APR FC mu makipe yahombera bikomeye mu isezera rya Pépinière muri shampiyona

Yanditswe na Philbert Girinema
Kuya 2 Mutarama 2017 saa 11:28
Yasuwe : XX
0

Kugeza uyu munsi bizwi ko Pépinière FC yamaze gusezera muri shampiyona y’icyiciro cya mbere mu Rwanda kubera icyemezo cya Ferwafa cyo kuyifungira ikibuga ariko mu mategeko iracyari umunyamuryango ndetse ibishatse yagaruka ikongera igakina mu gihe cyose itaraterwa mpaga inshuro eshatu.

Iyi kipe yatozwaga na Kayiranga Jean Baptiste ntiyabashije kugaragara ku kibuga ku munsi wa 10 yagombaga guhura na AS Kigali ndetse no kuwa 11 yagombaga kwisobanura na Marines FC i Rubavu ntabwo yigeze ihagera.

Ingingo ya 89 mu mategeko agenga shampiyona y’icyiciro cya mbere mu Rwanda igaragaza ko ikipe yose itewe mpaga inshuro eshatu kubera kutagaragara ku bibuga isezererwa.

Igira iti “Ikipe yose yahanishijwe gutsindwa mpaga inshuro eshatu muri shampiyona kubera ko itageze ku kibuga, mu gihe kimwe cy’amarushanwa ya siporo ihita ihanishwa gutsindwa mpaga ku buryo bwa rusange ku yindi mikino y’iyo shampiyona ikanahita yoherezwa mu cyiciro cyo hasi ugerereranyije n’icyiciro yarimo cyangwa se igahanishwa guhagarikwa umwaka w’amarushanwa ukurikira iyo nta kindi cyiciro kiri hasi.”

Ibi bivuze ko Pépinière FC imaze guterwa mpaga ebyiri niramuka itagaragaye ku kibuga ku munsi wa 12 uzakinwa tariki 8 Mutarama 2017 aho igomba kuzasura Rayon Sports kuri Stade ya Kigali, izahita isezererwa burundu kandi n’ubu biraca amarenga ko ariho bigana.

Nk’uko aya mategeko ya Ferwafa abiteganya amakipe yose yakinnye na Pépinière FC akayitsinda azahita yamburwa ayo manota.

Agace ka kabiri mu ngingo ya 89 kagira kati “Amanota yose y’imikino iyo kipe yakinnye agomba kugirwa imfabusa mu gihe imikino ibanza cyangwa no kwishyura igikinwa. Iyo bigenze ukundi nta gihinduka ku manota.”

Mu makipe yabihomberamo bikomeye muri iki cyemezo harimo APR FC igomba gutakaza amanota atatu yakuye kuri Pépinière FC iyitsinze ibitego 2-0 bivuze ko ikinyuranyo na mukeba Rayon Sports bahanganiye umwanya wa mbere cyava kuva ku manoto abiri agahita aba atanu.

Byaba ari igitutu gikomeye kuri iyi kipe y’ingabo z’igihugu ishaka kwisubiza igikombe cya shampiyona ku nshuro ya kane yikurikiranya kuko mu gihe tariki 21 Mutarama 2017 yitegura guhura na Rayon Sports itaratsindwa na rimwe muri shampiyona, gutakaza hakajyamo ikinyuranyo cy’amanota umunani byasaba izindi mbaraga kugira ngo kivemo.

Si APR FC mu makipe akomeye yahombera mu kwikura muri shampiyona gusa kuko Police FC, AS Kigali, Espoir FC, Kiyovu Sports n’izindi zari zarakinnye nayo zizakurwaho amanota dore ko mu mikino icyenda yagaragaye ku kibuga yatsinzwe inshuro umunani inganya rimwe ikaba yari ifite inota rimwe iri ku mwanya wa nyuma.

Nta cyizere ko abasore ba Kayiranga Baptiste bazongera kugaragara mu kibuga
Police FC ni imwe mu zishobora guhombera mu isezera rya Pépinière

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza