yisanga iri kumwe na Al Salam Wau yo muri Sudani y’Epfo.

Iyi Tombola yabaye kuri uyu wa Gatatu, tariki 21 Ukuboza, i Cairo mu Misiri, ku cyicaro gikuru cy’Ishyirahamwe ry’Umupira w’amaguru muri Afurika, CAF.

APR FC yongeye kwerekeza muri Afurika y’Amajyepfo, kuko no mu mwaka ushize yari yatomboye Mbabane Swallows yo muri Swaziland, iza no kuyisezerera iyitsinze ibitego 4-1.

Zanaco FC izwi ku kazina ka’ (The Bankers), ni imwe mu makipe 18 akina shampiyona ya Zambia, yashinzwe mu 1985. Imaze gutwara ibikombe bya shampiyona inshuro zirindwi, harimo icyo yatwaye mu 2002, 2003, 2005, 2006, 2009, 2012 na 2016. Yatwaye kandi igikombe kimwe cy’igihugu, bitatu bya Zambian Charity Shield (twagereranya n’icy’Amahoro mu Rwanda).

Iyi kipe kandi si ubwa mbere yitabiriye irushanwa rya CAF Champions League kuri uyu mugabane kuko imaze kuryitabira inshuro eshanu, ariko kure yageze ni mu cyiciro cy’amatsinda (1/16), hari mu 2010.

APR FC niyo izabanza gusohoka hagati ya tariki 10, 11 na 12 Gashyantare 2017, ikina umukino ubanza i Lusaka muri Zambia, na ho umukino wo kwishyura ubere i Kigali hagati ya tariki 17,18 na 19 uko kwezi.

Rayon Sports yo izabanza gusura Al Salam Wau yo muri Sudani y’Epfo mu mukino ubanza, uzaba hagati ya tariki 10,11 na 12 Gashyantare 2017 mu gihe umukino wo kwishyura uzabera i Kigali hagati ya tariki 17, 18 na 19 z’uko kwezi.

APR FC yisanze muri Zambia nyuma yo kujya muri Swaziland umwaka ushize
Rayon Sports izakinira umukino ubanza muri Sudani y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza